ខេត្តបាត់ដំបង ៖ បន្ទាប់ពីមន្ត្រីអ្នកនាំពាក្យកងរាជអាវុធហត្ថផ្ទៃប្រទេស លោកអេង ហ៊ី ចេញសេចក្ដីប្រកាសព័ត៌មានជាសាធារណៈ កាលពីថ្ងៃទី២០ កញ្ញា អំពីសំណុំរឿងលោកជួប ណូ…
ខេត្តបាត់ដំបង ៖ បន្ទាប់ពីមន្ត្រីអ្នកនាំពាក្យកងរាជអាវុធហត្ថផ្ទៃប្រទេស លោកអេង ហ៊ី ចេញសេចក្ដីប្រកាសព័ត៌មានជាសាធារណៈ កាលពីថ្ងៃទី២០ កញ្ញា អំពីសំណុំរឿងលោកជួប ណូ មេបញ្ជាការចាក់ភ្នែកលោកឈឿង សុផាត មេបញ្ជាការរងរបស់ខ្លួនស្ទើរខ្វាក់ភ្នែកម្ខាង ហើយបានចោទថា លោកមេបញ្ជាការរងរូបនេះស្រវឹងស្រា ហើយស្ទុះទៅវាយលោកមេបញ្ជាការរបស់ខ្លួននោះ ពេលនេះ លោកឈឿង សុផាត បានចេញមុខបំភ្លឺភ្លាមៗ ដោយច្រានចោលទាំងស្រុងនូវព័ត៌មានរបស់អ្នកនាំពាក្យផ្ទៃប្រទេស ។ សូមរំលឹកថា៖ «បាត់ឌីណាម៉ូឡានបាកុង»មេប៉េអឹមស្រុកសំឡូត ចាក់ភ្នែកមេប៉េអឹមរងរបស់ខ្លួន
លោកឈឿង សុផាត មេបញ្ជាការរងកងរាជអាវុធហត្ថស្រុកសំឡូត (ជនរងគ្រោះ) បានផ្ដល់បទសម្ភាសន៍ជាមួយកោះសន្តិភាព នៅព្រឹកថ្ងៃទី២១ កញ្ញា នេះថា នៅយប់កើតហេតុនោះ លោកមិនបានផឹកស្រាទេ ហើយក៏មិនបានទៅវាយលោកជួប ណូ ជាមេបញ្ជាការរបស់ខ្លួន ដូចការប្រកាសព័ត៌មានរបស់មន្ត្រីនាំពាក្យដែរ ។ លោកបានប្រាប់ថា លោកជួប ណូ ទេ ដែលផឹកស្រវឹងនៅយប់កើតហេតុនោះ ទើបមកបង្កហិង្សាលើរូបលោក ជាមួយនឹងការចោទលោកថា បានលួចដោះ«ឌីណាម៉ូ ឡានបាកុង» ។
ពាក់ព័ន្ធនឹងសំណុំរឿងហិង្សារវាងលោកជួប ណូ មេបញ្ជាការកងរាជអាវុធហត្ថស្រុកសំឡូត ជាមួយនឹងលោកឈឿង សុផាត មេបញ្ជាការរងនេះ លោកអេង ហ៊ី មន្ត្រីអ្នកនាំពាក្យកងរាជអាវុធហត្ថផ្ទៃប្រទេស បានសរសេរប្រកាសជួនដំណឹងនៅក្នុងបណ្ដាញសង្គមរបស់លោក កាលពីថ្ងៃទី២០ កញ្ញា ថា «ដំណើររឿង គឺមិនពិតដូចសារព័ត៌មានមួយចំនួន ដែលបានផ្សព្វផ្សាយកន្លងទៅនោះទេ» ។
មន្ត្រីនាំពាក្យរូបនេះ បានសរសេរដោយយោងលើរបាយការណ៍របស់លោកមាស សុវណ្ណ មេបញ្ជាការកងរាជអាវុធហត្ថខេត្តយ៉ាងដូច្នេះថា «រឿងនេះ កើតឡើងដោយសារលោកឈឿង សុផាត បានប្រព្រឹត្ត
