រាជធានីភ្នំពេញ ៖ គ្រោះថ្នាក់ចរាចរណ៍រវាងម៉ូតូ២គ្រឿងបុកគ្នាយ៉ាងពេញទំហឹង បណ្តាលឲ្យមនុស្សស្លាប់ចំនួន២នាក់នៅកន្លែងកើតហេតុ និងម្នាក់ទៀតរងរបួសធ្ងន់ ត្រូវបានរថយន្តឯកជនដឹកយកទៅសង្គ្រោះនៅមន្ទីរពេទ្យ ។ ហេតុការណ៍ខាងលើបានបង្កអោយមានការភ្ញាក់ផ្អើលកើតឡើងកាលពីវេលាម៉ោង៩និង៣០នាទីយប់ថ្ងៃទី២៤ ខែកញ្ញា ឆ្នាំ២០១៩…
រាជធានីភ្នំពេញ ៖ គ្រោះថ្នាក់ចរាចរណ៍រវាងម៉ូតូ២គ្រឿងបុកគ្នាយ៉ាងពេញទំហឹង បណ្តាលឲ្យមនុស្សស្លាប់ចំនួន២នាក់នៅកន្លែងកើតហេតុ និងម្នាក់ទៀតរងរបួសធ្ងន់ ត្រូវបានរថយន្តឯកជនដឹកយកទៅសង្គ្រោះនៅមន្ទីរពេទ្យ ។
ហេតុការណ៍ខាងលើបានបង្កអោយមានការភ្ញាក់ផ្អើលកើតឡើងកាលពីវេលាម៉ោង៩និង៣០នាទីយប់ថ្ងៃទី២៤ ខែកញ្ញា ឆ្នាំ២០១៩ នៅតាមបណ្ដោយផ្លូវជាតិលេខ៣ ដែលស្ថិតនៅភូមិព្រៃកីខ សង្កាត់ពងទឹក ខណ្ឌដង្កោ ។
ភាគីខាងម៉ូតូមួយគ្រឿងម៉ាកហ្ស៊ូមមើអិច ពណ៌ស ពាក់ស្លាកលេខ ភ្នំពេញ ១BX -៧២៩៩ បើកបរដោយឈ្មោះ ចាន់ សុធារិត ហៅ ម៉ាប់ ភេទប្រុស អាយុ២៥ឆ្នាំ ស្នាក់នៅម្តុំពោធិ៍ចិនតុង មានស្រុកកំណើតនៅខេត្តកំពត បានស្លាប់នៅនឹងកន្លែងកើតហេតុ។
ចំណែកភាគីខាងម៉ូតូមួយគ្រឿងទៀតជិះគ្នា២នាក់ ម៉ាកហុងដាឌ្រីម ស៊េរីឆ្នាំ២០១៦ ពណ៌ខ្មៅ ពាក់ស្លាកលេខ តាកែវ ១M-១១៨៩ បើកបរដោយឈ្មោះ ដុយ ម៉ក់ ភេទប្រុស រស់នៅភូមិខ្វាវ ឃុំខ្វាវ ស្រុកត្រាំង ខេត្តតាកែវ បានស្លាប់នៅនឹងកន្លែងកើតហេតុ រីឯអ្នករួមដំណើរម្នាក់ទៀតដែលរងរបួសធ្ងន់ មិនស្គាល់អត្តសញ្ញាណនោះទេ ។
តាមប្រភពព័ត៌មានពីប្រជាពលរដ្ឋនៅកន្លែងកើតហេតុបានឲ្យដឹងថា នៅមុនពេលកើតហេតុគេឃើញម៉ូតូមួយគ្រឿងម៉ាកហ្ស៊ូមមើអិចបើកបរដោយបុរសម្នាក់ ធ្វើដំណើរក្នុងទិសដៅពីជើងទៅត្បូងក្នុងល្បឿនយ៉ាងលឿន លុះមកដល់ចំណុចកើតហេតុ បានបុកគ្នាជាមួយ ម៉ូតូមួយគ្រឿងទៀតជិះគ្នា២នាក់ ម៉ាកហុងដាឌ្រីម ស៊េរី២០១៦ ដែលកំពុងបើកបរក្នុងល្បឿនលឿនដូចគ្នា បណ្តាលឲ្យស្លាប់២នាក់នៅនឹងកន្លែងកើតហេតុ និងម្នាក់ទៀតរងរបួសធ្ងន់ ។
តាមប្រភពដដែលបានបន្តទៀតថា ភ្លាមៗនោះជនរងគ្រោះម្នាក់ដែលរងរបួសធ្ងន់ខាងលើត្រូវបានរថយន្តគ្លីនិកឯកជនមកដឹកយកទៅសង្គ្រោះភ្លាមៗផងដែរ ហើយសមត្ថកិច្ចបានទាក់ទងទៅក្រុមគ្រួសារសព ដើម្បីឱ្យមកកាន់កន្លែងកើតហេតុ ។
ក្រោយពេលកើតហេតុ សពជនរងគ្រោះទាំង២នាក់ខាងលើត្រូវបានសមត្ថកិច្ចចរាចរណ៍រាជធានីភ្នំពេញធ្វើលិខិតប្រគល់សពអោយក្រុមគ្រួសារយកទៅធ្វើបុណ្យតាមប្រពៃណីនៅស្រុកកំណើត ។ ចំណែកម៉ូតូទាំង២គ្រឿងខាងលើត្រូវជំនាញខាងការិយាល័យចរាចរណ៍រាជធានីភ្នំពេញយកទៅរក្សាទុកដើម្បីរងចាំធ្វើការដោះស្រាយនៅពេលក្រោយ ៕ (កែសម្រួលដោយ ៖ ធីតា)
ចែករំលែកព័តមាននេះ