ខេត្តរតនគិរី ៖ កាលពីថ្ងៃទី១ កញ្ញា ឆ្នាំ២០១០ លោកអៀង សាវ៉េត នាយអធិការដ្ឋាន រដ្ឋបាលព្រៃឈើមេគង្គ បានដឹកនាំមន្ត្រីខណ្ឌរដ្ឋបាលព្រៃឈើរតនគិរី ចុះត្រួតពិនិត្យមើលផល-អនុផលព្រៃឈើ ដែលប្រមូលបានពីការឈូសឆាយដីសម្បទានសេដ្ឋកិច្ចក្នុងតំបន់១ របស់ក្រុមហ៊ុនក្រុងប៊ុក រតនគិរី អភិវឌ្ឍន៍កៅស៊ូ ស្ថិតនៅឃុំតាវែងលើ ស្រុកតាវែង ។ ជាមួយនឹងការចុះត្រួតពិនិត្យនេះ ក៏បានស្រាវជ្រាវរុករកឃើញ និងចាប់ឃាត់ឈើអារជ្រុងប្រភេទធ្នង់ នាងនួន និងគ្រញូងចំនួន២៨៥កំណាត់ ស្មើនឹងជាង៨៣ម៉ែត្រគូប ដែលជនល្មើសបានប្រមូលផ្តុំយកមកគរទុកនៅជាប់ទីតាំងរោងម៉ាស៊ីនអារឈើរបស់ក្រុមហ៊ុនខាងលើ ។
លោកវង សុក្រសិរី នាយខណ្ឌរដ្ឋបាលព្រៃឈើរតនគិរី បានបញ្ជាក់ប្រាប់ថា ឈើទាំងនេះត្រូវបានសមត្ថកិច្ចប្រមូល និងដឹកជញ្ជូនយកមករក្សាទុកនៅកន្លែងមានសុវត្ថិភាព ព្រមទាំងចងក្រងសំណុំរឿងតាមនីតិវិធីនៃច្បាប់ស្តីពីព្រៃឈើ ។ ជាមួយគ្នានេះ លោកអៀង សាវ៉េត បានបញ្ជាក់ថា យោងតាមបទបញ្ជារបស់លោកច័ន្ទ សារុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងលោកឆេង គឹមស៊ុន ប្រតិភូរាជរដ្ឋាភិបាលទទួលបន្ទុកជាប្រធារដ្ឋបាលព្រៃឈើ សមត្ថកិច្ចរដ្ឋបាលព្រៃឈើមូលដ្ឋាននឹងបន្តការរុករក និងបង្ក្រាបការធ្វើអាជីវកម្ម និងសន្និធិឈើខុសច្បាប់ទាំងនៅក្នុង និងក្រៅដីសម្បទានសេដ្ឋកិច្ចដទៃទៀត ក្នុងដែនសមត្ថកិច្ចរបស់ខ្លួនឱ្យដូចភ្លៀងរលឹម ៕
ចែករំលែកព័តមាននេះ