ឱ្យមានកំហុស និងល្មើសវិន័យកងកម្លាំង ហើយលោកជួប ណូ បានសួរនាំអំពីកំហុសនោះ បែរជាលោក
ឈឿង សុផាត ចូលទៅវាយលោកជួប ណូ ខណៈដែលលោកឈឿង សុផាត ស្រវឹងស្រាផងដែរ» ។
លោកអេង ហ៊ី បានស្រង់របាយការណ៍លោកមេបញ្ជាការខេត្តមកសរសេរទៀតថា «ចំពោះរបួសនោះមិនមែនលោកជួប ណូ យកសោចាក់ភ្នែកទេ គឺមានសាក្សីឃើញ ពេលវាយតប់គ្នានោះ ។ រឿងនេះក៏មានការសម្របសម្រូលតាំងពីពេលកើតហេតុភ្លាមៗ ព្រោះជារឿងផ្ទៃក្នុង»។ ប៉ុន្តែលោកអេង ហ៊ី ក៏បានសុំទោសផង ដែលលោកមិនបានបកស្រាយរឿងនេះជូនសាធារណៈជនភ្លាមៗ ដោយសារជារឿងផ្ទៃក្នុងអង្គភាព តែបើករណីធ្ងន់ធ្ងរយើងនឹងអនុវត្តតាមច្បាប់ហើយ ។
ផ្ទុយពីរបាយការណ៍លោកមាស សុវណ្ណ មេបញ្ជាការខេត្ត ដែលរាយការណ៍ជួនលោកអេង ហ៊ី មន្ត្រីនាំពាក្យផ្ទៃប្រទេស លោកឈឿង សុផាត ដែលអះអាងថា ខ្លួនជាជនរងគ្រោះដោយសារលោកជួប ណូ ចាក់របួសភ្នែកម្ខាងបានបញ្ជាក់ប្រាប់កោះសន្តិភាពថា លោកជួប ណូ និងកូនជំនិតប៉ុន្មាននាក់ទៀត បាននាំគ្នាផឹកស៊ីស្រវឹងរហូតដល់យប់ ស្រាប់តែមកសួរនាំខ្លួន នៅទីបញ្ជាការកងរាជអាវុធហត្ថស្រុក ដោយចោទខ្លួនថា ជាអ្នកលួចដោះឌីណាម៉ូរថយន្តបាកុង ។
ពេលនោះ មានការប្រកែកគ្នា ស្រាប់តែលោកជួប ណូ បានកាន់សោឡានស្ទុះមកចាក់ភ្នែកខ្លួនខាងឆ្វេង បណ្ដាលឲ្យរងរបួសឈាមជោក ។ ហើយពេលនោះ ក៏មានការប្រតាយ ប្រតប់គ្នា តែត្រូវមន្ត្រីដែលផឹកស៊ីស្រវឹងជាមួយលោកជួប ណូ ស្ទុះមកចាប់ខ្លួនចេញ ។ លោកបានបញ្ជាក់បន្ថែមថា «រឿងនេះ មិនមែនខ្ញុំជាអ្នកបង្កទេ ហើយខ្ញុំក៏មិនបានផឹកស៊ីស្រវឹង ដូចការចុះផ្សាយរបស់មន្ត្រីនាំពាក្យដែរ គឺលោកជួប ណូ ទេ ជាអ្នកបង្កហេតុមុន ខណៈដែលលោកជួប ណូ នេះស្រវឹងស្រាជោកជាំ»។
សូមបញ្ជាក់ថា ករណីហិង្សារវាងលោក ជួប ណូ មេបញ្ជាការ ជាមួយលោកឈឿង សុផាត មេបញ្ជាការ
