ខេត្តបាត់ដំបង ៖ ក្នុងឱកាសវេនកាន់បិណ្ឌ និងភ្ជុំបិណ្ឌនាពេលខាងមុខនេះ លោកឧត្តមសេនីយ៍ទោ អ៊ុច សុខុន ស្នងការនៃស្នងការដ្ឋាននគរបាលខេត្តបាត់ដំបង បានដឹកនាំលោក លោកស្រី ជាស្នងការរង និងថ្នាក់ដឹកនាំការិយាល័យជំនាញចំណុះស្នងការដ្ឋាននគរបាលខេត្តបាត់ដំបង ចុះសួរសុខទុក្ខក្មួយៗជាយុវជនកំពុងបន្សាបគ្រឿងញៀននៅមជ្ឈមណ្ឌលពិភពនៃក្តីសង្ឃឹម កាលពីព្រឹកថ្ងៃទី២១ ខែកញ្ញា ឆ្នាំ២០១៩ ស្ថិតនៅភូមិដំណាក់ដង្កោ ឃុំក្តុលតាហែន ស្រុកបវេល ខេត្តបាត់ដំបង ។
លោកឧត្តមសេនីយ៍ទោស្នងការខេត្តបានមានប្រសាសន៍ថា ក្មួយៗទាំងអស់គ្នាដែលកំពុងស្ថិតនៅទីនេះគឺមិនមែនជាអ្នកទោសនោះទេ ប៉ុន្តែក្មួយៗគឺជាជនរងគ្រោះដោយសារគ្រឿងញៀន។ លោកបន្តថា ឥទ្ធិពលគ្រឿងញៀនពិតជាបានបំផ្លាញនូវអនាគតខ្លួនយើង ក្រុមគ្រួសារយើង និងសង្គមជាតិយើង ដែលចាំបាច់យើងទាំងអស់គ្នាត្រូវតែចូលរួមលុបបំបាត់ឲ្យបាននូវបញ្ហាគ្រឿងញៀននេះនៅក្នុងសង្គមរបស់យើង ។
លោកឧត្តមសេនីយ៍ទោស្នងការខេត្តបានបន្តទៀតថា ដោយមានការយកចិត្តទុកដាក់គិតគូរពីប្រមុខដឹកនាំរាជរដ្ឋាភិបាលនៃព្រះរាជាណាចក្រកម្ពុជាពីក្រសួងមហាផ្ទៃ ពីអគ្គស្នងការដ្ឋាននគបាលជាតិ ក៏ដូចគណៈអភិបាលខេត្តបាត់ដំបង បានយកចិត្តទុកដាក់គិតគូរអំពីផលប៉ះពាល់នៃបញ្ហាគ្រឿងញៀននេះ ក្នុងនោះវិធានការអប់រំបន្សាបការញៀនគ្រឿងញៀន គឺជាចំណែកមួយដ៏សំខាន់ក្នុងការរួមចំណែកស្តារនីតិសម្បាទាឡើងវិញ ដើម្បីឲ្យក្មួយៗជាជនរងគ្រោះបានវិលត្រឡប់ទៅរកស្ថានភាពប្រក្រតីឡើងវិញ មុនពេលវិលចូលទៅកាន់សហគមន៍មូលដ្ឋានសង្គមគ្រួសារវិញ។
ជាចុងក្រោយ លោកឧត្តមសេនីយ៍ទោស្នងការខេត្តបានផ្តាំផ្ញើដល់ក្មួយៗទាំងអស់ត្រូវព្យាយាមអប់រំកែប្រែខ្លួនដោយការតាំងចិត្តខ្ពស់បំផុត ត្រូវចេះស្រឡាញ់គ្នាចេះជួយគ្នាពេលមានធុរ: ហើយសូមជូនពរក្មួយៗទាំងអស់មានសុខភាពល្អ ក្នុងឱកាសបុណ្យកាន់បិណ្ឌ និងភ្ជុំបិណ្ឌនាពេលខាងមុខនេះ និងសូមទទួលបានជោគជ័យទាំងអស់គ្នាក្នុងការបន្សាបសារធាតុញៀននៅក្នុងខ្លួន។
ក្នុងកិច្ចសំណេះសំណាលនេះដែរ លោកស្នងការខេត្តបានរៀបចំការទទួលទាននំបញ្ចុកជុំគ្នាដើម្បីក្មួយៗបានបរិភោគដោយសប្បាយរីករាយ និងបានផ្តល់នូវថវិកាចំនួន២.០០០.០០០រៀល (ពីរលានរៀល) ដល់មជ្ឈមណ្ឌលដើម្បីចាត់ចែងប្រើប្រាស់ក្នុងមជ្ឈមណ្ឌលនេះផងដែរ៕ (កែសម្រួលដោយ ៖ ធីតា)
ចែករំលែកព័តមាននេះ