បញ្ចេញមតិរឿងជេរប្រមាថអ្នករាំក្នុងអាកាសយានដ្ឋាន… ប៉ែន ចំរ៉ុង ក៏រងការវាយបក

ថ្ងៃទី ១៧ ខែ កញ្ញា ឆ្នាំ ២០១៩
ម៉ោង ០៨:០០
ខាត់ សាមឿន

រាជធានីភ្នំពេញ៖ លោកប៉ែន ចំរ៉ុង ខណៈកំពុងមានសេចក្តីសុខជាមួយគូស្នេហ៍ថ្មី ស្រាប់តែត្រូវគេបើកកកាយឡើងវិញរឿងស្នេហ៍ចាស់ដែលអាប់អួសម្រាប់លោក ។ លោកចំរ៉ុង ត្រូវគេដៀលរឿងចោលគូស្នេហ៍ចាស់ដែលមានកូនជាមួយគ្នាថែមទៀតនោះ ។

ដើមហេតុគឺកាលពីពេល ថ្មីៗកន្លងមក មនុស្សមួយចំនួនចូលរួមរិះគន់រឿងបុគ្គលដែលប្រើពាក្យដៀលខ្មែរ ។ ក្នុងនោះក៏មានអ្នកសិល្បៈច្រើននាក់បានបញ្ចេញប្រតិកម្មជុំវិញក្រុមដែលជេរប្រមាថអ្នករាំក្នុងអាកាសយានដ្ឋាន ព្រោះតែអ្នក Live នោះបានប្រើសម្ដីប្រមាថតារាខ្មែរទាំងមូល ។ លោកប៉ែន ចំរ៉ុង បានបញ្ចេញប្រតិកម្មដែរ ដូច្នេះហើយក៏រងការវាយបកលើសពីបញ្ហាដើមទៅទៀត គឺគេគាស់រំលើងពីរឿងអាស្រូវរបស់លោកជាមួយគូស្នេហ៍ចាស់ដែលរំលងទៅយូរហើយនោះ ។

ជាក់ស្ដែងហ្វេសប៑ុកឈ្មោះប៊ុន ហឿនសាញ បានវាយប្រហារលោកប៉ែន ចំរ៉ុង ក្រោយពីលោកបញ្ចេញមតិរិះគន់ ក្នុងចំណោមអ្នកប្រតិកម្មជាច្រើន ដែលត្រូវក្រុមនោះវាយបកថា «នេះហើយ តារាៗស្រុករំដួល អសីលធម៌លែងនិយាយ ហើយជាអ្នកសម្តែងរឿងសិល្បៈឲ្យ ក្មេងៗមើល តើ ក្មេងៗវាទទួលរឿងអសីលធម៌ខ្វះភាពជាគំរូពីពួកវាប៉ុនណាទៅ ?

ជាតារានៅស្រុកគេសំខាន់ណាស់រឿងភាពជាគំរូ ព្រោះអ្នកឯងឡើងឆាកឲ្យគេមើលរាប់ម៉ឺន លាននាក់ បើអ្នកឯងថោកទាបដូចអាសើយសារ៉ុងនេះទេ តើសង្គមនឹងទៅជាយ៉ាងណា ? ហើយភាពគ្មានសីលធម៌ ស៊ីចុកគេបានកូនមួយ ហើយអាចដោះដៃបាន គេដឹងពេញសាធារណៈនេះ តើគេមើលងាយដល់ពូជសមទេ ? ដែលវាថោកទាបអ៊ីចឹងហើយ នៅមានអ្នកគាំទ្រ ?»។

ការវាយប្រហាររបស់អ្នកកាន់ជើងទៅលើក្រុមដែលមានជម្លោះជាមួយក្រុមអ្នកសិល្បៈនេះ មិនមែនវាយប្រហារតែលើលោកប៉ែន ចំរ៉ុង ទេ តែក៏បានឆ្កឹះរឿងរសើបរបស់តារាជាច្រើនទៀត ដែលបានលូកមាត់បញ្ចេញមតិផងដែរ ដូចជាបានឆ្កឹះរឿងអាស្រូវដែលកប់បាត់យូររបស់អ្នកនាងឆ័យលី ដាឡែន និងរបស់លោក តាន់គីមសួរ ជាដើម ដោយគ្រាន់តែក្នុងចំណោមការគាស់កកាយទាំងអស់ រឿងអាស្រូវរបស់លោក ប៉ែន ចំរ៉ុង ហាក់រសើបជាងគេ ដោយសារតែរឿងរ៉ាវនោះធ្លាប់ធ្វើឲ្យលោក ល្វីងមុខខ្លាំង ៕ (កែសម្រួលដោយ ៖ បុប្ផា)