រាជធានីភ្នំពេញ ៖ មន្ត្រីជាន់ខ្ពស់រដ្ឋសភា និងជាអ្នកនាំំពាក្យរដ្ឋសភាមិនទទួលយកសម្តីរបស់ទណ្ឌិត សម រង្ស៊ី អតីតប្រធានគណបក្សសង្គ្រោះជាតិដែលបន្តុះបង្អាប់នោះព្រោះថា សាលាអាមេរិកមួយនេះត្រូវបានគេទទួលស្គាល់ពេញសាកលលោកពីគុណភាពអប់រំ ។ លោក…
រាជធានីភ្នំពេញ ៖ មន្ត្រីជាន់ខ្ពស់រដ្ឋសភា និងជាអ្នកនាំំពាក្យរដ្ឋសភាមិនទទួលយកសម្តីរបស់ទណ្ឌិត សម រង្ស៊ី អតីតប្រធានគណបក្សសង្គ្រោះជាតិដែលបន្តុះបង្អាប់នោះព្រោះថា សាលាអាមេរិកមួយនេះត្រូវបានគេទទួលស្គាល់ពេញសាកលលោកពីគុណភាពអប់រំ ។
លោក ឈាង វុន សមាជិករដ្ឋសភា និងជាអ្នកនាំពាក្យរដ្ឋសភាប្រកាសមិនទទួលយកការបន្តុះបង្អាប់ របស់ទណ្ឌិតសម រង្ស៊ី ចំពោះលោក ហ៊ុន ម៉ាណែត មេបញ្ជាការកងទ័ពជើងគោកថាទទួលសញ្ញាបត្រក្លែងក្លាយសាលាយោធាអាមេរិក ។ លោក ឈាង វុន បានឲ្យដឹងក្រោយកិច្ចប្រជុំគណៈកម្មាធិការអចិន្ត្រៃយ៍រដ្ឋសភា នាព្រឹកថ្ងៃទី០១ ខែតុលានេះថា សាលា West point របស់សហរដ្ឋអាមេរិក គឺជាសាលារៀនមួយម៉ត់ចត់ណាស់ ។
លោកបញ្ជាក់ថា ៖ «អ្នក(ទណ្ឌិត សម រង្ស៊ី) ដែលលើនិយាយពីសញ្ញាបត្រពីរខុសគ្នាហើយក្លែងក្លាយនេះគួរណាស់កុំវិនិច្ឆ័យតាមសតិអារម្មណ៍របស់ខ្លួនព្រោះខ្ញុំដឹងថា លោក ហ៊ុន ម៉ាណែត លោកបានខិតខំប្រឹងប្រែងណាស់» ។ លោក ឈាង វុន បន្តថា បើមើលពីការសិក្សា និងប្រព័ន្ធអប់រំនៅសាលា West Point គឺច្បាស់លាស់ណាស់ ។ សាលានេះគេបានចាត់ទុកជាសាលាយោធាជាន់ខ្ពស់របស់សហរដ្ឋអាមេរិក ហើយថ្នាក់ដឹកនាំវិស័យយោធារបស់អាមេរិកភាគីច្រើនចេញពីសាលានេះ ។ សាលានេះក៏បង្រៀនបញ្ញាវ័ន្តដែលចេញវិស័យយោធាឲ្យចេះធ្វើនយោបាយផងដែរ ។ អីញ្ចឹង បើនិយាយពីនយោបាយមានច្រើនផ្នែកមាននយោបាយសេដ្ឋកិច្ចនយោបាយ សង្គម និងនយោបាយផ្សេងៗទៀត ។
