មហាសន្និបាតអ.ស.ប ៖ មានសកម្មភាពការទូតជាច្រើនកាលពីយប់ថ្ងៃទី២៤កញ្ញា នៅក្រុងញូវយ៉ក ក្នុងក្ដីសង្ឃឹមដល់ការជួបគ្នាមួយរវាងលោកដូណាល់ត្រាំ និងប្រធានាធិបតីអ៊ីរ៉ង់លោកហាសាន់រ៉ូហានី និងកាត់បន្ថយភាពតានតឹងរវាងក្រុងវ៉ាស៊ិនតោននិងក្រុងតេហេរ៉ង់។
ទោះបីមេដឹកនាំអាមេរិកនិងអ៊ីរ៉ង់អះអាងជាថ្មី ពីការខ្វែងគំនិតគ្នាក្ដីតែមេដឹកនាំទាំង២ក៏មិនបានបដិសេធ ដោយម៉ឺងម៉ាត់ការជួបគ្នានោះដែលប្រធានាធិបតីបារាំង លោកអេមម៉ានុយអែលម៉ាក្រុននៅតែមានជំនឿជាក់ដែរ។
ប្រធានាធិបតីអាមេរិកលោកដូណាល់ត្រាំថ្លែងថា ពួកយើងចង់ចរចាព្រោះនោះជារឿងល្អ តែយើងនៅមិនទាន់មានការព្រមព្រៀងគ្នានៅឡើយ។ ចំណែកប្រធានាធិបតីអ៊ីរ៉ង់លោកហាសាន់រ៉ូហានីវិញ អះអាងតាមទូរទស្សន៍FOX NEWSថា លោកត្រាំត្រូវបង្កើតបរិយាកាសជឿទុកចិត្តគ្នាទៅវិញទៅមកមួយ ប្រសិនបើលោកពិតជាចង់ឲ្យមានការចរចាដោយពិតប្រាកដមែន។
ប៉ុន្តែលោករំឭកថាគឹលោកត្រាំដែលជាអ្នកសម្រេចលើការដកខ្លួនថយរបស់អាមេរិក ចេញពីកិច្ចព្រមព្រៀងនុយក្លេអ៊ែរអ៊ីរ៉ង់ដែលទំរាំសម្រេចបាន ត្រូវឆ្លងកាត់ការចរចាជាច្រើនឆ្នាំ។ ប៉ុន្តែប្រសិនបើទំនុកចិត្តត្រូវបានស្ដារឡើងវិញ តាមរយៈការសម្រាលទណ្ឌកម្មអាមេរិក លោកហាសាន់ថាលោកត្រៀមចរចាពីកិច្ចព្រមព្រៀងដទៃៗទៀតជាមួយសហរដ្ឋអាមេរិក។
ពេលជួបជាមួយលោករ៉ូហានី ប្រធានាធិបតីបារាំងបានស្នើឲ្យលោកចាប់យកឱកាសដែលមានតែមួយនេះ។ លោកម៉ាក្រុនថាប្រសិនបើមេដឹកនាំអីុរ៉ង់ចាកចេញពីទឹកដីអាមេរិក ដោយមិនបានជួបជាមួយលោកត្រាំនោះនឹងជាការបាត់បង់ឱកាសមួយ ព្រោះវាមិនអាចកើតមានទៀតមុនពេលច្រើនខែឡើយ។
កាលពីព្រឹកថ្ងៃទី២៤កញ្ញានៅមុខតំណាងរបស់ប្រទេស១៩៣ជាសមាជិកអ.ស.ប ប្រមុខសេតវិមានជាម្ចាស់ផ្ទះ បានបង្កើនការព្រមានចំពោះអីុរ៉ង់ដោយគ្មាននិយាយពីផ្លូវថ្មីៗឡើយ៕ (កែសម្រួលដោយ ៖ បុប្ផា)
ចែករំលែកព័តមាននេះ