រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា រោងកាហ្វេជាប់មាត់ទន្លេមេគង្គក្រោម ស្ថិតក្នុងភូមិដើមចាន់ សង្កាត់ច្បារអំពៅ២ ខណ្ឌច្បារអំពៅ ដែលបងប្អូនពលរដ្ឋអ្នកច្បារអំពៅ ជាពិសេសអ្នកធ្វើការតែងតេនាំគ្នាឧស្សាហ៍និយមទៅពិសាកាហ្វេ និងហូបបាយថ្ងៃត្រង់នៅទីនោះ ពេលនេះទីតាំងមួយនេះត្រូវបានបាក់ស្ទើរតែលិចចូលទៅក្នុងបាតទន្លេទៅហើយ ដោយសារតែរងឥទ្ធិពលធម្មជាតិ ខណៈខ្យល់បោកបក់លាយឡំជាមួយនឹងភ្លៀងយ៉ាងខ្លាំង រួមជាមួយរលកទន្លេបោកផ្ទប់ច្រាំងផងដែរ ។ ហេតុការណ៍បាក់ច្រាំងនេះ បង្កឱ្យមានការភ្ញាក់ផ្អើលឡើងកាលពីម៉ោង១២ថ្ងៃត្រង់ ថ្ងៃទី២៩ ខែកញ្ញា ឆ្នាំ២០១៩ ។
យោងតាមការរៀបរាប់របស់បុរសចំណាស់ជាម្ចាស់ផ្ទះ និងជាម្ចាស់រោងកាហ្វេបានឱ្យដឹងថា កាលពីប៉ុន្មានថ្ងៃមកនេះ មានភ្លៀងធ្លាក់ខ្លាំងលាយលំជាមួយខ្យល់បោកបក់យ៉ាងខ្លាំងផងដែរ នាំឱ្យមានរលកទឹកទន្លេរឹតតែបោកបក់ផ្ទប់មាត់ច្រាំងកាន់តែខ្លាំង ជាហេតុធ្វើឱ្យសសរជើងរោងកាហ្វេដែលសង់ជាប់នឹងទន្លេត្រូវរង្គើរ និងសសរខ្លះត្រូវប្រេះ ដូច្នេះហើយជាហេតុនាំឱ្យគាត់ និងក្រុមគ្រួសារផ្អាកលក់ និងនាំគ្នាប្រមែប្រមូលអីវ៉ាន់យកចេញ ចៀសវាងការបាក់រលំដោយយថាហេតុណាមួយបង្កឱ្យមានគ្រាះថ្នាក់ដល់មនុស្ស ។
លុះដល់ថ្ងៃត្រង់ទី៣០ កញ្ញានេះ បន្ទាប់ពីមានភ្លៀងលាយខ្យល់មួយមេធំរួចមកនោះ រោងកាហ្វេក៏ត្រូវបាក់ស្រុតចូលទៅក្នុងផ្ទៃទន្លេសឹងតែ១០០ភាគរយ បង្កឱ្យមានការភ្ញាក់ផ្អើលខ្លាំងតែម្តង ។
បុរសជាម្ចាស់រោងកាហ្វេឱ្យដឹងទៀតថា រោងកាហ្វេខាងលើនេះ គឺសង់ជាប់នឹងលំនៅឋានដែលគាត់កំពុងស្នាក់ប្រាស្រ័យជុំគ្រួសារបច្ចុប្បន្ននេះផងដែរ ដែលមានប្រវែង៥០ម៉ែត្រគុណ៥ម៉ែត្រ ។ ហើយពីដើមឡើយ (កាលពីអតីត) រោងកាហ្វេ និងលំនៅឋានរបស់លោក គឺស្ថិតនៅពាក់កណ្តាលទន្លេបច្ចុប្បន្ន ពោលគឺប្រមាណ១០ឆ្នាំមុនផ្ទៃទន្លេគឺតូចប៉ុណ្ណោះដែលមានលំនៅឋានពលរដ្ឋជាច្រើន ប៉ុន្តែដោយសារទឹកជំនន់ចេះតែឡើងជន់រហូត ហើយច្រាំងក៏ចេះតែបាក់ ទើបពលរដ្ឋមួយចំនួនសម្រេចចិត្តចាកចេញ ដោយប្តូរទីលំនៅឋានទៅទីទួលនៅកន្លែងផ្សេង។
ដោយឡែកលោកដែលជាម្ចាស់រោងកាហ្វេមិនបានរើចេញឡើយ គឺចេះតែថយរកិលក្រោយមករហូត ដោយលំនៅឋានលោក គឺនៅជាប់មាត់ច្រាំងដំបូងគេបង្អស់នៅតំបន់នោះ ។
លោកបន្ថែមថា កន្លងមក ក៏ធ្លាប់កើតមានបាតុភាពដូចខាងលើផងដែរ ប៉ុន្តែមិនធ្ងន់ធ្ងរឡើយ គ្រាន់តែបាក់ប្រេះបន្តិចបន្តួច ហើយលោកក៏ធ្វើការជួសជួលវាជាការស្រេច ប៉ុន្តែលើកក្រោយនេះ បែរជាត្រូវបាក់ស្រុតទៅវិញ ដែលជារឿងគួរឱ្យសោកស្តាយ ព្រោះទាំងលំនៅឋាន និងរបររកស៊ីរបស់លោក គឺស្ថិតនៅចំណុចនេះ ។ យ៉ាងណាមិញ ក្នុងករណីបាក់ច្រាំងទន្លេខាងលើនេះ ពុំមានបណ្តាលឱ្យមនុស្សណាម្នាក់ រងរបួស ឬប៉ះពាល់ដល់អាយុជីវិតឡើយ គ្រាន់តែខូចខាតតែរោងកាហ្វេ និងសម្ភារៈមួយចំនួនត្រូវលិចចូលក្នុងទន្លេបាត់ ។
ទន្ទឹមនឹងនោះដែរ លំនៅឋានស្នាក់អាស្រ័យរបស់លោកដែលនៅជាប់នៅរោងកាហ្វេនោះ ក៏ប្រឈមនឹងការបាក់ស្រុតចូលទន្លេផងដែរ ព្រោះសណ្ឋានដីនៅទីនោះ មានលក្ខណៈទន់ជ្រាយ ជាពិសេសផ្ទៃការ៉ូឡា គឺមានការប្រេះស្រាំងខ្លាំងផងដែរ ដែលជាហេតុអាចបង្កឱ្យមានការបាក់រលំនៅឋានចូលទន្លេដោយថាហេតុណាមួយ ។
គួរបញ្ជាក់ថា ទីតាំងកាហ្វេខាងលើនេះ គឺមានលក់កាហ្វេតាំងពីព្រឹកដល់ល្ងាច ហើយក៏មានបាយថ្ងៃត្រង់លក់ពិសាផងដែរ ។ ចំពោះបងប្អូនអ្នកដែលនិយមទៅពិសានៅទីនោះ តែងនាំគ្នាហៅកន្លែងនោះថា «កាហ្វេច្រាំងបាក់» ព្រោះនៅទីនោះស្ថិតជាប់មាត់ច្រាំង ហើយតំបន់នោះ គឺឧស្សាហ៍បាក់ច្រាំង ទើបគេហៅថា តំបន់ច្រាំងបាក់ ហើយកាហ្វេខាងលើក៏ត្រូវបានគេហៅថា កាហ្វេច្រាំងបាក់តែម្តងទៅ ៕ (កែសម្រួលដោយ ៖ បុប្ផា)
ចែករំលែកព័តមាននេះ