ប្រទេសជប៉ុន ៖ អតីតមេដឹកនាំ៣នាក់របស់ក្រុមហ៊ុនTEPCOជប៉ុន កាលពីថ្ងៃទី១៩កញ្ញា ត្រូវបានតុលាការក្រុងតូក្យូលុបចោលការចោទប្រកាន់ដោយសំអាងថា ពួកគេមិនអាចជាអ្នកមានទោសដោយសារបណ្ដាផលវិបាកនៃគ្រោះមហន្តរាយនុយក្លេអ៊ែរ ដែលកើតមានកាលពីជាង៨ឆ្នាំមុន ក្រោយការរញ្ជួយដីនិងស៊ូណាមិដ៏ធំសម្បើមឡើយ។
អតីតអ្នកទទួលខុសត្រូវទាំង៣រូបនោះ នៃក្រុមហ៊ុនធ្វើអាជីវកម្មមជ្ឈមណ្ឌលនុយក្លេអ៊ែរ ហ្វូគូសីុម៉ាដាយអីុជី ដែលរងការបំផ្លាញដោយស៊ូណាមិ កាលពីថ្ងៃទី១១មីនាឆ្នាំ២០១១ ជាមនុស្សតែ៣នាក់ដែលទទួលការកាត់ទោស ក្នុងក្របខណ្ឌនៃគ្រោះមហន្តរាយនុយក្លេអ៊ែរដ៏អាក្រក់បំផុតនោះ បន្ទាប់ពីគ្រោះមហន្តរាយនុយក្លេអ៊ែរនៅTHERNOBYLសហភាពសូវៀតកាលពីឆ្នាំ១៩៨៦។ អ្នកទាំង៣ទទួលការចោទប្រកាន់ពីបទធ្វេសប្រហែស ដែលនាំឲ្យមានមនុស្សស្លាប់ដោយមិនអើពើ ចំពោះព័ត៌មាននានាដែលលើកពីគ្រោះថ្នាក់ស៊ូណាមិ ដែលលើសពីសមត្ថភាពធន់បានរបស់មជ្ឈមណ្ឌលនុយក្លេអ៊ែរនោះ។
តុលាការបានកាត់ទោសដាក់គុក៥ឆ្នាំ ប្រឆាំងប្រធានក្រុមប្រឹក្សាភិបាលរបស់ក្រុមហ៊ុនTOKYO ELECTRIC POWER(TEPCO) ពេលមានសោកនាដកម្មលោកTSUNEHISA KATSUMATA អាយុ៧៩ឆ្នាំ ព្រមទាំងអតីតអនុប្រធានអគ្គនាយក២រូប លោកSAKAE MUTO អាយុ៦៩ឆ្នាំនិងលោកICHIRO TAKEKUROអាយុ៧៣ឆ្នាំ។
ការកាត់ទោសអតីតមេដឹកនាំក្រុមហ៊ុនទាំង៣រូបនោះ ផ្អែកលើការចោទពីការស្លាប់អ្នកជំងឺ៤៤នាក់ នៃមន្ទីរពេទ្យហ្វូតាបាស្ថិតនៅចម្ងាយតែប៉ុន្មានគីឡូម៉ែត្រពីមជ្ឈមណ្ឌលនុយក្លេអ៊ែរ ពេលជម្លៀសពួកគេចេញជាបន្ទាន់៕ (កែសម្រួលដោយ ៖ បុប្ផា)
ចែករំលែកព័តមាននេះ