រាជធានីភ្នំពេញ ៖ បើយើងធ្វើដំណើរតាមបណ្តោយផ្លូវជាតិលេខ២ ពីទីរួមខេត្តតាកែវ ឆ្ពោះទៅច្រកព្រំដែន អន្តរជាតិកម្ពុជា វៀតណាម (ភ្នំដិន) លុះជិតដល់ផ្សារកំពង់ជ្រៃស្ថិតក្នុងឃុំស្មោង ស្រុកទ្រាំង ខេត្តតាកែវ គេនឹងឃើញមានតូបជាច្រើនដំបូលប្រក់ស្លឹកសង់តាមផ្លូវជាតិ ហើយមានតាំងសំណាញ់ និងមងព្រមទាំងសម្ភារៈផ្សេងៗជាច្រើនទៀតសម្រាប់បម្រើការនេសាទ ។
បងប្អូនខ្មែរឥស្លាមដែលរស់នៅភូមិត្រពាំងលើ និងភូមិកំពង់ជ្រៃ ឃុំស្មោង ស្រុកទ្រាំង ខេត្តតាកែវ បានចាប់យកមុខរបចាក់សំណាញ់ និងមងលក់អស់រយៈពេលជាច្រើនឆ្នាំមកហើយ ។
អ្នកស្រីអ៊ី ស៊ុំ អាយុ៤៨ឆ្នាំ ជនជាតិឥស្លាម មានទីលំនៅភូមិកំពង់ជ្រៃ ឃុំស្មោង ស្រុកទ្រាំង បានរៀបរាប់ឲ្យដឹងថា គាត់បានប្រកបមុខរបរចាក់សំណាញ់ និងមងនេះអស់រយៈពេលជាង២០ឆ្នាំមកហើយ ។ គាត់ចេះមុខរបរនេះតពីឪពុកម្តាយ ។ មុខរបរនេះមិនអាចធ្វើមានបានឡើយ ។ វាត្រឹមតែចិញ្ចឹមឆ្នាំងមួយថ្ងៃសម្រាប់មួយថ្ងៃតែប៉ុណ្ណោះ ។ អ៊ី ស៊ុំ បានបញ្ជាក់ថា ដើមទុនក្នុងការចាក់សំណាញ់ និងមងសម្រាប់តាំងលក់នេះប្រហែលជាង មួយពាន់ដុល្លារ ។ សំណាញ់មួយត្រូវចំណាយជិត១០ម៉ឺនរៀលហើយប្រើពេលពីពីរទៅបួនថ្ងៃទើបចាក់រួចបានសំណាញ់មួយ ។ ឆ្នាំនេះលក់មិនសូវដាច់ទេ ។ បីបួនថ្ងៃលក់បានសំណាញ់មួយ ជួនកាលលក់បានមងមួយ ហើយថ្ងៃណាស៊យលក់មិនបានមួយរៀលក៏មានដែរ ។
ដោយសារតែគាត់ និងប្តីមិនមានដីស្រែធ្វើនឹងគេទើបគាត់ចាប់យកមុខរបរលក់មងសំណាញ់ជាជាងនៅទំនេរម្យ៉ាងវិញទៀតមិនចង់ឲ្យប្តីទៅរកស៊ីឆ្ងាយពីផ្ទះ ។ ជាមួយនឹងដៃកំពុងចាក់សំណាញ់ ជនជាតិឥស្លាមឈ្មោះ រ៉ូហ្សា យ៉ាស់ អាយុ២៨ឆ្នាំ មានកូនបីបាននិយាយថា បច្ចុប្បន្នគាត់គ្មានដីធ្វើស្រែនោះទេ ។ ពីរនាក់ប្តីប្រពន្ធនាំគ្នាចាប់យកមុខរបរចាក់សំណាញ់ និងមងលក់នៅទីតាំងខាងលើជាង១០ឆ្នាំមកហើយ ចំណាយដើមទុនប្រមាណជា១៥០០ដុល្លារ ។
