ខេត្តពោធិ៍សាត់ ៖ ស្របពេលដែលពុទ្ធសាសនិកជនខ្មែរនៅទូទាំងប្រទេសកំពុងប្រារព្ធពិធីបុណ្យកាន់បិណ្ឌ ភ្ជុំបិណ្ឌ ក្នុងប្រទេសដែលមានសុខសន្តិភាពនិងការអភិវឌ្ឍន៍លើគ្រប់វិស័យនេះ កាលពីព្រឹកថ្ងៃទី២៦ ខែកញ្ញា ឆ្នាំ២០១៩ លោក ស៊ុយ សែម រដ្ឋមន្ត្រីក្រសួងរ៉ែនិងថាមពល ព្រមទាំងលោកជំទាវបាននាំយកភេសជ្ជៈ គ្រឿងឧបភោគបរិភោគ និងទេយ្យវត្ថុមួយចំនួនទៀត ទៅចូលរួមកាន់បិណ្ឌវេនទី១៣ ជាមួយពុទ្ធបរិស័ទចំណុះជើងវត្តហង្សាបីតិ ហៅវត្តព្រែកស្ដី ស្ថិតក្នុងសង្កាត់លលកស ក្រុងពោធិ៍សាត់ និងវត្តពុទ្ធារាម ហៅវត្តភូមិស្ទឹង ស្ថិតក្នុងឃុំកណ្ដៀង ស្រុកកណ្ដៀង ខេត្តពោធិ៍សាត់។
លោក ស៊ុយ សែម និងលោកជំទាវបានធ្វើពិធីបង្សុកូលនិងពិធីរាប់បាត្រ ឧទ្ទិសកុសលផលបុណ្យជូនទៅដល់លោកអ្នកមានគុណដែលបានលាចាកលោកទៅហើយនោះ។ ពិធីបុណ្យនេះត្រូវបានពុទ្ធសាសនិកខ្មែរធ្វើឡើងជារៀងរាល់ឆ្នាំចាប់ពីថ្ងៃ១រោចដល់ថ្ងៃ១៥រោច ខែភទ្របទ ដោយការយកទេយ្យទានផ្សេងៗ មានដូចជាអាហារ នំចំណី និងសម្ភារៈប្រើប្រាស់ជាដើម ទៅផ្គត់ផ្គង់ដល់ព្រះសង្ឃ នៅក្នុងវត្តដែលកំពុងគង់ចាំវស្សាក្នុងរយៈពេលមួយត្រីមាស។ ក្នុងរយៈពេល១៤ថ្ងៃដែលគេហៅថាបុណ្យកាន់បិណ្ឌឬបុណ្យដាក់បិណ្ឌ ចំណែកថ្ងៃ១៥រោចដែលជាថ្ងៃចុងក្រោយនោះ ពុទ្ធសាសនិកគ្រប់វេនទាំងអស់បានមកជួបជុំគ្នាធ្វើទានចំពោះព្រះសង្ឃ ដើម្បីបញ្ចប់បុណ្យកាន់បិណ្ឌនោះ គេហៅថាបុណ្យភ្ជុំបិណ្ឌ។
ពិធីបុណ្យភ្ជុំបិណ្ឌនេះធ្វើឡើងដើម្បីឧទ្ទិសកុសលផលបុណ្យជូនដល់ដួងវិញ្ញាណក្ខន្ធអ្នកមានគុណទាំងឡាយមានមាតាបីតា ជីដូនជីតា ញាតិការទាំង៧សន្តាន ដែលបានចែកឋានទៅហើយនោះ និងដើម្បីឧទ្ទិសដល់វិញ្ញាណក្ខន្ធ យុទ្ធជន យុទ្ធនារី ដែលបានលះបង់ជីវិត ដើម្បីបុព្វហេតុជាតិមាតុភូមិ និងប្រជាពលរដ្ឋដែលបានបាត់បង់ជីវិតក្នុងរបបប៉ុលពត ក៍ដូចពពួកប្រែតទាំងឡាយផងដែរ។
ក្នុងពិធីវេនកាន់បិណ្ឌទី១៣នេះដែរ ស៊ុយ សែម និងលោកជំទាវ បានប្រគេនទេយ្យវត្ថុដល់វត្តទាំងពីរ ក្នុងមួយវត្តរួមមាន សាដក អង្ករ១០០គីឡូក្រាម, មី២កេសធំ, នំធុង២ធុង, ស្កសរ១០០គីឡូក្រាម, ប្រេងឆា១ធុង, ម្ស៉ៅសាប៊ូ៤កេស, ទឹកក្រូច៥កេស, ទឹកបរិសុទ្ធ៥កេស, ផ្លែឈើ៥មុខ និងបច្ច័យចំនួន២លានរៀល។
សំណេះសំណាលជាមួយព្រះសង្ឃនិងពុទ្ធបរិស័ទក្នុងឱកាសនោះដែរ លោករដ្ឋមន្ត្រី ស៊ុយ សែម បានថ្លែងថា យើងបានមកជួបជុំគ្នាធ្វើបុណ្យនៅក្នុងវត្ត និងបានកសាងប្រទេសរីកចំរើនយ៉ាងឆាប់រហ័សបែបនេះ គឺដោយសារប្រទេសជាតិមានសុខសន្តិភាព និងសូមឲ្យលោកយាយ លោកតានិងប្រជាពលរដ្ឋថែរក្សាសុខភាព ព្រមទាំងបញ្ជូនកូនចៅទៅរៀនឲ្យបានគ្រប់ៗគ្នា អប់រំពួកគេឲ្យខិតខំរៀនសូត្រនិងចៀសឲ្យឆ្ងាយពីគ្រឿងញៀន ដើម្បីជាទំពាំងស្នងឫស្សីនៃប្រទេសជាតិ។
ក្នុងឱកាសនោះដែរ លោករដ្ឋមន្ត្រីស៊ុយ សែម និងលោកជំទាវបានចែកក្រណាត់ស អាវយឺត សាប៊ូ និងថវិការមួយចំនួនដល់លោកយាយលោកតា ពុទ្ធបរិស័ទ កងកម្លាំងប្រដាប់អាវុធ និងប្អូនៗយុវជនដែលចូលរួមវេនកាន់បិណ្ឌទី១៣នោះ សរុបប្រមាណ៤០០នាក់ផងដែរ៕ (កែសម្រួលដោយ ៖ ធីតា)
ចែករំលែកព័តមាននេះ