ខេត្តសៀមរាប ៖ តាមការសន្និដ្ឋានពេលចាប់បានថ្មីៗថា សង្ស័យជាម៉ូតូចោរដែលលួចកាច់.កបានពីគ្រប់ទិសទីក្នុងខេត្ត ហើយយកមកលក់នៅទីនេះដែលមានអ្នកចាំទិញដែលគេឱ្យឈ្មោះថា ទទួលផលចោរកម្ម ។
សូមបញ្ជាក់ នៅថ្ងៃទី១៩ កញ្ញា កម្លាំងសមត្ថកិច្ចនៃស្នងការដ្ឋាននគរបាលខេត្តសៀមរាប និងមានកិច្ចសហការជាមួយកម្លាំងនគរបាលព្រហ្មទណ្ឌកម្រិតស្រាលក្រសួងមហាផ្ទៃ ក្រោមការចូលរួមផ្ទាល់ពីលោកឧត្តមសេនីយ៍ទោ ប៉ុល រតនា និង លោកឧត្តមសេនីយ៍ទោ នឹម ច័ន្ទតាណា អនុប្រធាននាយកដ្ឋានព្រហ្មទណ្ឌ បានបង្ក្រាបទីតាំងទទួលផលចោរកម្មដ៏ធំមួយកន្លែង ដោយបានធ្វើការរឹបអូសម៉ូតូចំនួន៥៧គ្រឿង និងឃាត់ខ្លួនមនុស្ស២នាក់ ។
មន្ត្រីសមត្ថកិច្ចឲ្យដឹងជាបឋមថា ម៉ូតូដែលដកហូតចំនួន៥៧គ្រឿងនេះ ពិនិត្យឃើញមានកាតគ្រីតែ២គ្រឿងប៉ុណ្ណោះ ។ ចំណែក៥៥គ្រឿងអត់ឯកសារទាំងអស់ និងជាម៉ូតូដែលចោរលួចយកទៅលក់(សង្ស័យ កាច់ក) ព្រោះឃើញមានស្នាមត្រង់កម៉ូតូ ។
ការបង្ក្រាបរបស់សមត្តកិច្ចធ្វើឡើង នៅក្នុងទីរួមខេត្តតែម្តង ដែលម៉ូតូទាំងនោះត្រូវបានគេដាក់តម្រៀប នៅក្នុងដីឡូត៍មួយកន្លែង ដោយយកដីឡូត៍ធ្វើឃ្លាំង ស្ថិតក្នុងភូមិវត្តស្វាយ សង្កាត់សាលាកំរើក ក្រុងសៀម រាប ។ ទោះបីជាបែបណាក្តី មិនទាន់បានដឹងថា តើម៉ូតូដែលសង្ស័យនេះ គេទិញតាមវិធីណា ហើយអ្នកយកមកលក់មានសមាសភាពបែបណា ?
ព័ត៌មានថ្មីទៀត នឹងមានផ្សាយជូននៅពេលក្រោយ គឺពេលដែលម្ចាស់ឃ្លាំងនេះសារភាព ។ ចំណែកសមត្ថកិច្ចកំពុងចាត់ការនៅឡើយទេ សូម្បីអ្នកកាសែតក៏កំពុងតាមដានព័ត៌មានពិតនៅឡើយ។ (សម្រួលដោយ៖ ស្រីណា)
ចែករំលែកព័តមាននេះ