ជារៀងរាល់ព្រឹកគាត់ពីរនាក់ប្តីប្រពន្ធមករៀបចំមងសំណាញ់ និងសម្ភារផ្សេងៗ ដើម្បីឲ្យអតិថិជនដែលមករកទិញ ។ ក្នុងមួយថ្ងៃគាត់លក់បានសំណាញ់ពីមួយទៅពីរសំណាញ់ដែរ រីឯតម្លៃចាប់ពី១៣ម៉ឺនទៅ១៥ម៉ឺនរៀល ។ សំណាញ់មួយគាត់ត្រូវប្រើពេលវេលាបីថ្ងៃទើបចាក់ហើយព្រោះរង្វង់ធំ ។ គាត់និយាយបន្ថែមថា ការប្រកបមុខរបរចាក់សំណាញ់និងមងនេះមានថ្ងៃខ្លះរកលុយទិញបាយឲ្យកូនហូបមិនបានផងព្រោះលក់មិនសូវដាច់ ។ បញ្ហាធំជាងគេ គឺមិនសូវមានទឹកបឹងបួរព្រែកបានជា គ្មានអ្នកទិញ ។ អ្នកស្រីរ៉ូហ្សាយ៉ាស់បានដកដង្ហើមវែង ហើយក៏និយាយបន្ថែមទៀតថា ពីរប្តីប្រពន្ធរបស់គាត់ចង់ផ្លាស់ប្តូមុខរបរលក់មងសំណាញ់នេះដែរ តែមិនដឹងចាប់យកមុខរបរណាផ្សេងទេព្រោះជាប្រពៃណីរបស់ជនជាតិឥស្លាមតកូនតចៅមក ។
ម្យ៉ាងវិញទៀតមិនអាចឈប់លក់បានឡើយដោយសារកប់ដើមជាង១០០០ដុល្លារ ក្នុងការទិញសំណាញ់ និងសម្ភារៈផ្សេងៗទៀតដាក់លក់នេះឯង ។ ដូច្នេះទោះបាន ឬមិនបានក៏ត្រូវតែលក់បន្តគាត់ក៏មិនចង់ធ្វើចំណាកស្រុកដែរ ។ អ្នកស្រីសុំឲ្យអាជ្ញាធរមូលដ្ឋានជួយរកទីផ្សារលក់មងសំណាញ់ ដល់ពួកគាត់មិនដូច្នេះទេមុខរបរនេះនឹងបាត់បង់ជាមិនខានដោយលក់មិនសូវដាច់តែម្តង ។
លោកអ៊ុំប្រុសគឹម ឡុង ស្ថិតក្នុងវ័យជាង៦០ឆ្នាំ មានទីលំនៅអង្គតាសោម ស្រុកត្រាំកក់ ខេត្តតាកែវ ដែលបានយកសំណាញ់រហែកមកឲ្យបងប្អូនឥស្លាមជួយដេរបានប្រាប់ថា ៖ ជារៀងរាល់ឆ្នាំគាត់តែងតែយកសំណាញ់ដែលរហែកមកឲ្យបងប្អូនឥស្លាមដេរ ។ ពេលខ្លះក៏ជួយទិញសំណាញ់ពីរបីយកទៅលក់បន្តនៅឯស្រុកផងដែរ ។
មន្ត្រីសាលាឃុំស្មោងមួយរូបនិយាយថា ៖ បងប្អូនឥស្លាមដែលមកពីភូមិកំពង់ជ្រៃ និងភូមិ ត្រពាំងលើបាននាំគ្នាប្រកបមុខរបរចាក់សំណាញ់មង និងសម្ភារៈផ្សេងៗសម្រាប់ការនេសាទនៅទីតាំង ខាងលើសរុបជាង៦០តូប សង់តាមបណ្តោយផ្លូវជាតិលេខ២ ក្នុងភូមិសាស្ត្រស្រុកទ្រាំង ។
អាជ្ញាធរមិនតម្រូវឲ្យបងប្អូនបង់ប្រាក់អ្វីនោះឡើយ តែបងប្អូនទាំងនោះសុទ្ធតែជួលដីគេធ្វើតូបលក់ហើយបង់ប្រាក់ប្រចាំឆ្នាំឲ្យទៅម្ចាស់ដីតែប៉ុណ្ណោះ ។ បច្ចុប្បន្នយើងសង្កេតឃើញថា មុខរបរលក់សម្ភារៈនេសាទរបស់បងប្អូនឥស្លាមបានត្រឹមតែចិញ្ចឹមឆ្នាំងប៉ុណ្ណោះ ។ អាជ្ញាធរមូលដ្ឋានមានគម្រោងយករឿងនេះទៅពិភាក្សាជាមួយថ្នាក់ស្រុក ហើយអាជ្ញាធរក៏មិនចង់ឲ្យបាត់បង់មុខរបរលក់សម្ភារៈនេសាទដែលបងប្អូនខ្មែរឥស្លាមធ្វើដោយផ្ទាល់ដៃនេះដែរ ៕ កែសម្រួលដោយ ៖ សុឃាក់
ចែករំលែកព័តមាននេះ