ខេត្តបន្ទាយមានជ័យ ៖ ទឹកជំនន់លិចផ្លូវបានក្លាយជាកន្លែងលេងទឹកកម្សាន្តរបស់ប្រជាពលរដ្ឋរាប់រយនាក់ក្នុង១ថ្ងៃៗនៅស្រុកភ្នំស្រុក។
ជាក់ស្តែងនៅថ្ងៃទី២៩ ខែកញ្ញា ឆ្នាំ២០១៩នៅតាមបណ្តោយផ្លូវទៅស្រុកភ្នំស្រុក គេឃើញមានប្រជាពលរដ្ឋរាប់រយនាក់បាននាំគ្នាលេងទឹកកម្សាន្តតាមផ្លូវនៅពេលដែលទឹកជំនន់ជន់លិចផ្លូវ ក្នុងឱកាសបុណ្យភ្ជុំបិណ្ឌផងដែរ។
លោក យឹម សំណាង អភិបាលស្រុកភ្នំស្រុក បានប្រាប់ឱ្យដឹងថា ទឹកជំនន់បានជន់លិចផ្លូវដែលតភ្ជាប់ពីផ្លូវជាតិលេខ៦មកទីរួមស្រុកភ្នំស្រុក ដែលទឹកបានហូរកាត់ផ្លូវប្រមាណជា៣ទៅ៤កន្លែងហើយមានប្រវែងប្រមាណជាង២០០០ម៉ែត្រ ហើយក៏បណ្តាលឱ្យខូចផ្លូវកៅស៊ូ។
លោកបានបញ្ជាក់ថា ក្រោយទឹកជន់លិចផ្លូវ គេឃើញក្នុងមួយថ្ងៃៗ មានបងប្អូនប្រជាពលរដ្ឋរាប់រយនាក់ដែលមកលេងនៅអាងត្រពាំងថ្ម ក្នុងស្រុកភ្នំស្រុក ហើយពេលត្រឡប់ទៅវិញនាំគ្នាលេងទឹកកម្សាន្តតាមផ្លូវដែលកំពុងលិច និងមានទឹកហូរកាត់ផ្លូវ។
លោក យឹម សំណាង បានបញ្ជាក់បន្តថា ស្រុកភ្នំស្រុកនៅតាមបណ្តាឃុំមួយចំនួនកំពុងជន់លិចដោយទឹកជំនន់ហូរពីស្រុកអន្លង់វែង ខេត្តឧត្តរមានជ័យ បណ្តាលឱ្យលិចនៅស្រុកភ្នំស្រុករយៈពេលជាងកន្លះខែមកហើយ ព្រមទាំងលិចលង់កសិផលមានស្រែចំការ និងលិចផ្លូវជាច្រើនខ្សែបណ្តាលឱ្យដាច់ផ្លូវអស់មួយចំនួនផងដែរ ៕ (កែសម្រួលដោយ ៖ ធីតា)
ចែករំលែកព័តមាននេះ