ខេត្តសៀមរាប ៖ លោកហ៊ុន ម៉ាណែត អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងទ័ពជើងគោកថ្លែងថ្ងៃទី២៣ កញ្ញានេះក្នុងពិធីសំណេះសំណាលការជួបជុំ និងការបំពាក់ឋានន្តរសក្តិជូនយោធិនដែលត្រូវចូលនិវត្តន៍នាពេលនេះ គឺក្នុងគោលបំណងថ្លែងអំណរគុណចំពោះគុណូបការៈ ស្នាដៃ និងការខិតខំបំពេញភារកិច្ចជូនជាតិមាតុភូមិ ជាពិសេសស្ថិតនៅក្នុងដំណាក់កាលលំបាកក្នុងការរំដោះជាតិ និងថែរក្សាសុខសន្តិភាព និងការសម្រេចបាននូវយុទ្ធសាស្ត្រឈ្នះ-ឈ្នះ ហើយធ្វើឲ្យយើងមានសុខសន្តិភាពដូចសព្វថ្ងៃនេះ ។
បើគ្មានការចូលរួមពីអ៊ំពូមីង និងកងកម្លាំងគ្រប់មាននៃការនយោបាយចូលរួមទេ យើងក៏មិនអាចសម្រេចបាននៃយុទ្ធសាស្ត្រឈ្នះ-ឈ្នះនោះដែរ ។ មួយវិញទៀតការជួបជុំនេះ គឺដើម្បីអបអរសាទរចំពោះពូមីងដែលត្រូវបានព្រះមហាក្សត្ររាជរដ្ឋាភិបាល និងក្រសួងការពារជាតិដំឡើងឋានន្តរសក្កិជូនដែលនេះ គឺជាប្រវត្តិសាស្ត្រហើយសម្រាប់កងទ័ពកម្ពុជាដែលមានការបំពាក់សក្កិមុនចូលនិវត្តន៍ ។
រាជរដ្ឋាភិបាលបានយកចិត្តទុកដាក់ចំពោះកិត្តិយស និងជីវភាពរបស់កងទ័ពតាមរយៈការដំឡើងប្រាក់បៀវត្ស និងផ្តល់គោលនយោបាយ និងសេវាផ្សេងៗរួមទាំងការសាងសង់ហេដ្ឋារចនាសម្ព័ន្ធ និងការផ្ដល់សម្ភារៈជាច្រើន ។ ហើយការយកចិត្តទុកដាក់នេះមិនមែនធ្វើតែពេលបំពេញភារកិច្ចនោះទេ គឺធ្វើគ្រប់ដំណាក់កាលទាំងអស់ គឺពេលកំពុងបំពេញភារកិច្ច និងក្រោយពេលបំពេញភារកិច្ច គឺយើងបន្តជួយតាមយន្តការសមាគមអតីតយុទ្ធជន។ ៣- ស្របពេលដែលយើងមានគោលការណ៍ជ្រើសរើស នាយទាហាន ពលទាហាន បន្ថែមដើម្បីបំពេញចំនួនទ័ពទៅតាមបណ្តាអង្គភាពក្របខណ្ឌកងទ័ពជើងគោក យើងអាចផ្តល់អទិភាពជូនសាច់ញាតិបង្កើតរបស់ពូមីង ដើម្បីបន្តវេនពីអ៊ំពូមីង ហើយគោលការណ៍នៃការជ្រើសរើសពលទាហាននាយទាហានមិនមានគោលការណ៍យកប្រាក់នោះទេ ។
នេះគឺជាការផ្ដល់ឱកាសកាសដល់កូនចៅអ៊ំពូមីង និងជាការលើកទឹកចិត្តចំពោះអតីតយុទ្ធជន ។ បើទោះបីអ៊ំពូមីងបញ្ចប់ការងារជាកងកម្លាំងក៏ដោយ ប៉ុន្តែអ៊ំពូមីង គឺជាធនធានរបស់ជាតិ ជាអតីតយុទ្ធជនដែលមានឥទ្ធិពលក្នុងការផ្សព្វផ្សាយ ចែករំលែកការលំបាក និងបទពិសោធន៍ឈឺចាប់ដើម្បីឱ្យក្មេងជំនាន់ក្រោយបានដឹងព្រោះថា អ្នកដែលមានជីវិតមកដល់សព្វថ្ងៃនេះ គឺសុទ្ធតែមានសំណាង ។
កងទ័ពរបស់យើងបានបញ្ចប់សង្គ្រាមផ្ទៃក្នុងហើយ យើងរួបរួមគ្នាកសាងប្រទេស ការពារជាតិបូរណភាពទឹកដី ការពារសុខសន្តិភាពផ្ទៃក្នុង ។ នេះ គឺជាគុណូបការបទពិសោធន៍ និងគំរូរបស់អ៊ំពូមីងបន្តទុកឲ្យក្មេងជំនាន់ក្រោយ ៕
ចែករំលែកព័តមាននេះ