រាជធានីភ្នំពេញ ៖ មន្ទីរពេទ្យរ៉ូយ៉ាល់ភ្នំពេញ បានរៀបចំនូវសិក្ខាសាលាមួយ ដើម្បីបង្ហាញនិងពន្យល់ដល់ប្រជាពលរដ្ឋកម្ពុជា ពីជំងឺហូរឈាមក្នុងក្រពះ និងជំងឺមហារីកក្រពះ ព្រមជាមួយនឹងបច្ចេកវិទ្យាព្យាបាលថ្មីផងដែរ ។ ពិធីនេះ បានធ្វើឡើងកាលពីថ្ងៃទី២១ កញ្ញា ២០១៩ នៅមន្ទីរពេទ្យរ៉ូយ៉ាល់ភ្នំពេញ ខណៈពេលជំងឺនេះ គឺជាជំងឺគួរឱ្យព្រួយបារម្ភ និងទាមទារឱ្យមានការយល់ដឹងទាំងអស់គ្នា ។
លោកវេជ្ជបណ្ឌិត ខាំ សោភា វេជ្ជបណ្ឌិតជំនាញ ប្រព័ន្ធរំលាយអាហារ និងការព្យាបាលដោយអន្តរកកម្ម ប្រចាំមន្ទីរពេទ្យរ៉ូយ៉ាល់ភ្នំពេញ បានឱ្យដឹងថា ជាទូទៅមន្ទីរពេទ្យទទួលបានករណីហូរឈាមនៅប្រព័ន្ធរំលាយអាហារ ហើយភាគច្រើនគឺនៅភាគខាងលើ ដោយសារតែការបែកសរសៃឈាមនៅបំពង់អាហារ ការហូរឈាមដោយសារតែការដំបៅក្រពះ និងការរីកធំនៅត្រង់កន្លែងដំបៅនោះកាន់តែធំ ។ ករណីនេះ បើសិនជាបណ្ដែតបណ្ដោយនិងទុកនៅកាន់តែយូរទៀតនោះ នឹងអាចបណ្ដាលឱ្យបាត់បង់ជីវិត ហើយគ្រូពេទ្យក៏មិនអាចជួយទាន់ពេលដែរ ។
លោកបន្តថា មានវិធានការជាច្រើនដែលត្រូវការពារ តែអ្នកជំងឺ ត្រូវជួបជាមួយគ្រូពេទ្យ ដើម្បីឱ្យគ្រូពេទ្យពិនិត្យតាមដាន និងរកមូលហេតុដែលកើតជំងឺក្រពះ និងឈានដល់ការហូរឈាមក្រពះ ឬដល់មហារីកក្រពះ ។ នៅពេលបានដឹងមូលហេតុហើយ អ្នកជំងឺក៏ត្រូវទៅជួបគ្រូពេទ្យទៅតាមការណាត់របស់គ្រូពេទ្យ ដើម្បីកំចាត់រោគក្នុងក្រពះ និងរកវិធីការពារកុំឱ្យឈានដល់ដំណាក់កាលដែលមិនអាចព្យាបាលបាន ។
លោកបន្ថែមថា ពាក់ព័ន្ធនឹងមនុស្សទូទៅ ដើម្បីការពារជំងឺក្រពះនេះដែរ គួរតែព្យាយាមទទួលទានរបបអាហារត្រឹមត្រូវ និងទៀងពេលវេលា ហើយគួរកាត់បន្ថយនូវការជក់បារី និងពិសាស្រាជាដើម ដោយគួរញ៉ាំបន្លែ ផ្លែឈើ និងត្រូវប្រាកដថាបន្លែផ្លែឈើទាំងនេះ ជាពពួកបន្លែ និងផ្លែឈើល្អ មិនបង្ករោគ ។
លោកវេជ្ជបណ្ឌិត Wutthi Sumetchotimaytha វេជ្ជបណ្ឌិតជំនាញវះកាត់ជំងឺមហារីកក្រពះ មកពីប្រទេសថៃ បានឱ្យដឹងថា ជំងឺមហារីកក្រពះ កម្រិតទី១អាចជាដាច់៩០ភាគរយ ឬ១០០ភាគរយ តែបើសិនជាអ្នកជំងឺឈានដល់កម្រិតទី២ ការព្យាបាលគ្រាន់តែពន្យារឱ្យរស់នៅបានយូរប៉ុណ្ណោះ ហើយសង្ឃឹមថានៅថ្ងៃអនាគត ការព្យាបាលជំងឺមហារីកក្រពះកម្រិតទី២ នឹងអាចព្យាបាលជាដាច់១០០ភាគរយ ។
លោកបន្តថា ករណីជំងឺមហារីកក្រពះ នៅក្នុងប្រទេសថៃ នាពេលបច្ចុប្បន្ននេះ បានថយចុះ គួរឱ្យកត់សម្គាល់ ដោយសារតែប្រជាជនថៃភាគច្រើនបានយល់ដឹងពីជំងឺ មហារីកក្រពះ និងមូលហេតុអ្វីបណ្ដាលឱ្យកើតជំងឺមហារីកក្រពះ ដោយពួកគេបានអនុវត្តន៍តាមការណែនាំរបស់វេជ្ជបណ្ឌិតថៃ ពីការការពារជំងឺមហារីកក្រពះ ។ លោកថា ៖ «នៅថ្ងៃអនាគត ករណីជំងឺមហារីកក្រពះ នៅក្នុងប្រទេសថៃ នឹងថយចុះជាបន្តទៀត ដោយសារតែប្រជាជនកាន់តែយល់ដឹង និងដឹងពីរបៀបការពារ ដោយទម្លាប់របស់ពួកគាត់ផ្ទាល់តែម្ដង » ។
គួរបញ្ជាក់ថា មន្ទីរពេទ្យរ៉ូយ៉ាល់ ភ្នំពេញ តែងតែអញ្ជើញវេជ្ជបណ្ឌិតជំនាញពីប្រទេសថៃ មកពន្យល់ណែនាំដល់ប្រជាពលរដ្ឋកម្ពុជា ពីជំងឺមួយចំនួនដល់ ជាពិសេសពីវិធីសាស្ត្រការពារ និងព្យាបាលទាន់ពេលវេលា ដើម្បីកុំឱ្យជំងឺកាន់តែរីកធំ ដែលឈានដល់ដំណាក់កាលពិបាកព្យាបាល ៕ ដោយសហការ (កែសម្រួលដោយ ៖ បុប្ផា)
ចែករំលែកព័តមាននេះ