ពួកប្រេតដែលអាចទទួលអាហារពីញាតិសន្តានកូនចៅក្នុងរដូវបុណ្យភ្ជុំបិណ្ឌបាន មានតែបួនពួកប៉ុណ្ណោះ ដែលជាប្រេតមានកម្មស្រាលរស់នៅច្របូកច្របល់ជាមួយនឹងស្រុកមនុស្សយើងនេះដែរគឺៈ
១-ឈ្មោះបរទត្តូជីវិកប្រេត ពួកប្រេតនេះរស់នៅអាស្រ័យអ្នកដទៃគេឧទ្ទិសកុសលទៅ ។
២-ឈ្មោះកុប្បិបាសិកវន្តប្រេត ពួកប្រេតនេះរស់នៅដោយសេចក្តីស្រេកឃ្លានជាប្រចាំមានចិត្តរំជើបរំជួលស្រេកឃ្លានអាហារគ្រប់ពេល រស់នៅអាស្រ័យអណ្តាតដោយការលិទ្ធវត្ថុផ្សេងៗ ។
៣-និជ្ឈាបកណ្ហិប្រេត ប្រេតប្រភេទនេះមានសេចក្តីក្តៅក្រហាយប្រចាំកាយគ្រប់ពេល ។
៤-អទិស្សមាណកាយប្រេត ប្រេតពួកនេះមានកាយមិនប្រាកដមានកម្មស្រាលជាងគេ ប្រេតពួកនេះកាលណាបានទទួលកុសលផលបុណ្យហើយក៏រួចចាកទុក្ខភ្លាម ។
សូមបញ្ជាក់ថា ពួកប្រេតទាំងបួនប្រភេទនេះមានទោសស្រាលទៅហើយ រង់ចាំតែចំណែកផលបុណ្យពីញាតិឧទ្ទិសទៅឱ្យនឹងបានរួចផុតអត្តភាពជាប្រេតនោះភ្លាម ។
ពួកនេះរស់នៅលើភពផែនដីច្របូកច្របល់ជាមួយមនុស្ស ពេលខ្លះក៏ពួកនេះបង្ហាញខ្លួនឱ្យឃើញដែរ ជាពិសេសនៅកន្លែងណាដែលស្ងាត់ ហើយសម្បូរទៅដោយគ្រឿងអសុភ សាកសព ព្រោះពួកនេះច្រើនតែទៅស៊ីវត្ថុមិនស្អាតលុះពេលមនុស្សដើរទៅចំពេលកំពុងស៊ីក៏បង្ហាញខ្លួនបន្លាច ព្រោះខ្លាចមនុស្សមកដណ្តើមអាហាររបស់ខ្លួន ។
ហេតុនេះហើយមនុស្សតែងពោលថាខ្មោចលង ប៉ុន្តែបើមនុស្សមិនខ្លាច ពួកនេះក៏គេចខ្លួនដោយឯកឯង ជាពិសេសពួកប្រេតទាំងអស់នេះខ្លាចអ្នកមានសីល មានសទ្ធាបំផុត ។ (ដោយសាន សារិន)
ចែករំលែកព័តមាននេះ