រាជធានីភ្នំពេញ ៖ មកទល់ពេលនេះ វត្តមានសហព័ន្ធខ្មែរកីឡាហាប់គីដូ ត្រូវគេឃើញពង្រីកសកម្មភាពកាន់តែប្រសើរ ដោយបានរៀបចំការប្រកួតផ្លូវការជាលើកដំបូងរបស់ខ្លួន កាលពីប៉ុន្មានខែមុនដើម្បីលើកទឹកចិត្ត និងវាស់ស្ទង់សមត្ថភាពកីឡាករសម្រាប់ការប្រមូលផ្ដុំអ្នកខ្លាំង ។
កីឡានេះមានស្នៀតកាច់ការពារខ្លួន ជាវិញ្ញាសាដែលសហព័ន្ធដាក់ឲ្យកីឡាករកីឡាការិនីប្រ កួតជាចម្បង ។ ក្នុងនោះ ជំហានទី១ក្នុងការរៀបចំ និងចូលរួមប្រកួតទ្រង់ទ្រាយធំនៅ ថ្ងៃអនាគត ត្រូវគេកត់សម្គាល់ថា រកបានអ្នកមានសមត្ថភាព និងបច្ចេកទេសល្អៗ ដែលធ្វើឲ្យគេមើលឃើញពីភាពរឹងមាំទាំងកម្លាំងកាយ ភាពស្វាហាប់ និងភាពក្លាហានរបស់អ្នកជាប់ចំណាត់ថ្នាក់នោះផង។
អគ្គលេខាធិការសហព័ន្ធខ្មែរកីឡាហាប់គីដូ លោក គង់ ចាន់ធីណា បានលើកឡើងថា កីឡាហាប់គីដូកំពុងចាប់ផ្ដើមវាយលុយការចាប់អារម្មណ៍របស់មហាជន ដោយការជ្រើសរើសជើងឯកលើវិញ្ញាសាបង្ហាញស្នៀតកាច់ការពារខ្លួនបានបញ្ចប់នាពេលកន្លងមក ធ្វើឲ្យលោកហា៑នវាយតម្លៃថា កម្រិតសមត្ថភាពនិងបច្ចេកទេសរបស់កីឡាករមានការរីកចម្រើនគួរឲ្យកត់សម្គាល់ ។ អ្វីដែលលោកនៅទាស់ចិត្តនោះ គឺកត្តាកម្លាំងកាយ ភាពស្វាហាប់នៅរាងស្ទើរបន្តិច ដោយសារតែខ្សោយកម្លាំង និងខ្វះភាពក្លាហាន ។
លោក គង់ ចាន់ធីណា លើកឡើងថា បើវាយតម្លៃពីកម្រិតបច្ចេកទេសរបស់កីឡាករកីឡាការិនីសម្រាប់ក្រុមឈុតធំ ដែលខាងសហព័ន្ធជ្រើសរើសបាន គឺមានការកើនឡើងប្រមាណ៦០ ាគរយ តែសម្រាប់ក្រុមឈុតតូចកើនបានប្រមាណ៥៥ភាគរយប៉ុណ្ណោះ ព្រោះកីឡាករឈុតតូចនៅខ្សោយកម្លាំងកាយ ខ្វះភាពស្វាហាប់ និងភាពក្លាហានក្នុងការសម្តែង ។
ទោះជាយ៉ាងណា លោកបានបង្ហាញពីការកោតសរសើរចំពោះធនធានដែលមានប្រចាំសហព័ន្ធទាំងអស់ ដោយសារ មានអ្នកខ្លះហាត់បានតែថ្ងៃសៅរ៍-អាទិត្យ ហើយ អ្នកខ្លះហាត់ពីថ្ងៃចន្ទ
ដល់ថ្ងៃសុក្រ តែធ្វើបានល្អក្នុងការប្រកួត បើទោះជាការប្រកួតនោះរៀបចំបែបប្រថុចញ៉ុចក្តី ។
