រាជធានីភ្នំពេញ ៖ សម្តេច ហេង សំរិន ប្រធានរដ្ឋសភានៃព្រះរាជាណាចក្រកម្ពុជាបានគាំទ្រដល់គំនិតផ្តួចផ្តើមទាំងឡាយរបស់សភាប្រទេសកាហ្សាក់ស្ថាន ក្នុងន័យជំរុញកិច្ចសហប្រតិបត្តិការការទូតសភាជាមួយសភាប្រទេសក្នុងតំបន់យូរ៉ាហ្សៀ (Eurasia) ឲ្យកាន់តែមានសមាហរណកម្មជិតស្និទ្ធជាមួយគ្នា ។ ការលើកឡើងរបស់សម្តេចប្រធានរដ្ឋសភាបែបនេះបានធ្វើនៅក្នុងជំនួបពិភាក្សាការងារជាមួយលោក នួរឡេន និចម៉ាទូលីន (Nurlan Nigmatulin) ប្រធានរដ្ឋសភាកាហ្សាក់ស្ថាននៅវិមានរដ្ឋសភាកាហ្សាក់ស្ថាន នាព្រឹកថ្ងៃទី២៣ ខែកញ្ញា ឆ្នាំ២០១៩ ។
ខណៈសម្តេចប្រធានរដ្ឋសភាដឹកនាំគណៈប្រតិភូជាន់ខ្ពស់រដ្ឋសភាកម្ពុជាចូលរួមកិច្ចប្រជុំ កម្រិតប្រធានសភាអាស៊ី-អឺរ៉ុប លើកទី៤ នៅទីក្រុងណឺសុលតង់ សាធារណរដ្ឋកាហ្សាក់ស្ថាន ។
សម្តេចប្រធានបានគូសបញ្ជាក់ថា កម្ពុជា និងកាហ្សាក់ស្ថានអាចក្លាយជាប្រទេសសំខាន់២ ដែលអាចដើរតួនាទីជាស្ពានក្នុងការធ្វើការតភ្ជាប់រវាងអាស៊ាន (ASEAN) និងសហភាពសេដ្ឋកិច្ចអឺរ៉ូស៊ានអោយកាន់តែជិតស្និទ្ធថែមទៀត ។
លោកនួរឡេន និចម៉ាទូលីន បានថ្លែងអំណរគុណដល់សម្តេចប្រធានរដ្ឋសភាដែលបាន ដឹកនាំគណៈប្រតិភូជាន់ខ្ពស់រដ្ឋសភាកម្ពុជាមកចូលរួមកិច្ចប្រជុំកម្រិតប្រធានសភាអាស៊ី-អឺរ៉ុប លើកទី៤ ដែលរដ្ឋសភាកាហ្សាក់ស្ថានធ្វើជាម្ចាស់ផ្ទះនេះ ។ វត្តមានរបស់សម្តេចពេលនេះជាប្រវត្តិសាស្ត្រ និងធ្វើឲ្យកិច្ចប្រជុំនេះទទួលជោគជ័យ ។ លោកបន្តថា បានទទួលការគោរពអញ្ជើញរបស់សម្តេចប្រធានទៅចូលរួមកិច្ចប្រជុំភាពជាដៃសភាអាស៊ី-អឺរ៉ុប លើកទី១១ ដែលសភាកម្ពុជានឹងធ្វើជាម្ចាស់ផ្ទះនៅឆ្នាំ២០២០ខាងមុខនេះ ។
ក្នុងជំនួបសម្តេចហេង សំរិន ក៏បានចូលរួមអបអរសាទរចំពោះការអភិវឌ្ឍរបស់កាហ្សាក់ស្ថាន ហើយសម្តេចចង់ឃើញប្រទេសទាំងពីរកម្ពុជា-កាហ្សាក់ស្ថាន មានកិច្ចសហប្រតិបត្តិការជិតស្និទ្ធទាំងវិស័យនយោបាយ ការទូត សេដ្ឋកិច្ច ពាណិជ្ជកម្ម វិនិយោគ ទេសចរណ៍ និងវប្បធម៌ ជាដើម ៕ កែសម្រួលដោយ ៖ សុឃាក់
ចែករំលែកព័តមាននេះ