ឃុំចំនួន៣ក្នុងស្រុកក្រឡាញ់ទទួលរងគ្រោះដោយសារទឹកជំនន់ជន់លិច
- សៀមរាប
ខេត្តសៀមរាប ៖ លោកសៀង ណាំ តំណាងរាស្ត្រមណ្ឌលសៀមរាប និងជាប្រធានក្រុមការងារថ្នាក់ខេត្តចុះជួយស្រុកក្រឡាញ់ និងលោកស្រី ម៉ននី រង្សី អភិបាលស្រុកក្រឡាញ់…
ខេត្តសៀមរាប ៖ លោកសៀង ណាំ តំណាងរាស្ត្រមណ្ឌលសៀមរាប និងជាប្រធានក្រុមការងារថ្នាក់ខេត្តចុះជួយស្រុកក្រឡាញ់ និងលោកស្រី ម៉ននី រង្សី អភិបាលស្រុកក្រឡាញ់ បានដឹកនាំក្រុមការងារជុំវិញស្រុកចុះពិនិត្យស្ថានភាពទឹកជំនន់ក្នុងតំបន់មួយចំនួន ក្នុងស្រុកក្រឡាញ់ ដែលរងផលប៉ះពាល់ចំនួន៣ឃុំ នារសៀលថ្ងៃទី២៤ ខែកញ្ញានេះ។
លោកស្រី ម៉ននី រង្សី អភិបាលស្រុកក្រឡាញ់បានមានប្រសាសន៍ថា មានឃុំចំនួន៣ក្នុងស្រុកក្រឡាញ់បានទទួលរងគ្រោះដោយសារទឹកជំនន់ជន់លិចដែលបណ្ដាលធ្វើឲ្យប៉ះពាល់ដល់ដំណាំស្រូវរបស់ប្រជាពលរដ្ឋ និងខូចខាតផ្លូវលំមួយចំនួនក្នុងនោះ នៅឃុំក្រូចគរ បានដាច់ស្ពានចំនួន១កន្លែង មានប្រវែង២០ម៉ែត្រ ទឹកហូរកាត់ផ្លូវលំប្រវែង៣០០ម៉ែត្រ និង លិចស្រូវវស្សាចំនួន៤០០ហិកតា ២.ឃុំស្នួល លិចស្រូវវស្សាប្រហែលចំនួន៥៥០ហិកតា និងទឹកហូរកាត់ផ្លូវប្រវែង១.៣០០ម៉ែត្រ និងនៅឃុំចន្លាស់ដៃទឹកជំនន់បានស្រកខ្លះវិញហើយ ។
លោកស្រី ម៉ននី រង្សី បានមានប្រសាសន៍បន្តថា ក្នុងខណៈពេលដែលស្រុកក្រឡាញ់កំពុងទទួលរងគ្រោះដោយសារទឹកជំនន់នេះ បច្ចុប្បន្ននេះរដ្ឋបាលស្រុកបាននឹងកំពុងយកចិត្តទុកដាក់តាមដានសភាពការណ៍គ្រោះមហន្តរាយនានាក្នុងស្រុក ។ ក្នុងនោះដែរលោក លោកសៀង ណាំ ក៏បានចុះដល់ទីតាំង ដែលជន់លិចផ្ទាល់ភ្លាមៗផងដែរ នៅភូមិព្រៃខ្យង និងភូមិរើល ក្នុងឃុំក្រូចគរ និង បន្តចុះពិនិត្យស្ថានភាពទឹកជំនន់នៅភូមិព្រៃល្ងៀង ក្នុងឃុំស្នួល ដើម្បីពិភាក្សាគ្នា និងរិះរកវិធានការនានាជួយដល់ប្រជាពលរដ្ឋក្នុងករណីចាំបាច់ ។
គួររំលឹកថា ពាក់ព័ន្ធនឹងទឹកជំនន់នេះនៅក្នុងស្រុកអង្គរជុំ បន្ទាប់ពីមានភ្លៀងធ្លាក់ខ្លាំងជាប់ៗគ្នាប៉ុន្មានថ្ងៃកន្លងមកនេះបានបង្កឲ្យមានទឹកជំនន់កើតឡើង ចាប់តាំងពីម៉ោង៨យប់ ថ្ងៃទី២៣ ខែកញ្ញានេះ ដោយបានធ្វើឲ្យលិចសាលារៀន មន្ទីរពេទ្យ ផ្សារ ផ្ទះប្រជាពលរដ្ឋ និងផ្លូវ ពិសេសបានធ្វើឱ្យផ្ទះប្រជាពលរដ្ឋចំនួន៤២០ខ្នង នៅក្នុងឃុំដូនពេង ទទួលរងគ្រោះលិចទឹកនេះ ក្នុងនោះមានផ្ទះប្រមាណ៣០០ខ្នង នៅក្នុងភូមិបេង និងភូមិខ្ចាស់ មានការលិចខ្លាំងជាងគេ ខណៈអ្នកជំងឺចំនួន៤២នាក់ ដែលស្នាក់នៅព្យាបាលនៅក្នុងមន្ទីរពេទ្យបង្អែកអង្គរជុំត្រូវបានបញ្ជូនចេញទៅកាន់មន្ទីរពេទ្យស្រុកពួក ហើយនៅព្រឹកថ្ងៃទី២៤ ខែកញ្ញានេះ ។
លោក ពិន ប្រាកដ អភិបាលរងខេត្ត និងជាតំណាងដ៏ខ្ពង់ខ្ពស់លោក ទៀ សីហា អភិបាលនៃគណៈអភិបាលខេត្តសៀមរាបបានដឹកនាំកម្លាំងចម្រុះមានអនុប្រធានមន្ទីរសុខាភិបាលខេត្តគណៈអភិបាលស្រុក កងរាជអាវុធហត្ថស្រុក ប្រធានមន្ទីរបង្អែកអង្គរជុំបានចុះពិនិត្យស្ថានភាពទឹកជំនន់ផ្ទាល់នៅតំបន់មួយចំនួនក្នុងស្រុកអង្គរជុំភ្លាមៗផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