រង នេះ បានកើតឡើងកាលពីយប់ថ្ងៃទី១៣ កញ្ញា នៅក្នុងបញ្ជាការមូលដ្ឋានកងរាជអាវុធហត្ថស្រុកសំឡូត។ ប៉ុន្តែទើបត្រូវបែកធ្លាយ កាលពីប៉ុន្មានថ្ងៃមុននេះ ។ ជុំវិញការលើកឡើងនេះ កោះសន្តិភាពមិនអាចទំនាក់ ទំនងសុំការបំភ្លឺពីលោកជួប ណូ មេបញ្ជាការកងរាជអាវុធហត្ថស្រុកសំឡូតបានទេ នៅព្រឹកថ្ងៃទី២១ កញ្ញា រីឯលោកមាស សុវណ្ណ មេបញ្ជាការកងរាជអាវុធហត្ថខេត្ត ក៏មិនអាចទំនាក់ទំនងបានដែរ ដោយសារប្រព័ន្ធទូរស័ព្ទរបស់លោកជាប់រវល់គ្មានពេលទំនេរ ។
ប៉ុន្តែយ៉ាងនេះក្ដី លោកអេង ហ៊ី មន្ត្រីនាំពាក្យផ្ទៃប្រទេសបានប្រកាសថា លោកឧត្តមសេនីយ៍មេបញ្ជាការកងរាជអាវុធហត្ថលើផ្ទៃប្រទេស បានបញ្ជាឲ្យមានការត្រូតពិនិត្យហ្មត់ចត់ចំពោះករណីនេះ ដើម្បីបង្ហាញការពិត អ្នកដែលប្រព្រឹត្តនូវកំហុសឆ្គង ត្រូវទទូលទណ្ឌកម្មវិន័យកងកម្លាំង ។
ជាមួយគ្នានឹងសំណុំរឿងលួចដោះ «ឌីណាម៉ូ រថយន្តបាកុង» នេះដែរ បើតាមប្រភពព័ត៌មានបានឲ្យដឹងថា រថយន្តបាកុងចំនួន១០គ្រឿង ដែលកម្លាំងកងរាជអាវុធហត្ថរឹបអូស ក្រោយពីរកឃើញលាក់នៅក្នុងព្រៃ ដែលពាក់ព័ន្ធនឹងបទ ល្មើសព្រៃឈើនៅក្នុងស្រុកសំឡូត ហើយបានប្រមូលយកមករក្សាទុក នៅក្នុងបរិវេណដីក្រុមហ៊ុន «រដ្ឋសម្បត្តិ» ពេលនេះល្បីថា ត្រូវបានពួកចោរហារយលួចដោះ «ឌីណាម៉ូ និងដោះកង់ល្អៗអស់ជាច្រើនគ្រាប់ហើយ» ។
ប្រភពបានបង្ហើបថា ក្រុមចោរហាររយទាំងនោះ បានចូលលួចនៅយប់ថ្ងៃទី១២ និងទី១៣ កញ្ញា ដឹកតាមរថយន្តចេញដោយសុវត្ថិភាព ដែលគេសង្ស័យអាចមានលោកធំ ជាអ្នកបើកភ្លើងខៀវ បើទោះជាមានមន្ត្រីកងរាជអាវុធហត្ថដេកយាមទាំងយប់ទាំងថ្ងៃក្ដី ។
បើតាមប្រភពដែលគួរឱ្យជឿជាក់នេះបានបញ្ជាក់ថា មិនមែនត្រឹមតែលួចដោះឌីណាម៉ូ ឬកង់រថយន្តនោះទេ ពួកចោរអាចស៊ីរូងដល់គ្រឿងក្នុង និងគ្រឿងសំខាន់ៗនៅខាងក្រៅៗទៀតផង ។ ហើយអាចនឹងត្រូវបាត់បង់អ្វីៗផ្សេងទៀត ប្រសិនបើថ្នាក់លើមិនឆាប់ដុតកម្ទេចរថយន្តទាំង១០គ្រឿងនោះចោលទេ ។ (សម្រួល ដោយ៖ ស្រីណា)
ចែករំលែកព័តមាននេះ