ខេត្តឧត្តរមានជ័យ ៖ ទីអារាមចំរើនកុសល ហៅវត្តច្រោក បានកសាងឡើងកាលពីអំឡុងឆ្នាំ៩៣ មកម្ល៉េះ ស្ថិតនៅតាមខ្សែបន្ទាត់ព្រំដែនកម្ពុជា-ថៃ នៅលើផ្ទៃដីទំហំ១០០ម៉ែត្រគុណ១០០ម៉ែត្រ ស្ថិតក្នុងភូមិច្រោក ឃុំផ្អាវ ស្រុកត្រពាំងប្រាសាទ ខេត្តឧត្តរមានជ័យ រហូតមកទល់បច្បន្ននេះមិនទាន់មានការរីកចំរើននៅឡើយទេ ខណៈដោយសារតែលោកឧកញា ឯកឧត្តម លោក លោកជំទាវ និងសប្បុរសជនទីជិតទីឆ្ងាយនៅឯនាយសមុទ្រនៅទាន់មើលមិនឃើញ។
បើតាមលោក ប៉ិល ឈួន មេភូមិច្រោកជាអតីតខ្មែរក្រហមបានឱ្យដឹងថា កាលពីឆ្នាំ១៩៧៥ រហូតមកទល់ឆ្នាំ១៩៧៨នៅក្នុងរបបមេដឹកនាំខ្មែរក្រហមប៉ុល ពត ដែលមានរយៈពេល៣ឆ្នាំ៨ខែ២៥ថ្ងៃ បានកាប់សម្លាប់ប្រជាជនអស់ជាង៣លាននាក់ បន្ទាប់មកនៅក្នុងអំឡុងឆ្នាំ១៩៧៩ ត្រូវបានកងទ័ពរដ្ឋាភិបាលរំដោះឱ្យរួចផុតពីការកាប់សម្លាប់ ។
ខណៈនោះកងទ័ពខ្មែរក្រហម បាននាំគ្នាប្រមូលផ្តុំគ្នាមករស់នៅតាមខ្សែបន្ទាត់ព្រំដែនកម្ពុជា-ថៃ ហើយប៉ុល ពត និងតាម៉ុកបានប្រែរូបមានចិត្តមកគោរពនូវព្រះពុទ្ធសាសនា ហើយឱ្យប្រជាពលរដ្ឋប្រកបមុខរបរកស៊ីតាមរបៀប ខណៈឯកជនជាគ្រួសារៗ នឹងបានឱ្យប្រជាពលរដ្ឋកសាងទីអាវត្តចំរើនកុសល ហៅវត្តច្រោក បានចាប់ផ្តើមកាលពីអំឡុងក្នុងឆ្នាំ១៩៩៣ មកម្ល៉េះ សម្រាប់គោរពបូជានូវព្រះពុទ្ធសាសនារហូតមកទល់ពេលនេះ។
លោកមេភូមិដដែលបន្តថា បើតាមការសង្កេតវត្តនេះ នៅពេលបុណ្យទានម្តងៗ មានតែអ្នកភូមិដែលមានចំនួន៣ទៅ៤ភូមិប៉ុណ្ណោះបាននាំគ្នាទៅប្រគេនចង្ហាន់ដល់ព្រះសង្ឃដែលកំពុងគង់នៅក្នុងវត្ត ហើយមានបច្ច័យបន្តិចបន្ទួច និងមិនដែលឃើញមានអង្គកឋិនធំៗដង្ហែចូលមកទីអារាមនេះទេ ដូច្នេះពុំមានបច្ចយ័សម្រាប់កសាងវត្តនោះទេ សូម្បីតែព្រះសង្ឃស្ទើរតែពុំមានចង្ហាន់ផង ហើយរូបលោក រួមទាំងប្រជាពលរដ្ឋ ក៏សុំអំពាវនាវដល់ឯកឧត្តម លោក លោកជំទាវ លោកស្រី សប្បុរសជន នៅទីជិតទីឆ្ងាយ និងនៅឯនាយសមុទ្រ មេត្តាជួយឧបត្ថម្ភជាបច្ច័យសម្រាប់កសាងទីអារាមដ៏កម្សត់នេះផង។
ចំណែកព្រះសង្ឃព្រះនាម ស្រី សុខន ព្រះចៅអធិការវត្តចំរើនកុសល ហៅវត្តច្រោក មានសង្ឃដីកាថា វត្តនេះចាប់ផ្តើមកសាងឡើងនៅក្នុងអំឡុងឆ្នាំ១៩៩៣ ទើបកសាងបានកុដិព្រះសង្ឃគង់នៅចំនួន២ខ្នង សាលាឆាន់១ខ្នង សាឡុប១តម្កល់ព្រះពុទ្ធបដិមា សម្រាប់ពុទ្ធបរិស័ទគោរពបូជា និងមានព្រះសង្ឃគង់នៅចំនួន៤អង្គ ហើយដោយសារតែវត្តនេះ អាត្តខាត់ បើព្រះសង្ឃគង់ច្រើន គឺដាច់ចង្ហាន់ ។
ខណៈនេះ ក៏សូមអំពាវនាវដល់ឯកឧត្តម លោកជំទាវ លោកស្រី រួមទាំងសប្បុរសជនទីជិតទីឆ្ងាយ ជាពិសេសសម្តេច ហ៊ុន សែន នៃព្រះរាជាអាណាចក្រកម្ពុជា សម្តេចកិត្តិព្រឹទ្ធបណ្ឌិតប្រធានកាកបាទក្រហមកម្ពុជា តែងតែបានយកចិត្តទុកដាក់នូវព្រះពុទ្ធសាសនា មេត្តាជួយកសាងទីអារាមនេះផង៕ (កែសម្រួលដោយ ៖ បុប្ផា)
ចែករំលែកព័តមាននេះ