ការប្រាស្រ័យទាក់ទងគ្នាតែងតែកើតមានឡើងនៅគ្រប់កន្លែងដែលរួមទាំងកន្លែងធ្វើការផងដែរ ។ ហើយការមានជំនាញទំនាក់ទំនងដោយមានប្រសិទ្ធិភាព គឺជាចំណុចសំខាន់ដែលជួយឲ្យអ្នកឈានមុខគេនៅកន្លែងការងារ ។ ប៉ុន្តែមនុស្សជាច្រើនបានមើលរំលងជំនាញនេះ និងនិយាយពាក្យមួយចំនួនដែលអាចប៉ះពាល់ដល់ទស្សនៈរបស់បុគ្គលិក ឬប្រធានដទៃក្នុងក្រុមហ៊ុន ។ ជាលទ្ធផលវាក៏ប៉ះពាល់ដល់ឱកាសដែលពួកគេទទួលបានក្នុងការរីកចម្រើន ឬឡើងឋានៈដែរ ។
ដូច្នេះដើម្បីទប់ស្កាត់ករណីនេះមិនឲ្យកើតមានឡើង អ្នកគួរតែចៀសវាងនិយាយប្រយោគខាងក្រោម៖
១. វាមិនមែនជាការងារខ្ញុំទេ ៖ អ្វីដែលអ្នកនិយាយគឺ «ខ្ញុំមិនចង់មានទំនួលខុសត្រូវទេ ហើយខ្ញុំក៏មិនចង់គិត ឬធ្វើអ្វីដែលលើសពីការងារខ្ញុំដែរ» ។ វាអាចបង្កើតឲ្យមានទស្សនៈអវិជ្ជមានលើអ្នកព្រោះវាបង្ហាញថា អ្នកមិនចង់ធ្វើ ឬមិនអាចធ្វើអ្វីមួយបាន ។ ប្រសិនបើអ្នកមិនចង់ទទួលយកការងារដែលអ្នកគិតថាមិនចាំបាច់ទេនោះអ្នកអាចបដិសេធវាបាន ប៉ុន្តែដើម្បីចៀសវាងទស្សនៈអវិជ្ជមានខាងលើ អ្នកគួរតែយ៉ាងហោចណាស់ក៏បង្ហាញពីការខិតខំប្រឹងប្រែងក្នុងការចង្អុលបង្ហាញអ្នកដែលទទួលខុសត្រូវការងារនេះដែរ ។
២. ដោះស្រាយខ្លួនឯងទៅ ៖ វាប្រៀបដូចជាអ្នកនិយាយថា «ខ្ញុំមិនចង់ជួយអ្នកទេ» ។ ហើយវាជាពាក្យសម្តីដែលបង្កើតគម្លាតរវាងអ្នក និងមនុស្សដែលសុំជំនួយឲ្យអ្នក ។ ប្រសិនបើម្នាក់នោះជាកូនក្រុម ឬសមាជិកក្រុមរបស់អ្នកទៀតនោះ អ្នកអាចនឹងបាត់បង់ការគោរពបានព្រោះវាបង្ហាញថា អ្នកកំពុងតែទុកពួកគេចោល ។
៣. ខ្ញុំគ្រាន់តែស្តាប់តាមបញ្ជាប៉ុណ្ណោះ ៖ ប្រយោគនេះបង្ហាញពីភាពទន់ខ្សោយរបស់អ្នក និងបង្ហាញថាអ្នកមិនមានគោលជំហរ ឬសមត្ថភាពក្នុងការសម្រេចចិត្តដោយឯករាជ្យបានឡើយ ។ ប្រសិនបើអ្នកជាប្រធានក្រុមមួយរូប វាប្រៀបដូចជាបង្ហាញថាអ្នកគ្រាន់តែជាកូនចៅអ្នកដទៃប៉ុណ្ណោះ ។
៤. វាមិនមែនជាកំហុសខ្ញុំទេ៖ បើទោះជាវាមិនមែនជាកំហុសអ្នកពិតមែនក្តី ការនិយាយប្រយោគនេះចេញមកបង្ហាញថាអ្នកកំពុងតែការពារខ្លួន និងបង្ហាញពីភាពក្មេងខ្ចីរបស់អ្នកទៅវិញទេ ។ អ្នកដឹកនាំល្អតែងតែទទួលខុសត្រូវ និងមិនចៀសវាងការរិះគន់ ឬស្តីបន្ទោសអ្នកដទៃឡើយ ៕ កែសម្រួលដោយ ៖ សុឃាក់
ចែករំលែកព័តមាននេះ