ខេត្តបាត់ដំបង ៖ ខណៈទឹកលិចស្ទឹងគ្រញូងនៅក្នុងស្រុកសំឡូតនោះ បានធ្លាក់មកដល់ក្រុងបាត់ដំបងហើយ ដែលធ្វើឱ្យតាមភូមិមួយចំនួនត្រូវកងកម្លាំងប្រដាប់អាវុធ ចុះជួយជម្លៀសឡើងមកគោក ដើម្បីរកទីទួលមានសុវត្ថិភាពជាបន្តបន្ទាប់ គិតចាប់ពីម៉ោង៧ព្រឹកថ្ងៃទី១៧ កញ្ញា នេះ…
ខេត្តបាត់ដំបង ៖ ខណៈទឹកលិចស្ទឹងគ្រញូងនៅក្នុងស្រុកសំឡូតនោះ បានធ្លាក់មកដល់ក្រុងបាត់ដំបងហើយ ដែលធ្វើឱ្យតាមភូមិមួយចំនួនត្រូវកងកម្លាំងប្រដាប់អាវុធ ចុះជួយជម្លៀសឡើងមកគោក ដើម្បីរកទីទួលមានសុវត្ថិភាពជាបន្តបន្ទាប់ គិតចាប់ពីម៉ោង៧ព្រឹកថ្ងៃទី១៧ កញ្ញា នេះ ។ ទឹកបានឡើងមកខ្លាំងតាំងពីយប់មក លោកឧត្តមសេនីយ៍ត្រី សួន សុន នាយកសាលាពលទាហានទី៥ បានចាត់កម្លាំងក្នុងសាលាពលទាហានចំនួន២៥នាក់ ដែលដឹកនាំដោយលោកវរសេនីយ៍ត្រី ដួង តារា នាយករងសាលាពលទាហានទី៥ ចុះជួយសង្គ្រោះប្រជាជនដែលជួបគ្រោះទឹកជំនន់ក្នុងភូមិបត់សាលាក្នុង ឃុំឈើទាល ស្រុកបាណន់ ខេត្តបាត់ដំបង មានចំនួន៦គ្រួសារ ត្រូវជម្លៀសជាបន្ទាន់ ដើម្បីរកទីទួលមានសុវត្ថិភាព ហើយកំពុងបន្តទៅកន្លែងផ្សេងទៀតដែលកំពុងជួបការលំបាកទឺកជំនន់នេះ ។
អង្គភាពកងទ័ពនៅតំបន់សំឡូត បានរាយការណ៍មកថា មានពលរដ្ឋជាង២០គ្រួសារត្រូវបានជម្លៀសខ្លួនចេញពីលំនៅឋាន ក្នុងឃុំចំនួន៤ ក្នុងស្រុកសំឡូត ដោយសាជំនន់ទឹកភ្លៀងកំពុងហក់ឡើងខ្លាំង ត្រូវបានជម្លៀសខ្លួនចេញពីលំនៅដ្ឋាន ក្នុងឃុំចំនួន០៤ ក្នុងស្រុកសឡូត ខណះមួយថ្ងៃចុងក្រោយ គិតត្រឹមថ្ងៃទី១៦ កញ្ញា មានភ្លៀងធ្លាក់មួយមេយ៉ាងខ្លាំង នៅប៉ែកខាងលើក្នុងស្រុកសំឡូតត ំបន់ជាប់ព្រំដែនកម្ពុជាថៃ ទើបបង្កជាទឹកជំនន់ធ្វើអោយឃុំចំនួន៤ក្នុងស្រុកសំឡូត រងផលប៉ះពាល់ខ្លាំងរហូតបាក់ស្ពានយោលរសាត់តាមទឹកនិងផ្លូវមួយចំនួនក៏ត្រូវបានលិចធ្វើដំណើរមិនបានបង្ខំអោយពលរដ្ឋជាង២០គ្រួសារ បានជម្លៀសខ្លួនចេញពីលំនៅឋានទៅរកទីទួលសុវត្តិភាពមួយរយះ ហើយនៅព្រឹកថ្ងៃទី១៧ ខែកញ្ញាឆ្នាំ២០១៩ នេះកាកបាទក្រហមរបស់ខេត្តបាត់ដំបង បានដឹកនាំជំនួយ និងកងកម្លាំងចុះទៅជួយជាបន្តទៀត នៅក្នុងស្រុកសំឡូត ។
លោកផេង សិទ្ធី អភិបាលក្រុងបាត់ដំបងបានថ្លែងថា ក្រោយពីមានជំនន់ទឹកភ្លៀងខ្លាំងយ៉ាងគំហុក រហូតមកដល់ថ្ងៃទី១៧ កញ្ញា នេះ ត្រូវបានមន្ត្រីធនធានទឹកនិងឧតុនិយមខេត្តបាត់ដំបង បានសម្រេចចិត្តបើកទ្វារទឹកក្នុងអាងពហុបំណងសេកសក ដើម្បីបង្ហូរទឹកចូលក្នុងស្ទឹងសង្កែ ដើម្បីបណ្តោះទឹកទើបធ្វើឱ្យស្ថានភាពទឹកផ្នែកខាងលើនៃស្រុកសំឡូត បានថយចុះបន្តិចប៉ែកខាងលើ តែសន្ទុះទឹកកំពុងមកឡើងនៅក្រុងបាត់ដំបង គិតនៅម៉ោង១២ថ្ងៃត្រង់នេះ កំពស់ទឹកបានឡើងដល់កំ១៣,៥០ម៉ែត្រ ដែលសាលាក្រុងបានត្រៀមការ៉ុង បាវខ្សាច់ជាស្រេច នៅពេលទឹកឡើងដល់១៣,៨០ម៉ែត្រ ត្រូវដឹកនាំកម្លាំងទៅទប់ទីទំនាបតាមមាត់ផ្លូវចំនួន៣កន្លែង មានប្រវែងជា២០០ម៉ែត្រនៅសង្កាត់ព្រែកព្រះស្តេច ក្រុងបាត់ដំបង ដើម្បីបញ្ចៀសទឹកធ្លាក់ហូរចូលទៅលិចនៅខាងក្រោយរូបសំណាកលោកតាដំបងគ្រញូង ដូចឆ្នាំទឹកខ្លាំងដូចពេលមុនទៀត ព្រោះទីនោះជាទីទំនាបជាងគេ ហើយក៏ត្រៀមប្រកាសអាសន្ននៅកំពស់ទឹកកំពស់១៤,០០ម៉ែត្រ ដើម្បីឲ្យបងប្អូនដែលរស់នៅតាមដងស្ទឹងសង្កែមានការប្រុងប្រយ័ត្នជាមុន ។ (សម្រួលដោយ៖ ស្រីណា)
ចែករំលែកព័តមាននេះ