ខេត្តបាត់ដំបង ៖ ជំនួបរវាងលោកប្រាស៊ិត សែនរុងរឿង អគ្គលេខាធិការសហព័ន្ធផ្សព្វផ្សាយសារព័ត៌មានអាស៊ាន មកពីប្រទេសថៃ ជាមួយលោកខៀវ កាញ៉ារីទ្ធ រដ្ឋមន្ត្រីក្រសួងព័ត៌មាន បានប្រព្រឹត្តទៅនៅទីស្តីការក្រសួងព័ត៌មាន កាលពីវេលាម៉ោង១០ព្រឹកថ្ងៃទី១៩ ខែកញ្ញា ឆ្នាំ២០១៩ ។
ក្នុងជំនួបនោះដែរ លោកប្រាស៊ិត សែនរុងរឿង បានបញ្ជាក់ថា ដោយបានសហការគ្នាលើវិស័យព័ត៌មានជាមួយកម្ពុជា ដែលមានតាំងពីឆ្នាំ២០០៣មកនោះ ខាងភាគីថៃ បានបន្សល់ទុកស្នាដៃសហការរួមគ្នាពង្រឹងសន្តិភាព និងជំរុញវិស័យសេដ្ឋកិច្ចផ្សារភ្ជាប់តាមព្រំដែនខេត្តមៀយ៉ាវឌី ប្រទេសភូមា ដោយឆ្លងកាត់ប្រទេសថៃ ភ្ជាប់មកកម្ពុជាក្នុងខេត្តស្រះកែវ ទល់មុខនឹងខេត្តបន្ទាយមានជ័យដើម្បីលើកស្ទួយការអភិវឌ្ឍនៅកម្ពុជាបន្ថែមទៀត ។
លោកបានបន្តថា សុំឲ្យមានការលើកទឹកចិត្តដល់អ្នកកាសែតវ័យចំណាស់ ដែលនៅសល់តិចតួចបំផុត ពីសម័យមានសង្គ្រាមនៅកម្ពុជា និងរួមគ្នាបន្តសហការលើវិស័យព័ត៌មានដោយបានជួយកាត់បន្ថយបញ្ហា កន្លងមកនៅតំបន់ប្រាសាទព្រះវិហារ និងតាមខ្សែបន្ទាត់ព្រំដែនផ្សេងៗទៀត ពីមានច្រើនមកនៅតិច ពីមានតិចឲ្យស្ងប់ស្ងាត់ ហើយរួមគ្នាជំរុញវិស័យសេដ្ឋកិច្ចនៅតាមព្រំដែនឲ្យមានការកើនឡើងបន្ថែមទៀត សំខាន់ច្រកសេដ្ឋកិច្ចក្នុងខេត្តស្រះកែវ ទល់មុខខេត្តបន្ទាយមានជ័យរបស់កម្ពុជា ។
បន្ទាប់មកលោករដ្ឋមន្ត្រី ខៀវ កាញារីទ្ធ បានឯកភាពចំពោះសំណើខាងលើ និងសុំឲ្យខាងភាគីថៃឆាប់បញ្ជូនឈ្មោះមកយ៉ាងប្រញាប់ដើម្បីរៀបចំបញ្ជូនតាមតម្រូវការ ហើយក៏បានបង្ហាញគំរោងចុះបើកកម្មវិធីធម្មយាត្រាប៉ូគីយ៉ា ដើម្បីលើកស្ទួយវិស័យព្រះពុទ្ធសាសនារួមគ្នា៥ប្រទេសនៅពេលខាងមុខនេះ ដោយចាប់ផ្តើមចេញពីខេត្តឈៀងរ៉ាយ ប្រទេសថៃ ឆ្លងចូលទៅប្រទេសភូមា រួចបន្តទៅប្រទេសឡាវ ដោយឆ្លងកាត់ប្រទេសវៀតណាម ហើយត្រូវមកបញ្ចប់នៅប្រទេសកម្ពុជា ៕ (កែសម្រួលដោយ ៖ ធីតា)
ចែករំលែកព័តមាននេះ