រាជធានីភ្នំពេញ ៖ សង្ស័យឆ្លងចរន្តអគ្គិសនីបង្កជាអគ្គិភ័យឆាបឆេះឃ្លាំងស្តុកក្រណាត់យ៉ាងសន្ធោសន្ធៅ ក្នុងរោងចក្រកាត់ដេរសំលៀកបំពាក់មួយកន្លែង តែត្រូវបានសមត្ថកិច្ចនិងអាជ្ញាធរហៅរថយន្តពន្លត់អគ្គីភ័យចុះមកជួយអន្តរាគមន៍ទាន់ពេលវេលា និងបង្កឲ្យមានការភ្ញាក់ផ្អើលកើតឡើងកាលពីវេលាម៉ោង១០និង៣០នាទីយប់ថ្ងៃទី១៨ ខែកញ្ញា ឆ្នាំ២០១៩ នៅឃ្លាំងស្តុកក្រណាត់ក្នុងរោងចក្រកាត់ដេរសំលៀកបំពាក់យីហោ «ឌីង…
រាជធានីភ្នំពេញ ៖ សង្ស័យឆ្លងចរន្តអគ្គិសនីបង្កជាអគ្គិភ័យឆាបឆេះឃ្លាំងស្តុកក្រណាត់យ៉ាងសន្ធោសន្ធៅ ក្នុងរោងចក្រកាត់ដេរសំលៀកបំពាក់មួយកន្លែង តែត្រូវបានសមត្ថកិច្ចនិងអាជ្ញាធរហៅរថយន្តពន្លត់អគ្គីភ័យចុះមកជួយអន្តរាគមន៍ទាន់ពេលវេលា និងបង្កឲ្យមានការភ្ញាក់ផ្អើលកើតឡើងកាលពីវេលាម៉ោង១០និង៣០នាទីយប់ថ្ងៃទី១៨ ខែកញ្ញា ឆ្នាំ២០១៩ នៅឃ្លាំងស្តុកក្រណាត់ក្នុងរោងចក្រកាត់ដេរសំលៀកបំពាក់យីហោ «ឌីង លីងហ្គាមិន ឯ.ក» ស្ថិតនៅភូមិជម្ពូវ័ន២ សង្កាត់ចោមចៅទី៣ ខណ្ឌពោធិ៍សែនជ័យ ។
តាមប្រភពព័ត៌មានពីលោកចៅសង្កាត់ចោមចៅទី៣បានអោយដឹងថា នៅមុនពេលកើតហេតុ មានបុគ្គលិកក្រុមហ៊ុនរោងចក្រកាត់ដេរសំលៀកបំពាក់ខាងលើបានទាក់ទងតាមទូរស័ព្ទប្រាប់លោកថា មានអគ្គីភ័យបានឆាបឆេះនៅឃ្លាំងស្តុកក្រណាត់ក្នុងរោងចក្រកាត់ដេរសំលៀកបំពាក់ខាងលើ ដោយសារឆ្លងចរន្តអគ្គិសនី បន្ទាប់មកលោកបានទាក់ទងទៅកំលាំងនគរបាលប៉ុស្តិ៍ចោមចៅទី៣ និងផ្នែករថយន្តពន្លត់អគ្គីភ័យរបស់ស្នងការរាជធានីភ្នំពេញដើម្បីឱ្យចុះមកជួយអន្តរាគមន៍ពន្លត់ភ្លាមៗផងដែរ ។
តាមប្រភពដដែលបន្តទៀតថា រថយន្ដពន្លត់អគ្គីភ័យបានមកដល់កន្លែងកើតហេតុភ្លាមៗផងដែរ ដើម្បីបាញ់ទឹកពន្លត់ ដោយមានការសហការគ្នាពីរថយន្ដពន្លត់អគ្គីភ័យ រួមមានរថយន្តពន្លត់អគ្គីភ័យរបស់ស្នងការរាជធានីភ្នំពេញ និងរថយន្តពន្លត់អគ្គីភ័យរបស់កងរាជអាវុធហត្ថរាជធានីភ្នំពេញ និងរថយន្តពន្លត់អគ្គីភ័យរបស់ស្រាបៀរកម្ពុជា ដោយប្រើពេល ពន្លត់អស់រយៈពេលចំនួន១ម៉ោង គឺចាប់ពីម៉ោង១០និង៣០នាទី រហូតដល់ម៉ោង១១និងង៣០នាទីថ្ងៃដដែល ទើបភ្លើងបានរលត់ទៅវិញ ។
ក្នុងហេតុការណ៍ខាងលើនេះ រថយន្តពន្លត់អគ្គីភ័យមកជួយអន្តរាគមន៍មានចំនួន៧រថយន្ដ ក្នុងនោះមានរថយន្តពន្លត់អគ្គិភ័យរបស់នគរបាលរាជធានីភ្នំពេញចំនួន៤គ្រឿង និងរថយន្តពន្លត់អគ្គីភ័យរបស់កងរាជអាវុធហត្ថរាជធានីភ្នំពេញចំនួន២គ្រឿង និងរថយន្តពន្លត់អគ្គីភ័យរបស់ស្រាបៀរកម្ពុជាចំនួន១គ្រឿង ។
ចំពោះមូលហេតុដែលបង្កឲ្យឆាបឆេះឃ្លាំងស្តុកក្រណាត់ក្នុងរោងចក្រខាងលើ ត្រូវបានសមត្ថកិច្ចសន្និដ្ឋានជាជំហានដំបូងថា បណ្តាលមកពីទុស្សេខ្សែភ្លើង ចំណែកការខូចខាតមិនទាន់ដឹងថាអស់ចំនួនប៉ុន្មាននៅឡើយទេ តែមិនបង្កឲ្យមនុស្សណាម្នាក់រងរបួសនោះដែរ ៕ (កែសម្រួលដោយ ៖ ធីតា)
ចែករំលែកព័តមាននេះ