លោកថ្លែងថា ក្រោយពីបញ្ចប់ការប្រកួតលើកដំបូងប្រចាំសហព័ន្ធ កាលពីថ្ងៃទី១៨ ខែសីហាកន្លងទៅនៅពហុកីឡដ្ឋានជាតិអូឡាំពិក លោកមើលឃើញថា ធនធានកីឡាករហាប់គីដូ ទាំងស្រីទាំងប្រុស ដ្បិតមិនទាន់ល្អ១០០ភាគរយ ធៀបនឹងកីឡាករភាគច្រើននៅក្រៅស្រុក ជាពិសេសគឺប្រទេសដើម ជប៉ុន ប៉ុន្តែអាចស្ថិតក្នុងទីតាំងសមស្របបាន ។
លោក គង់ ចាន់ធីណា បន្តថា លោកមិនធ្លាប់រំពឹងថាកីឡាមួយនេះនឹងមានអ្នកប្រកួតលើកទី១ និងអាចរៀបចំការប្រកួតជាលើកទី២ផងនោះ ប៉ុន្តែចុងក្រោយគឺសហព័ន្ធនៅតែទទួលបានជោគជ័យសម្រាប់ការប្រកួតជ្រើសរើសជើងឯកលើកលើកទី១ ដែលសហព័ន្ធនឹងបន្តបើកការប្រកួតជាផ្លូវការឲ្យបានទៀងទាត់រៀងរាល់មួយឆ្នាំម្ដង ។ ការប្រកួតដែលបានធ្វើឡើងជាការវាស់ស្ទង់សមត្ថភាពមួយដ៏សំខាន់ ដែលខាងសហព័ន្ធចង់បាន ។ ក្រៅពីវាស់ស្ទង់កម្រិត សមត្ថភាព និងបច្ចេកទេសរបស់កីឡាករកីឡាការិនី ការផ្តល់ឱកាសឲ្យកីឡាករបានបញ្ចេញ សមត្ថភាពបន្ទាប់ពីហ្វឹកហាត់អស់រយៈពេលជាច្រើនឆ្នាំ ក៏ជាគោលបំណងនៃព្រឹត្តិការណ៍នេះ ដែរ ។ លើសពីនេះ វាគឺជាជំហានមួយមុនឈានទៅរៀបចំការប្រកួតធំៗនាពេលអនាគត ។
លោក គង់ ចាន់ធីណា បានប្តេជ្ញាថា លោកនឹងខិតខំកៀរគររកជំនួយឧបត្ថម្ភពីក្រុមហ៊ុន ដៃគូសហការ និងសប្បុរសជននានា រៀបចំការប្រកួត ទ្រង់ទ្រាយធំ ដើម្បីពង្រឹងសមត្ថភាពកីឡាករ សម្រាប់ត្រៀមចូលរួមការប្រកួតជាលក្ខណៈអន្តរជាតិនាពេលខាងមុខ ។ ការប្រកួតលើកដំបូងនោះ ទទួលបានជោគជ័យលើសពីការរំពឹង ព្រោះមានកីឡាករ កីឡាការិនីជិត៦០នាក់ចូលរួម ដោយពួកគេប្រកួតលើវិញ្ញាសាតែមួយប៉ុណ្ណោះ គឺការបង្ហាញស្នៀតកាច់ការពារខ្លួន ។
ដោយឡែកនៅចុងឆ្នាំ២០១៩នេះ សហព័ន្ធខ្មែរកីឡាហាប់គីដូនឹងរៀបចំការប្រកួតមួយ ទៀតដែលមានវិញ្ញាសា៤ទៅ៥ ដើម្បីផ្ដល់ឱកាសឲ្យកីឡាករទាំងចាស់ទាំងថ្មី បានដណ្ដើមមេដាយក្នុង ក្របខ័ណ្ឌប្រចាំសហព័ន្ធផងដែរ ៕ (កែសម្រួលដោយ ៖ បុប្ផា)
ចែករំលែកព័តមាននេះ