ខេត្តកណ្តាល ៖ បើតាមសេចក្តីរាយការណ៍បឋមបានឱ្យដឹងថា ជនសង្ស័យ២នាក់បានរត់គេចខ្លួនបាត់ បន្ទាប់ពីធ្វើសកម្មភាពស្ទាក់កាប់យុវជនម្នាក់ជាជនរងគ្រោះជិះម៉ូតូ សម្លេងលឺដំឡង់គេឯងក្នុងភូមិ និងម្នាក់ទៀតជាអ្នករួមដំណើរ បង្កឱ្យមានការភ្ញាក់ផ្អើលកាលពី៦និង៣០នាទីល្ងាច ថ្ងៃទី២៩ ខែកញ្ញា…
ខេត្តកណ្តាល ៖ បើតាមសេចក្តីរាយការណ៍បឋមបានឱ្យដឹងថា ជនសង្ស័យ២នាក់បានរត់គេចខ្លួនបាត់ បន្ទាប់ពីធ្វើសកម្មភាពស្ទាក់កាប់យុវជនម្នាក់ជាជនរងគ្រោះជិះម៉ូតូ សម្លេងលឺដំឡង់គេឯងក្នុងភូមិ និងម្នាក់ទៀតជាអ្នករួមដំណើរ បង្កឱ្យមានការភ្ញាក់ផ្អើលកាលពី៦និង៣០នាទីល្ងាច ថ្ងៃទី២៩ ខែកញ្ញា ឆ្នាំ២០១៩ នៅចំណុចខាងត្បូងស្ពានលេខ៩ (ស្ពានតាហ៊ីង) ស្ថិតក្នុងភូមិតាហ៊ីង ឃុំព្រែកដាច់ ស្រុកលើកដែក ។
សេចក្តីរាយការណ៍បន្តថា ជនរងគ្រោះខាងលើ ១-ឈ្មោះ យ៉ យ៉ាំងតាវ ភេទប្រុស អាយុ២៣ឆ្នាំ ជនជាតិវៀតណាម មុខរបរធ្វើស្វាយ មានទីលំនៅភូមិតាហ៊ីង ឃុំព្រែកដាច់ ស្រុកលើកដែក និង២-ឈ្មោះ ផាង ជីវឹង ភេទប្រុស អាយុ១៨ឆ្នាំ ជនជាតិវៀតណាម មុខរបរជាងឡាន មានទីលំនៅភូមិព្រែកដាច់ឃុំព្រែកដាច់ ស្រុកលើកដែក ។ ចំណែកជនសង្ស័យ ១-ឈ្មោះ អ៊ួន សុខុម ភេទប្រុស អាយុ៣៤ឆ្នាំ ជនជាតិខ្មែរ មុខរបរកសិករ និង២-ឈ្មោះវី វណ្ណៈ ភេទប្រុស ជនជាតិខ្មែរ មុខរបរកសិករ អ្នកទាំងពីរមានទីភូមិ-ឃុំកើតហេតុខាងលើ ។
បើនគរបាលស្រុកលើកដែកបានឱ្យដឹងថា នៅមុនថ្ងៃកើតហេតុ កាលពី២ថ្ងៃមុនជនរងគ្រោះឈ្មោះយ៉ាំងតាវ បានខ្ចីម៉ូតូគេជិះ ដោយម៉ូតូនោះមានសំឡេងឮខ្លាំង រួចបើកចេញ-ចូលក្នុងភូមិលឿនៗ ហើយខណៈជនសង្ស័យខាងលើក៏បានប្រាប់ឈ្មោះតាវថា «ហ្អែង!បើកម៉ូតូលឿនៗចឹង អញនឹងបិទផ្លូវហើយ» ចំណែកឈ្មោះតាវឆ្លើយថា «ហ្អែង!បិទ បិទទៅ»។ លុះដល់ថ្ងៃទី២៩ ខែកញ្ញា ម៉ោង៦និង៣០នាទីល្ងាចនោះ ឈ្មោះតាវ និងឈ្មោះជី វឹង បានជូនមិត្តភក្តិពីព្រែកដាច់ទៅផ្ទះនៅខាងត្បូងស្ពានព្រែកតាហ៊ីង លុះពេលត្រឡប់មកវិញ ក៏ត្រូវជនសង្ស័យឈ្មោះខុម និងឈ្មោះវណ្ណៈ ស្ទាក់កាប់ និងវាយបណ្ដាលឲ្យរងរបួសតែម្តង ។
ក្រោយពេលបង្កហេតុរួច ជនសង្ស័យទាំង២នាក់បានរត់គេចខ្លួនបាត់អស់ ចំណែកឯជនរងគ្រោះឈ្មោះតាវ ត្រូវបានក្រុមគ្រួសារបញ្ជូនទៅព្យាបាលនៅមន្ទីរពេទ្យប្រទេសវៀតណាម ឯជនរងគ្រោះឈ្មោះជីវឹង សម្រាកព្យាបាលនៅផ្ទះ ។ ពាក់ព័ន្ធករណីនេះ ផ្នែកជំនាញនគរបាលយុត្តិធម៌កំពុងស្រាវជ្រាវ និងកសាងសំណុំរឿងបន្តចាត់ការតាមនីតិវិធី៕ (កែសម្រួលដោយ ៖ បុប្ផា)
ចែករំលែកព័តមាននេះ