ខេត្តកំពង់ធំ ៖ បើតាមសេចក្តីរាយការណ៍បឋមបានឲ្យដឹងថា មានប្រជាពលរដ្ឋបានប្រទះឃើញសាកសពបុរសម្នាក់ស្លាប់អណ្ដែតក្នុងប្រឡាយទឹកតាមដងផ្លូវក្បែរភូមិនោះ បង្កឱ្យមានការភ្ញាក់ផ្អើលកាលពីរសៀលថ្ងៃទី២២ ខែកញ្ញា ឆ្នាំ២០១៩ មានប្រជាពលរដ្ឋ នៅភូមិស្អៀរ ឃុំឈូក…
ខេត្តកំពង់ធំ ៖ បើតាមសេចក្តីរាយការណ៍បឋមបានឲ្យដឹងថា មានប្រជាពលរដ្ឋបានប្រទះឃើញសាកសពបុរសម្នាក់ស្លាប់អណ្ដែតក្នុងប្រឡាយទឹកតាមដងផ្លូវក្បែរភូមិនោះ បង្កឱ្យមានការភ្ញាក់ផ្អើលកាលពីរសៀលថ្ងៃទី២២ ខែកញ្ញា ឆ្នាំ២០១៩ មានប្រជាពលរដ្ឋ នៅភូមិស្អៀរ ឃុំឈូក ស្រុកប្រាសាទសំបូរ ។
សេចក្តីរាយការណ៍បន្តថា ខណៈពេលប្រទះឃើញសពអណ្តែតទឹកនោះ ប្រជាពលរដ្ឋបានហៅគ្នីគ្នាទៅស្រង់សពមកដាក់លើគោកមើល ស្រាប់តែស្គាល់សាកសពជនរងគ្រោះនោះថា គឺឈ្មោះ ឃៀន វី ហៅ (ថោង លាង) ភេទប្រុស អាយុ៥៥ឆ្នាំ គឺជាអតីតយុទ្ធជនដែលបាត់បង់សមត្ថភាព ហើយជាអ្នករស់នៅភូមិស្អៀរ ឃុំឈូក ស្រុកប្រាសាទសំបូរ ខេត្តកំពង់ធំ ។ ខណៈពេលប្រទះឃើញ និងស្គាល់អត្ថសញ្ញាណហើយ ប្រជាពលរដ្ឋក៏បានផ្តល់ព័ត៌មាននេះ ទៅនគរបាលមូលដ្ឋានឲ្យបានដឹង ។
បើតាមការបញ្ជាក់ពីប្រពន្ធជនរងគ្រោះឈ្មោះ ធន់ សារ៉េន បានឱ្យដឹងថា ប្តីរបស់គាត់បានបាត់ពីផ្ទះកាលពីថ្ងៃទី២១ ខែកញ្ញា ម៉ោង៧និង៣០នាទីយប់ដោយមិនដឹងជាទៅណានោះទេ លុះដល់រសៀលថ្ងៃទី២២ ខែកញ្ញា ស្រាប់តែប្រជាពលរដ្ឋអ្នកស្រុក-ភូមិជាមួយគ្នានោះ ប្រទះឃើញសាកសពប្តីរបស់គាត់ស្លាប់ក្នុងប្រឡាយទឹកទៅ ឮដូច្នោះគាត់ និងសាច់ញាតិបាននាំគ្នាទៅដល់កន្លែងកើតហេតុ។
ក្រោយពីទទួលសេចក្តីរាយការណ៍ពីប្រជាពលរដ្ឋ កម្លាំងអធិការដ្ឋាននគរបាលស្រុកប្រាសាទសំបូរ និងគ្រូពេទ្យចុះទៅពិនិត្យកន្លែងកើតហេតុឃើញថា សាកសពជនរងគ្រោះមានស្នាមរបួសដោយឧបករណ៍មុខរឺងស្រួចចំពីលើផ្នែកក្បាលខាងស្តាំចំនួន៤កន្លែង មុតធ្លុះសាច់សៀតផ្កា១កន្លែង ក្រោមស្លឹកត្រចៀក២កន្លែង ជើងសក់១កន្លែង និងមានស្នាមអូសរបកស្បែកលើទ្រូង៤កន្លែង និងស្នាមរបកជើង លើចង្កា លើបបូរមាត់ ខណៈនៅពេលដែលជនសង្ស័យអូសសពជនរងគ្រោះទម្លាក់ទឹកប្រឡាយ។ ហើយបើតាមការពិនិត្យកន្លែងកើតហេតុមានបន្សល់វត្ថុតាងដូចជា បំណែកដំបងឈើចំនួន៧ចម្រៀកដែលប្រឡាក់ឈាម មួកសុវត្ថិភាពរបស់ជនសង្ស័យចំនួន១ និងកង់ជនរងគ្រោះចំនួន១គ្រឿងផងដែរ។
ប្រភពដដែលបន្តថា ឆ្លងកាត់តាមការស្រាវជ្រាវ និងពិនិត្យមើលកន្លែងកើតហេតុ ព្រមទាំងវត្ថុតាងទាំងឡាយដែលបន្សល់ទុកនៅនិងកន្លែងកើតហេតុ សមត្ថកិច្ចជំនាញបានធ្វើការសន្និដ្ឋានថា ករណីខាងលើនេះ គឺជាអំពើឃាតកម្ម ក្រោយពេលពិនិត្យរួច សពជនរងគ្រោះត្រូវបានប្រគល់ជូនក្រុមគ្រួសារធ្វើបុណ្យតាមប្រពៃណី។ ហើយបច្ចុប្បន្ននេះ កម្លាំងសមត្ថកិច្ចកំពុងធ្វើការស្រាវជ្រាវចាប់ជនសង្ស័យ ដើម្បីយកមកផ្តន្ទាទោសចំពោះមុខច្បាប់។ (កែសម្រួលដោយ ៖ បុប្ផា)
ចែករំលែកព័តមាននេះ