ខេត្តកំពត ៖ តាមសេចក្តីរាយការណ៍បឋមបានឱ្យដឹងថា មានករណីបុរសជាអ្នកទោសម្នាក់បានរត់គេចខ្លួនបាត់ស្រមោលកាលពីវេលាម៉ោង៩ព្រឹកថ្ងៃទី១២ ខែកញ្ញា រហូតមកដល់ថ្ងៃទី១៩ កញ្ញា នេះ នៅមិនរកឃើញនៅឡើយទេ ។ ពាក់ព័ន្ធនឹងករណីនេះ ត្រូវបានប្រធានពន្ធនាគារខេត្តបានអះអាងថា កំពុងតាមចាប់ខ្លួនយកមកវិញផងដែរ ។
ទណ្ឌិតម្នាក់ដែលបានរត់ចេញពីពន្ធនាគារឈ្មោះឃឹម ឃន ភេទប្រុស អាយុ៥០ឆ្នាំ នៅភូមិដុំផ្ដៅ ឃុំត្រពាំងភ្លាំង ស្រុកឈូកខេត្តកំពត ជាប់ពាក់ព័ន្ធបទល្មើសប្រើហិង្សាទៅលើអ្នកកាន់កាប់អចនវត្ថុដោយសុច្ចរិត ត្រូវតុលាការកំណត់ទោស១ឆ្នាំ៦ខែ គិតចាប់តាំងពីថ្ងៃចាប់ខ្លួនកាលពីថ្ងៃទី២៥ មីនា ឆ្នាំ២០១៩ ។
តាមប្រភព័ត៌មានបានអោយដឹងថា នៅព្រឹកថ្ងៃទី១២ ខែកញ្ញា អ្នកទោសមួយក្រុមបានចេញមកធ្វើពលកម្មនៅមុខពន្ធនាគារ ដោយមានអ្នកយាមការពារទទួលខុសត្រូវគឺលោកលី សាយ ជាអនុប្រធានពន្ធនាគារខេត្ត ប៉ុន្តែមិនដឹងជាយ៉ាងម៉េចនោះទេ ស្រាប់តែទណ្ឌិតឈ្មោះឃឹម ឃន រត់គេចខ្លួនបាត់ប្រហែលមួយម៉ោងទើបមានការភ្ញាក់ផ្អើលកើតឡើងតែម្តង។
តាមប្រភពមួយផ្សេងទៀតបានឱ្យដឹងថា មុនពេលកើតហេតុ ទណ្ឌិតឈ្មោះឃឹម ឃន បាននិយាយទូរសព្ទ័ទៅក្រុមគ្រួសារសាច់ញាតិ បន្ទាប់មកក៏រត់គេចខ្លួនទៅបាត់តែម្ដង។
លោកឯម បូរ ប្រធានពន្ធនាគាខេត្តកំពត បានប្រាប់ឱ្យដឹងកាលពីរសៀលថ្ងៃទី១៩ ខែកញ្ញានេះថា អ្នកទោសម្នាក់ខាងលើដែលរត់គេចខ្លួនបាត់នោះ គឺកំពុងតែតាមចាប់ខ្លួនយកមកវិញផងដែរ ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕ (កែសម្រួលដោយ ៖ ធីតា)
ចែករំលែកព័តមាននេះ