រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា បុរសម្នាក់ទៅជប់លៀងជាមួយមិត្តភក្តិជាក្រុម លុះពេលស្រវឹងក៏រត់ចោលគ្នា ស្រាប់បុរសរូបនេះខឹងចិត្តឡើងរថយន្តឡិចស៊ីស RX-៣៣០ បើកដូចហោះជ្រុលទៅបុកទ្រូងពុះចែកផ្លូវ បណ្ដាលឱ្យឡាប់ផ្ងារជើងបង្កឱ្យមានការភ្ញាក់ផ្អើលកាលម៉ោង១២និង៣០នាទីរំលងអធ្រាត្រឈានចូលថ្ងៃទី២២ ខែកញ្ញា ឆ្នាំ២០១៩ នៅចំណុចផ្លូវព្រះមុនីវង្សកែងផ្លូវ៤៣២ សង្កាត់ទន្លេបាសាក់ ខណ្ឌចំការមន ។
បើតាមប្រភពពីនគរបាលខណ្ឌបានឱ្យដឹងថា មានករណីគ្រោះថ្នាក់ចរាចរណ៍រវាងរថយន្តបង្កហេតុ ម៉ាកឡិចស៊ីស RX៣៣០ ពណ៌ស ពាក់ស្លាកលេខភ្នំពេញ ២AZ-០៣៣៦ អ្នកបើកបរឈ្មោះ សៅ ទិវា ភេទប្រុស អាយុ៣១ឆ្នាំ មុខរបរលក់ដូរ ស្នាក់នៅសង្កាត់ច្បារអំពៅទី១ ខណ្ឌច្បារអំពៅ ។
ប្រភពដដែលបន្តថា មុនកើតហេតុ បុរសរូបបើកបររថយន្តចេញពីហាងផឹកស៊ីជាមួយមិត្តភក្តិ ហើយស្រវឹងរៀងៗខ្លួនក៏រត់ចោល ទុកខ្លួនឱ្យនៅម្នាក់ឯង ហើយបុរសរូបនេះខឹងចិត្តពេក ក៏ឡើងបើករថយន្តលឿនដូចហោះជ្រុលទៅបុកទ្រូងផ្លូវ បណ្ដាលឱ្យក្រឡាប់ផ្ងារជើង និងមានហុយផ្សែងចេញមកក្រៅ តែសំណាងល្អមិនឆេះឡាន ព្រោះត្រូវបានបងប្អូនប្រជាពលរដ្ឋនាំគ្នាយកទឹកទៅជះ និងបើកទ្វាររថយន្តទាញអ្នកបើកបរចេញមកក្រៅ បែរជាម្ចាស់រថយន្តទះអ្នកដែលជួយទាញចេញក្រៅនោះមួយកំភ្លៀងទៀត តែសន្តិសុខឯកជនដែលជាអ្នកជួយនោះ នៅតែមិនខឹង ដោយសារអ្នកបងបើកបរស្រវឹងខ្លាំងពេក ។
សមត្ថកិច្ចបញ្ជាក់ថា ករណីគ្រោះថ្នាក់ចរាចរណ៍ខាងលើនេះ មិនមានអ្នកណារបួសនោះទេ គ្រាន់តែខូចខាតរថយន្តស្ទើរទាំងស្រុង ហើយក៏បានប្រគល់រថយន្តបង្កហេតុឱ្យទៅខាងការិយាល័យនគរបាលចរាចរណ៍ផ្លូវគោកស្នងការ ដើម្បីស្ទួចយករក្សាទុករង់ចាំសងថ្លៃខូចខាតទ្រព្យសម្បត្តិរដ្ឋផងដែរ ។ (កែសម្រួលដោយ ៖ បុប្ផា)
ចែករំលែកព័តមាននេះ