រាជធានីភ្នំពេញ ៖ សេចក្តីរាយការណ៍បឋមបានឲ្យដឹងថា ឃ្លាំងផ្ទុកកម្ទេចក្រណាត់មួយកន្លែងត្រូវបានអគ្គិភ័យឆាបឆេះយ៉ាងសន្ធោសន្ធៅបង្កការភ្ញាក់ផ្អើល កាលពីវេលាម៉ោង៣និង៣០នាទីទៀបភ្លឺ ថ្ងៃទី២៥ ខែកញ្ញានេះ នៅឃ្លាំងផ្ទុកកម្ទេចក្រណាត់ តាមបណ្ដោយផ្លូវបេតុង ភូមិព្រៃសណ្ដែក សង្កាត់ចោមចៅទី២ ខណ្ឌពោធិ៍សែន ។
សេចក្តីរាយការណ៍បានបន្ត ប្រភពព័ត៌មានបានឲ្យដឹងថា មុនពេលកើតហេតុប្រជាពលរដ្ឋឃើញមានផ្សែង និងអណ្តាតភ្លើងបានឆាបឆេះចេញពីក្នុងឃ្លាំងស្តុកកម្ទេចក្រណាត់ប្រជាពលរដ្ឋបានរាយការណ៍ប្រាប់ សមត្ថកិច្ចចុះមកជួយអន្តរាគមន៍។
តាមប្រភពព័ត៌មានពីសមត្ថកិច្ចនគរបាលប៉ុស្តិ៍បានបានអោយដឹងថា ពេលកើតហេតុភ្លាមៗកម្លាំងសមត្ថកិច្ចនគរបាលប៉ុស្តិ៍ចោមចៅទី២ បានចុះមកអន្តរាគមន៍ ហើយបានទាក់ទងទៅផ្នែកជំនាញរថយន្តពន្លត់អគ្គិភ័យចុះមកជួយនឹងហៅរថយន្តពន្លត់អគ្គិភ័យមកជួយពន្លត់ ។
ភ្លាមៗផងក្នុងនោះសមត្ថកិច្ចបានបញ្ជាក់ថា រថយន្តពន្លត់អគ្គិភ័យមកជួយពន្លត់ចំនួន១៣គ្រឿងក្នុងនោះមានរថយន្តអគ្គិភ័យរបស់ស្នងការធានីភ្នំពេញចំនួន១២គ្រឿង និងរថយន្តរបស់ស្រាបៀរកម្ពុជាចំនួន១គ្រឿង ប្រើប្រាស់ទឹកសរុបចំនួន៣០រថយន្ដ និងប្រើរយៈពេលចំនួន២ម៉ោងកន្លះបានរលត់ទៅវិញ មិនបានឆ្លងរាលដាលទៅដល់អ្នកជិតខាងទេ គ្រាន់តែ ឆេះខូចខាតកម្ទេចក្រណាត់តែប៉ុណ្ណោះ ។
អគ្គិភ័យឆាបឆេះកម្ទេចគំនរក្រណាត់ខាងលើនេះសមត្ថកិច្ចកំពុងស៊ើបសង្កេតមិនទាន់ដឹងថា បង្កមកពីមូលហេតុអ្វីនៅឡើយទេ ដោយសារតែម្ចាស់ឃ្លាំងជាជនជាតិបរទេស ៕ កែសម្រួលដោយ ៖ សុឃាក់
ចែករំលែកព័តមាននេះ