ខេត្តបាត់ដំបង ៖ កូនប្រុសតិរច្ឆានម្នាក់ បានទាញដាវដល់ទៅ២ដើមកាប់ទៅលើឪពុកបណ្ដាលឲ្យរងរបួសធ្ងន់ និងម្ដាយរងរបួសស្រាល ហើយត្រូវសមត្ថកិច្ចឃាត់ខ្លួនភ្លាមៗ នៅម៉ោង៦និង៣០នាទីល្ងាចថ្ងៃទី២២ កញ្ញា នៅចំណុចត្រាំសសរ ស្ថិតក្នុងភូមិឆាយរំពាត់…
ខេត្តបាត់ដំបង ៖ កូនប្រុសតិរច្ឆានម្នាក់ បានទាញដាវដល់ទៅ២ដើមកាប់ទៅលើឪពុកបណ្ដាលឲ្យរងរបួសធ្ងន់ និងម្ដាយរងរបួសស្រាល ហើយត្រូវសមត្ថកិច្ចឃាត់ខ្លួនភ្លាមៗ នៅម៉ោង៦និង៣០នាទីល្ងាចថ្ងៃទី២២ កញ្ញា នៅចំណុចត្រាំសសរ ស្ថិតក្នុងភូមិឆាយរំពាត់ ឃុំកន្ទឺ២ ស្រុកបាណន់ តែសមត្ថកិច្ចមិនទាន់ដឹងពីមូលហេតុជាក់លាក់នៅឡើយទេ ។
សមត្ថកិច្ចបានឲ្យដឹងថា ជនដៃដល់ឈ្មោះ លុយ ធី អាយុ២៦ឆ្នាំ រស់នៅចំណុចខាងលើ ។ ជននេះ បានយកដាវសាមូរ៉ៃចំនួន ២ដើមកាប់ទៅលើឪពុករបស់ខ្លួនឈ្មោះលុយ វ័រ អាយុ៦៧ឆ្នាំ បណ្តាលឲ្យរងរបួសធ្ងន់ និង ម្តាយឈ្មោស៊ុន ភាន អាយុ៦២ឆ្នាំ រងរបួសស្រាល ។ កម្លាំងនគរបាលបានឃាត់ខ្លួនជននេះភ្លាមៗបន្ទាប់ពីកើតហេតុ។
ប៉ុន្តែគេមិនទាន់ដឹងអំពីមូលហេតុដែលនាំឲ្យកូនតិរច្ឆានរូបនេះកាប់ឪពុកម្ដាយខ្លួនឯងបណ្ដាលឲ្យរងរបួសយ៉ាងធ្ងន់ធ្ងរបែបនេះទេ។ ប៉ុន្តែបើតាមក្រុមគ្រួសារបានផ្ដល់ចម្លើយបឋមដល់សមត្ថកិច្ចថា ជនដៃដល់រូបនេះជាមនុស្សមានសតិមិនប្រក្រតី ។
លោកជេត វណ្ណនី ស្នងការរងខេត្តបានប្រាប់ថា ពេលនេះ មន្ត្រីជំនាញកំពុងសួរនាំជនសង្ស័យរូបនេះអំពីមូលហេតុ ដែលបង្កឲ្យមានហិង្សាយ៉ាងធ្ងន់ធ្ងរបែបនេះ។ លោកបាននិយាយថា ក្រុមគ្រួសារអះអាងថា ជនដៃដល់ជាមនុស្សមិនគ្រប់ទឹក តែយើងកំពុងស្រាវជ្រាវថា តើការអះអាងនេះ មានលិខិតបញ្ជាក់ច្បាស់លាស់ពីគ្រួពេទ្យឬអត់ ?។
លោកបានបញ្ជាក់ថា ពេលនេះយើងមិនទាន់បានចម្លើយឲ្យជាក់លាក់ពីជនដៃដល់នៅឡើយទេ រីឯឪពុកម្ដាយដែលរងគ្រោះក៏យើងមិនទាន់បានចម្លើយដែរ។ ព្រោះពេលនេះជនរងគ្រោះទាំង២នាក់កំពុងស្ថិតនៅក្នុងមន្ទីរពេទ្យ។ ប៉ុន្តែមន្ត្រីជំនាញកំពុងព្យាយាមធ្វើការសាកសួរ និងស្រាវជ្រាវ ដើម្បីស្វែងរកមូលហេតុ ដែលនាំឲ្យកូនប្រុសតិរច្ឆានរូបនេះ កាប់ឪពុកម្ដាយខ្លួនឯងយ៉ាងឃោឃៅនេះហើយ៕ (សម្រួលដោយ៖ ស្រីណា)
ចែករំលែកព័តមាននេះ