ឥទ្ធិពលអវិជ្ជមានមួយរបស់ប្រព័ន្ធសង្គម គឺពេលដែលមានរឿងមិនល្អកើតមានឡើងវានឹងត្រូវបានរីកសាយយ៉ាងលឿនរហូតដល់បង្កការប៉ះពាល់ដល់មនុស្ស និងអាជីវកម្មណាមួយ ។ បើទោះជាវាជារឿងពិតក៏ដោយអ្នកត្រូវតែមានវិធីសាស្ត្រក្នុងការគ្រប់គ្រងព័ត៌មានទាំងនេះ ។ ប្រសិនបើអ្នកជួបប្រទះបុគ្គលណាមួយដែលបង្ខូចកេរ្តិ៍ឈ្មោះរបស់អ្នក ឬអាជីវកម្មអ្នកលើប្រព័ន្ធសង្គម អ្នកគួរតែអនុវត្តមានជំហានខាងក្រោមនេះ ៖
១. ស្តាប់សិន ៖ ពេលដែលអ្នកមើលឃើញ ឬស្តាប់ឮការអះអាងដែលប៉ះពាល់ដល់អ្នក និងអាជីវកម្មរបស់អ្នក អ្នកគួរតែស្តាប់ជាមុនសិន ។ ចូរចងចាំថា អ្នកត្រូវស្តាប់ដើម្បីយល់ មិនមែនស្តាប់តែអង្គុយគិតពីការការពារខ្លួនវិញទេ ។ អ្នកគួរតែសួរនាំអ្នកដែលផ្តើមអំណះអំណាងទាំងនេះដោយផ្ទាល់ ឬតាមសារដើម្បីយល់ឲ្យបានច្បាស់ថា មូលហេតុអ្វីទើបពួកគេមានអំណះអំណាងដូច្នេះ ។ ភាពបើកទូលាយ និងស្ងប់ចិត្តរបស់អ្នកអាចធ្វើឲ្យភាគីម្ខាងទៀតផ្លាស់ប្តូរទស្សនៈរបស់ពួកគេបាន ។
២. ទទួលស្គាល់កំហុសឆ្គង ឬទទួលយកទស្សនៈរបស់ពួកគេ ៖ ពេលដែលអ្នកស្តាប់ភាគីម្ខាងទៀតហើយ អ្នកមានជម្រើសពីរ ។ ទីមួយគឺអ្នកសុំអភ័យទោស រួចងាកទៅចាប់ផ្តើមការសន្ទនាទៅលើដំណោះស្រាយបញ្ហាដែលអ្នក ឬអាជីវកម្មអ្នកបានបង្កឡើង ។ ទីពីរគឺមិនទទួលស្គាល់កំហុស ប៉ុន្តែពន្យល់ពួកគេពីទស្សនៈរបស់អ្នកវិញ ។
ឧទាហរណ៍ដូចជា អាជីវកម្មរបស់អ្នកបង្កើតកម្មវិធីទូរស័ព្ទមួយ ហើយអតិថិជនរបស់អ្នករិះគន់ថាទូរស័ព្ទរបស់ពួកគេមិនអាចប្រើវាបានព្រោះវាមានសេរ៊ីទាប ។ ប្រាកដណាស់ អ្នកមិនអាចនិយាយប្រាប់ពួកគេថា គឺមកពីពួកគេមិនព្រមទិញទូរស័ព្ទថ្មីទេ តែអ្នកត្រូវពន្យល់ពីមូលហេតុដែលអ្នកមិនអាចបង្កើតកម្មវិធីដែលគ្រប់ទូរស័ព្ទអាចប្រើបាន ដូចជាកង្វះធនធាន ឬបច្ចេកទេសជាដើម ។
៣. រកដំណោះស្រាយពិតប្រាកដ ៖ នរណាក៏មិនចូលចិត្តក្រុមហ៊ុន ឬអាជីវកម្មដែលស្តាប់លឺពីការរិះគន់ហើយតែធ្វើមិនដឹងដូចមិនមានរឿងអ្វីកើតឡើងដែរ ។ ចូរចងចាំថាមនុស្សចូលចិត្តពេលដែលគំនិតរបស់ពួកគេត្រូវបានឲ្យតម្លៃ ហើយការដែលអ្នកខិតខំព្យាយាមស្វែងរកដំណោះស្រាយ និងឆ្លើយតបដោយបើកទូលាយដល់អតិថិជនដែលរិះគន់ពីអ្នកមានតែជួយដល់រូបភាព និងកេរិ៍្តឈ្មោះអាជីវកម្មអ្នកបន្ថែមប៉ុណ្ណោះ ៕ កែសម្រួលដោយ ៖សុឃាក់
ចែករំលែកព័តមាននេះ