រាជធានីភ្នំពេញ ៖ ជនសង្ស័យម្នាក់ត្រូវកម្លាំងនគរបាលប៉ុស្តិ៍ចាក់អង្រែក្រោម ចុះអន្តរាគមន៍ធ្វើការឃាត់ខ្លួនភ្លាមៗ បន្ទាប់ពីជនសង្ស័យបានធ្វើសកម្មភាពប្លន់ ដោយប្រើប្រាស់កូនកាំបិតចិតបន្លែមុតស្រួចភ្ជង់យុវតីជាសិស្សវិទ្យាល័យម្នាក់យកម៉ូតូ និងទ្រព្យសម្បត្តិ តែមិនបានសម្រេច បង្កអោយមានការភ្ញាក់ផ្អើលឡើងនៅចំណុចមុខខ្លោងទ្វារវិទ្យាល័យចាក់អង្រែក្រោម តាមបណ្តោយផ្លូវជាតិលេខ២…
រាជធានីភ្នំពេញ ៖ ជនសង្ស័យម្នាក់ត្រូវកម្លាំងនគរបាលប៉ុស្តិ៍ចាក់អង្រែក្រោម ចុះអន្តរាគមន៍ធ្វើការឃាត់ខ្លួនភ្លាមៗ បន្ទាប់ពីជនសង្ស័យបានធ្វើសកម្មភាពប្លន់ ដោយប្រើប្រាស់កូនកាំបិតចិតបន្លែមុតស្រួចភ្ជង់យុវតីជាសិស្សវិទ្យាល័យម្នាក់យកម៉ូតូ និងទ្រព្យសម្បត្តិ តែមិនបានសម្រេច បង្កអោយមានការភ្ញាក់ផ្អើលឡើងនៅចំណុចមុខខ្លោងទ្វារវិទ្យាល័យចាក់អង្រែក្រោម តាមបណ្តោយផ្លូវជាតិលេខ២ ក្នុងសង្កាត់ចាក់អង្រែក្រោម ខណ្ឌមានជ័យ កាលពីវេលាម៉ោង១០ព្រឹកថ្ងៃទី២៥ ខែកញ្ញា ឆ្នាំ២០១៩នេះ ។
ជនសង្ស័យឈ្មេាះ ឡៅ ម៉េងលាង ភេទប្រុស អាយុ២៨ឆ្នាំ មុខរបរមិនពិតប្រាកដ មានទីលំនៅក្នុងភូមិអូរអណ្តូង សង្កាត់ព្រែកប្រា ខណ្ឌច្បារអំពៅ ។ ចំណែកយុវតីរងគ្រេាះឈ្មេាះ គង់ រក្សា អាយុ១៨ឆ្នាំ ជាសិស្សថ្នាក់ទី១២នៃវិទ្យាល័យចាក់អង្រែក្រោម ទើបតែប្រឡងជាប់សញ្ញាមធ្យមសិក្សាទុតិយភូមិ មានទីលំនៅក្នុងភូមិព្រែកតាឡុង សង្កាត់ចាក់អង្រែក្រោម ខណ្ឌមានជ័យ ។
តាមប្រភពព័ត៌មានអោយដឹងថា នៅមុនពេលកើតហេតុ យុវតីរងគ្រេាះបានទៅវិទ្យាល័យដើម្បីដកសញ្ញាប័ត្រ ដែលទើបនឹងប្រឡងជាប់ ដោយក្នុងវិទ្យាល័យពំុសូវមានសិស្សានុសិស្សទៅរៀនច្រើនឡើយ ព្រេាះកៀកថ្ងៃភ្ជុំបិណ្ឌ ។
តាមប្រភពព័ត៌មានបានបន្តថា លុះដល់វេលាកើតហេតុខាងលើ យុវតីរងគ្រេាះបានចាកចេញពីវិទ្យាល័យក្នុងបំណងត្រឡប់ទៅផ្ទះវិញ ដោយជិះម៉ូតូមួយគ្រឿងម៉ាកស៊ុយហ្សុ៊យគីនិច ពណ៌លឿង ពាក់ស្លាកលេខភ្នំពេញ ១FJ-០៩៤០ និងមានស្ពាយកាបូបជាប់នឹងដៃផងដែរ ប៉ុន្តែពេលជិះមិនទាន់ចេញផុតពីវិទ្យាល័យផងនេាះ ស្រាប់តែមានជនសង្ស័យម្នាក់ខាងលើដើរមកកាក់ពីខាងមុខម៉ូតូរបស់នាង រួចយកកូនកាំបិតចិតបន្លែចុងស្រួចមួយដើមភ្ជង់គំរាមកំុអោយយុវតីរងគ្រេាះស្រែក ព្រមទាំងគំរាមអោយនាងចុះពីលើម៉ូតូ និងប្រគល់កាបូបលុយអោយគេតាមសម្រួល បើពំុដូច្នេះទេ គេនឹងចាក់សម្លាប់ ។ ភ្លាមនេាះ យុវតីរងគ្រេាះបាន ចុះពីលើម៉ូតូ រួចស្រែកឆោឡោយ៉ាងខ្លាំង បង្កអោយមានការភ្ញាក់ផ្អើលដល់ប្រជាពលរដ្ឋដែលនៅក្បែរនេាះ នាំគ្នាស្ទុះទៅជួយ និងចាប់ឃាត់ជនសង្ស័យបានភ្លាមៗតែម្តង ។
ភ្លាមៗនេាះដែរ គេឃើញកម្លាំងនគរបាលមូលដ្ឋានបានចុះអន្តរាគមន៍ដល់ទីតាំងកើតហេតុ និងនាំខ្លួនជនសង្ស័យទៅកាន់ប៉ុស្តិ៍រដ្ឋបាលនគរបាលចាក់អង្រែក្រោម ដើម្បីសាកសួរនាំបន្ថែម ។ ទន្ទឹមនឹងនេាះសមត្ថកិច្ចក៏បានណែនាំអោយជនរងគ្រេាះទៅដាក់ពាក្យបណ្តឹងនៅប៉ុស្តិ៍នគរបាលផងដែរ ។
នាយប៉ុស្តិ៍ចាក់អង្រែក្រោម លោកវុឌ្ឍ ផូសារវ័ន្ត អោយដឹងថា នៅចំពេាះមុខសមត្ថកិច្ច ជនសង្ស័យបានឆ្លើយសារភាពថា មូលហេតុដែលខ្លួនសម្រេចចិត្តធ្វើដូចនេះ គឺដោយសារខ្លួនជំពាក់លុយគេច្រើនពេក រហូតដល់ជិត៣ពាន់ដុល្លារ ហើយគ្មានលទ្ធភាពរកលុយសងគេវិញ ទើបធ្វើសកម្មភាពប្លន់បែបនេះតែម្តងទៅ ។
បច្ចុប្បន្នជនសង្ស័យត្រូវបានសមត្ថកិច្ចឃាត់ខ្លួនបណ្តេាះអាសន្ននៅប៉ុស្តិ៍រដ្ឋបាលនគរបាលចាក់អង្រែក្រោម រង់ចាំកសាងសំណំុរឿងបញ្ចូនទៅតុលាការដើម្បីចាត់ការតាមនីតិវិធីនៅពេលក្រោយ ៕ (កែសម្រួលដោយ ៖ ធីតា)
ចែករំលែកព័តមាននេះ