ព្រះមានព្រះភាគបានទេសនាអប់រំដល់សព្វសត្វឱ្យចេះហ្វឹកហាត់ចិត្តបាននឹងនរ ធ្វើជាមនុស្សខ្លួនតូចតែពេញដោយសតិដឹងខ្លួនជានិច្ច កុំជាមនុស្សខ្លួនធំពេញដោយកិលេសនោះមិនល្អទេ។ ចូរអប់រំកាយឱ្យឃើញថា ខ្លួន ឯងជាមនុស្សធម្មតាៗទៅបានហើយ កុំប្រកាន់ថា ខ្លួនអញជាមនុស្សសំខាន់យ៉ាងនេះ យ៉ាងនោះ ត្រូវចេះគិតដល់ធម្មតាធម៌ ទើបជីវិតបានសុខ ។
តាមពិតទៅក្នុងលោកនេះទោះជារបស់មានវិញ្ញាណក្តី ឥតវិញ្ញាណក្តី សុទ្ធតែមានការប្រែប្រួល និងកន្លងទៅជាធម្មតា គ្មានអ្វីដែលស្ថិតស្ថេរគង់វង្សរហូតទេ ដូច្នេះសូមកុំមានមានះថាខ្លួនឯងនេះគ្រាន់បើឱ្យសោះ ដោយហោចទៅសូម្បីតែខ្លួនប្រាណយើងនេះក៏ប្រែប្រួលគ្រប់ខណៈដែរ បន្តិចទៀតរូបកាយដ៏ស្មោកគ្រោកនេះនឹងវិនាសសូន្យទៅ ។
ហេតុនេះបុគ្គលគួរពិចារណាថា នៅពេលដែលបានសុខ បន្តិចទៀតសេចក្តីសុខនោះនឹងកន្លងទៅ ពេលមានទុក្ខ សេចក្តីទុក្ខនោះក៏នឹងកន្លងទៅដូចគ្នា នៅពេលជួបការលំបាកយ៉ាប់យ៉ឺនមកដល់ រឿងរ៉ាវទាំងនេះ វានឹងមិននៅជាមួយយើងរហូតទេ ទ្រាំបន្តិចទៅ វាគង់នឹងកន្លងទៅជាធម្មតា ។
ចូររៀនហាត់ពត់កាយចិត្តឱ្យព្រមទទួលយកនូវរឿងពិតនៃបញ្ហាជីវិតនេះដោយភក្តីភាពចុះ នឹងបានស្ងប់ចិត្តហើយ ព្រោះអ្វីៗសុទ្ធតែប្រព្រឹត្តទៅក្រោមការត្រួតត្រារបស់ច្បាប់ធម្មជាតិទាំងអស់ ។
ចែករំលែកព័តមាននេះ