ខេត្តបន្ទាយមានជ័យ ៖ បើតាមសេចក្តីរាយការណ៍បឋមបានឱ្យដឹងថា ដោយសារព្រះភិរុណបានបង្អុរ2យប់ជាប់ៗគ្នា រាំងតែពេលថ្ងៃ គឺយប់ថ្ងៃទី20 និងទី21 ខែកញ្ញា ឆ្នាំ2019 ព្រមទាំងមានទឹកហូរធ្លាក់ពីដីថៃមកទៀត…
ខេត្តបន្ទាយមានជ័យ ៖ បើតាមសេចក្តីរាយការណ៍បឋមបានឱ្យដឹងថា ដោយសារព្រះភិរុណបានបង្អុរ2យប់ជាប់ៗគ្នា រាំងតែពេលថ្ងៃ គឺយប់ថ្ងៃទី20 និងទី21 ខែកញ្ញា ឆ្នាំ2019 ព្រមទាំងមានទឹកហូរធ្លាក់ពីដីថៃមកទៀត បានធ្វើឲ្យហេដ្ឋារចនាសម្ព័ន្ធមួយចំនួនក្នុងក្រុងប៉ោយប៉ែត រងការជន់លិច ។ ហើយពេលនេះអាជ្ញាធរក្រុងអះអាងថា បានត្រៀមទីទួលសុវត្ថិភាពជាស្រេច ដើម្បីជួយដល់ពលរដ្ឋនាពេលខាងមុខនេះ។
សេចក្តីរាយការណ៍បន្តថា ផ្លូវជាតិលេខ5 ក្នុងសង្កាត់ប៉ោយប៉ែត ប្រហែល200ម៉ែត្រ មានជំនន់ទឹកភ្លៀងហូរកាត់ ហើយទឹកអូរព្រំដែនបានហក់ឡើងខ្លាំងនេះ នេះបើតាមការឲ្យដឹងតាមទូរស័ព្ទពីលោកគាត ហ៊ុល អភិបាលក្រុងប៉ោយប៉ែត។
ជាមួយគ្នានេះដែរ លោកអភិបាលក្រុងក៏បានឲ្យដឹងដែរថា ជំនន់ទឹកភ្លៀងដែលហូរបុកពីដីថៃក្នុងស្រុកអារញ្ញ ក៏បានធ្លាក់មកដល់ភូមិអូរនាង សង្កាត់ផ្សារកណ្តាល ជាពិសេសហូរដល់ចំណុចផ្លូវបត់ចូលទៅតំបន់ឧស្សហកម្មអូរនាងហើយ។
ទោះជាយ៉ាងណា លោកបន្តថា ពេលនេះអាជ្ញាធរបាននិងកំពុងកាយមុខទឹកតាមទីទំនាបផ្សេងៗ ដើម្បីបញ្ចៀសជំនន់ទឹកភ្លៀងទាំងនេះឲ្យធ្លាក់ទៅអូរព្រំដែន។ លោកអភិបាលក្រុងបញ្ជាក់ថា លោកនឹងដឹកនាំក្រុមការងារចុះទៅពិនិត្យមើលទឹកជំនន់ដែលហូរបុកពីថៃនៅភូមិអូរនាង ដើម្បីយកគ្រឿងចក្រទៅកាយរំដោះទឹកឲ្យធ្លាក់ទៅទីផ្សេងៗវិញ ដោយខ្លាចប៉ះពាល់ដល់តំបន់ឧស្សាហកម្ម ព្រោះមានកម្មករបំរើការងារនៅទីនោះរាប់សិបនាក់ឯណោះ។ (កែសម្រួលដោយ ៖ បុប្ផា)
ចែករំលែកព័តមាននេះ