រាជធានីភ្នំពេញ ៖ ចាប់តាំងពីអ្នកនាង យិន ស្រីពៅ មានឱកាសបង្ហាញវត្តមាននៅលើការងារមនុស្សធម៌ជួយដល់តារាៗមានបញ្ហាផ្សេងៗមកឃើញថា អ្នកនាងក៏រឹតតែធ្វើឲ្យគេចងចាំពីកាយវិការចេះជួយគ្នាក្នុងគ្រាលំបាកពេលសិល្បៈជួបទុក្ខ។ ព្រោះតែធ្លាប់មានជីវិតលំបាកក្នុងការតស៊ូលើសិល្បៈអ្នកនាងមិនចោលឡើយ ការងារឲ្យតែបានសម្រាលរឿងផ្សេងៗរបស់សិល្បករ គឺរមែងជួយបំផុសបំផុលរកសប្បុរសជននានា។
បើទោះជាពេលខ្លះយិន ស្រីពៅ ជួបការលំបាកក្នុងការស្កាត់រកជំនួយជួយដល់សិល្បករមានទុក្ខព្រួយ ក៏អ្នកនាងនៅតែបោះជំហរទៅមុខជាមួយមិត្តៗរួមក្រុមការងារ ទោះពេលខ្លះសុខភាពមិនអំណោយផលច្រើនក៏ដោយ។
ជាក់ស្តែងថ្មីៗនេះ អ្នកនាងបានស្ទុះស្ទាររកជំនួយពីសប្បុរសជននានាជួយដល់តារាចម្រៀងភេទទី៣ អ៊ុក ដារ៉េត ដែលម្តាយកើតជំងឺមហារីកដំណាក់កាលចុងក្រោយបានខ្លះមកព្យាបាល បើទោះមិនបានជួយឲ្យម្តាយតារារូបនោះរស់រានជីវិតក៏ដោយ។
អ្នកនាងយិន ស្រីពៅ បានបញ្ជាក់ថា អ្នកនាងមិនមើលរំលងចំពោះរាល់ការលំបាករបស់បងប្អូនសិល្បៈនោះទេ ដោយរូបភាពណាអាចជួយបាន គឺត្រូវតែជួយ។ អ្នកនាងមិនមានធន់ធានអ្វីច្រើនដូចគេទេ តែការជួយពាំនាំដំណឹងដល់សប្បុរសជនឃើញថា គេជួយជាបន្តបន្ទាប់។
នាងមិនបានតាំងចិត្តយកមុខមាត់តែឯងនោះទេ ហើយក៏សប្បាយចិត្តដែលឃើញសិល្បករទាំងអស់ចេះជួយគ្នាតិចតួចបែបណា គឺនាំគ្នាជួយ។ ជាក់ស្តែងដូចជាបងប្រុសអ៊ឹម ជីវ៉ា គ្រាន់តែដឹងម្តាយតារាភេទទី៣ អ៊ុក ដារ៉េត ទទួលមរណភាពឃើញថា លោកបានខ្នះខ្នែងប្រឹងប្រែងអំពាវនាវភ្លាមៗ ដើម្បីសម្រាលការខ្វះខាតនេះជាកាយវិការល្អរបស់សិល្បៈយើង។ (កែសម្រួលដោយ ៖ បុប្ផា)
ចែករំលែកព័តមាននេះ