លោក Satya Nadella ដែលជានាយកប្រតិបត្តិរបស់ក្រុមហ៊ុន Microsoft បានចំណាយពេលវេលាច្រើនជាង ២០ឆ្នាំទៅទៀតក្នុងការធ្វើការឲ្យក្រុមហ៊ុននេះ ។ ដោយហេតុដូចនេះ លោកមានពេលជាច្រើនក្នុងការឈ្វេងយល់ពីកត្តាដែលធ្វើឲ្យមនុស្សក្លាយជាអ្នកដឹកនាំល្អមួយរូប…
លោក Satya Nadella ដែលជានាយកប្រតិបត្តិរបស់ក្រុមហ៊ុន Microsoft បានចំណាយពេលវេលាច្រើនជាង ២០ឆ្នាំទៅទៀតក្នុងការធ្វើការឲ្យក្រុមហ៊ុននេះ ។ ដោយហេតុដូចនេះ លោកមានពេលជាច្រើនក្នុងការឈ្វេងយល់ពីកត្តាដែលធ្វើឲ្យមនុស្សក្លាយជាអ្នកដឹកនាំល្អមួយរូប ។ កាលពីខែកុម្ភៈ ឆ្នាំ ២០១៩ កន្លងមកនៅ Mobile World Congress (MWC) លោកបានចែករំលែកពីគុណសម្បត្តិបីធំៗដែលអ្នកដឹកនាំល្អត្រូវតែមាន។
១. ចេះផ្តល់ភាពច្បាស់លាស់ ៖ ក្នុងស្ថានការដែលមានវិបត្តិ ឬភាពជ្រួលច្របល់ មនុស្សដទៃតែងតែងាកទៅរក និងគោរពអ្នកដែលមានសមត្ថភាពក្នុងការផ្តល់ភាពជាក់លាក់ និងជួយធ្វើឲ្យស្ថានការស្ងប់ស្ងាត់ឡើងវិញ ។ លោក Nadella បានបកស្រាយថា អ្នកដឹកនាំមានសមត្ថភាពដ៏អស្ចារ្យមួយក្នុងការនាំយកភាពច្បាស់លាស់ក្នុងស្ថានការដែលច្របូកច្របល់ និងពោរពេញដោយភាពមិនប្រាកដប្រជា ។
២. ចេះបង្កើតកម្លាំង៖ ការផ្តល់ភាពច្បាស់លាស់ពិតជាសំខាន់ក្នុងស្ថានការដែលពោរពេញទៅដោយភាពមិនប្រាកដប្រជា ប៉ុន្តែអ្នកដឹកនាំក៏ត្រូវមានចិត្តស្រលាញ់ការងារដែលពួកគេកំពុងតែធ្វើដោយស្មោះអស់ពីចិត្តដែរព្រោះកត្តានេះជំរុញទឹកចិត្តឲ្យមនុស្សជុំវិញខ្លួនមានកម្លាំងក្នុងការធ្វើការ ។ លោក Nadella បានបន្តថា អ្នកដឹកនាំបង្កើតកម្លាំង ។ ប្រសិនបើអ្នកអាចបំពេញការងារបានល្អ នោះក្រុមការងារអ្នកក៏អាចបំពេញការងារបានល្អដូចគ្នាដែ រ។
៣. ចេះបង្កើតភាពជោគជ័យក្នុងគ្រប់ស្ថានការ៖ មនុស្សមិនជោគជ័យក្នុងរយៈពេលមួយយប់ទេ ។ ហើយទោះជាអ្នកបានជោគជ័យពិតមែនក៏អ្នកនៅតែជួបបញ្ហាទៀតដែរ ។ ប៉ុន្តែអ្នកដឹកនាំជាមនុស្សដែលចេះបង្កើតភាពជោគជ័យក្នុងគ្រប់ស្ថានការ ។ ពួកគេមិនដែលរងចាំរហូតដល់ឱកាសត្រូវបានហុចឲ្យទេ ។ ផ្ទុយមកវិញអ្នកដឹកនាំជាមនុស្សដែលស្វែងរកមូលហេតុ និងកត្តាដែលបង្កើតភាពជោគជ័យ ។ ហើយចំណុចទាំងបីខាងលើនេះគឺជាគុណសម្បត្តិដែល Microsoft តែងតែពិចារណាលើពេលដែលជ្រើសរើសបុគ្គលិក ៕ កែសម្រួលដោយ ៖ សុឃាក់
ចែករំលែកព័តមាននេះ