រាជធានីភ្នំពេញ ៖ ប្រធានរដ្ឋសភាវៀតណាមបានអះអាងថា ប្រទេសវៀតណាមបកប្រែសៀវភៅនិយាយពីប្រវត្តិសម្តេច ហេង សំរិន ប្រធានរដ្ឋសភាទុកជាឯកសារសិក្សាស្រាវជ្រាវ ។ ការសម្រេចបកប្រែសៀវភៅនិយាយពីប្រវត្តិសម្តេចប្រធានរដ្ឋសភានេះ ខណៈដែលសម្តេចហេង សំរិន ប្រធានរដ្ឋសភានៃព្រះរាជាណាចក្រកម្ពុជាបានទទួលជួបពិភាក្សាការងារជាមួយ លោកជំទាវ តុង ធី ហ្វុង (Tong Thi Phong) អនុប្រធានរដ្ឋសភាសាធារណរដ្ឋសង្គមនិយមវៀតណាម នៅប្រទេសកាហ្សាក់ស្ថាន នារសៀលថ្ងៃទី២៣ ខែកញ្ញានេះ ខណៈដែលថ្នាក់ដឹកនាំរដ្ឋសភាប្រទេសទាំងពីរអញ្ជើញចូលរួមកិច្ចប្រជុំកម្រិតថ្នាក់ដឹកនាំប្រធានសភាអាស៊ី-អឺរ៉ុប លើកទី៤ ។
នៅក្នុងជំនួបនេះលោកជំទាវ តុង ធី ហ្វុង បានលើកឡើងថា ដោយពិនិត្យឃើញសៀវភៅនិយាយពីប្រវត្តិរបស់សម្តេចមានសារៈសំខាន់ និងខ្លឹមសារល្អភាគីវៀតណាមនឹងបកប្រែសៀវភៅនោះទៅជាភាសាវៀតណាមទុកជាឯកសារសិក្សាស្វែងយល់ដល់យុវជនជំនាន់ក្រោយ ។ ជាមួយគ្នានេះលោកជំទាវអនុប្រធានរដ្ឋសភាវៀតណាមបានគោរពអញ្ជើញសម្តេចប្រធានរដ្ឋសភាទៅចូលរួមមហាសន្និបាតអន្តរសភាអាស៊ានដែលហៅកាត់ថា AIPA លើកទី៤១ និងកិច្ចប្រជុំសមាជិកសភាស្ត្រីនៃរដ្ឋសភាកម្ពុជា-វៀតណាមដែលរដ្ឋសភាវៀតណាមធ្វើជាម្ចាស់ផ្ទះកិច្ចប្រជុំទាំងនោះនៅឆ្នាំ២០២០ខាងមុខ ។
សម្តេចប្រធានរដ្ឋសភាបានជម្រាបភាគីវៀតណាមថា នឹងលៃលកពេលសមស្របតបតាមការអញ្ជើញនេះតែសម្តេចបានលើកឡើងថា នៅក្នុងឆ្នាំ២០២០ខាងមុខនោះសភាកម្ពុជានឹងទទួលធ្វើជាម្ចាស់ផ្ទះកិច្ចប្រជុំភាពជាដៃគូសភាអាស៊ី-អឺរ៉ុបលើកទី១១ផងដែរ ។ សម្តេចមានជំនឿយ៉ាងមុតមាំថា រដ្ឋសភាប្រទេសវៀតណាមនឹងដឹកនាំមហាសន្និបាតលើកទី៤១ ឲ្យបានជា ផ្លែផ្កា ។
ជាមួយគ្នានោះដែរ សម្តេចហេង សំរិន វាយតម្លៃយ៉ាងខ្ពស់ចំពោះកិច្ចសហប្រតិបត្តិការ និងការគាំទ្រគ្នាទៅវិញទៅមករវាងរដ្ឋសភាទាំងពីរនៅលើវេទិកាអន្តរសភានានា ។ សម្តេចបានថ្លែងអំណរគុណដល់ប្រទេសវៀតណាមដែលបានផ្តល់ជំនួយប្រមាណ២៥លានដុល្លារ ដល់រដ្ឋសភាកម្ពុជាក្នុងការសាងសង់អគាររដ្ឋបាល កម្ពស់១២ជាន់ ដែលសំណង់អគារនេះនឹងលេចជារូបរាងនាពេលខាងមុខនេះ ៕ កែសម្រួលដោយ ៖ សុឃាក់
ចែករំលែកព័តមាននេះ