អ្នកនាំពាក្យរូបនេះបានគូសបញ្ជាក់ថា ៖«អីញ្ចឹងអ្វីដែលទណ្ឌិត សម រង្ស៊ី លើកឡើងខ្ញុំមិនទទួលយកបានទេ ។ ខ្ញុំជាមន្ត្រីជាន់ខ្ពស់គណបក្សប្រជាជន ហើយឯកឧត្តម ហ៊ុន ម៉ាណែត គឺជាបុគ្គលសាធារណៈមួយ របស់គណបក្សប្រជាជនដែរហើយយើងគិតថា មានអនាគតល្អក្នុងការកសាងប្រទេសជាតិទៅអនាគត អីញ្ចឹងការបន្តុះបង្អាប់ចំណេះដឹង និងសញ្ញាប ត្ររបស់គាត់មិនត្រឹមត្រូវទេ។ ហើយសូមបញ្ជាក់ថាសាលា West Point គឺជាសាលា ដែលគេ ទទួលស្គាល់ពេញសាកលលោកមិនមែនចេះតែតែៗស្ករៗនោះទេ» ។ លោកបន្ថែមថា ការនិយាយបែបនេះបានធ្វើឲ្យប៉ះពាល់ដល់សង្គមជាតិយើងទាំងមូលប៉ះពាល់ដល់សមាជិកគណបក្សប្រជាជនទាំងមូល ហើយយើងមិនអាចអត់ឱនឲ្យបាននោះទេ ។
អីញ្ចឹងសូមជម្រាបថា សាលាជាន់ខ្ពស់ដូចសាលា West Point នេះគេមិនចេះឲ្យសញ្ញាបត្រនោះទេ ឬឲ្យបុគ្គលនេះបុគ្គលនោះតាមការនឹកឃើញដូចការចោទប្រកាន់តាមអារម្មណ៍នោះទេ ។ ទោះបីជាមានការបបួលស្បថពីលោក ហ៊ុន ម៉ាណែត យ៉ាងណាក្តីទណ្ឌិត សម រង្ស៊ី មិនបានហ៊ានស្បថនោះទេ ។ ទណ្ឌិត សម រង្ស៊ី នេះបានសរសេរលើបណ្តាញសង្គមនៅយប់ ថ្ងៃទី៣០ខែកញ្ញា យ៉ាងដូច្នេះ លោក ហ៊ុន សែន និងក្រុមគ្រួសារគាត់ផ្តល់គម្រូអាក្រក់ដល់យុវជនខ្មែរ និងប្រព័ន្ធអប់រំនៅកម្ពុជា ដោយសំអាងតែលើសញ្ញាបត្រក្លែងក្លាយ ឬសញ្ញាបត្រប្រភេទទី២ ដែលមានកម្រិតទាបជាងស្តង់ដាធម្មតានៅប្រទេសគេ ។ លោកបន្តថា ក្នុងករណីលោក ហ៊ុន ម៉ាណែត ខ្ញុំចង់និយាយពីសញ្ញាបត្រប្រភេទទី២ ដែលឆ្លុះបញ្ចាំងការទទួលបានចំណេះដឹង និងជំនាញកម្រិតទាបជាងស្តង់ដាសិក្សាធម្មតានៅសហរដ្ឋអាមេរិក ។ នៅសហរដ្ឋអាមេរិក និងទ្វីបអឺរ៉ុបសញ្ញាបត្រប្រភេទទី២ បែបនេះ គេចែកឲ្យនិស្សិតជាជនជាតិបរទេសដែលមានកម្រិតសិក្សាទាបជាងគេមែន តែអាចនាំមកនូវទំនាក់ទំនងផ្នែកនយោបាយដែលមានប្រយោជន៍សម្រាប់ប្រទេសដែលទទួលនិស្សិតជាជនជាតិបរទេសទាំងនោះ ។
ទណ្ឌិតនេះមិនហ៊ានស្បថនោះទេ ដោយបញ្ជាក់ថា យ៉ាងដូច្នេះថា «ចំណេះដឹង និងជំនាញពិតប្រាកដត្រូវបង្ហាញតាមរយៈស្នាដៃជាក់ស្តែង និងស្មារតីទទួលខុសត្រូវមិនចាំបាច់ទៅស្បថស្បែ ឬភ្នាល់គ្នាដូចកូនក្មេងទេ»៕ កែសម្រួលដោយ ៖ សុឃាក់
ចែករំលែកព័តមាននេះ