រាជធានីភ្នំពេញ ៖ ក្រៅពីបណ្តឹងពីបទ«ប្រមាថព្រះមហាក្សត្រ» លោកសម រង្ស៊ី កំពុងរងបណ្តឹងបរិហារកេរ្តិ៍ពីសម្តេចតេជោនាយករដ្ឋមន្ត្រីហ៊ុន សែន ផងដែរ ដោយក្រុមមេធាវីរាជរដ្ឋាភិបាល បានដាក់ពាក្យបណ្តឹងនេះរួចហើយ…
រាជធានីភ្នំពេញ ៖ ក្រៅពីបណ្តឹងពីបទ«ប្រមាថព្រះមហាក្សត្រ» លោកសម រង្ស៊ី កំពុងរងបណ្តឹងបរិហារកេរ្តិ៍ពីសម្តេចតេជោនាយករដ្ឋមន្ត្រីហ៊ុន សែន ផងដែរ ដោយក្រុមមេធាវីរាជរដ្ឋាភិបាល បានដាក់ពាក្យបណ្តឹងនេះរួចហើយ ទៅកាន់សាលាដំបូងរាជធានីភ្នំពេញ កាលពីល្ងាចថ្ងៃទី១៣ កញ្ញា ។
បណ្ដឹងទាំងនេះស្របពេលមានប្រតិកម្មចម្រុះពីក្រសួង ស្ថាប័នរដ្ឋ និងឯកជន ថ្កោលទោសលោកសម រង្ស៊ី ដែលបានផ្ដល់បទសម្ភាសប្រមាថព្រះចេស្តាព្រះមហាក្សត្រ ។ ពាក្យបណ្តឹងរបស់ក្រុមមេធាវីរាជរដ្ឋាភិបាលកម្ពុជានេះ គឺធ្វើឡើងស្របពេលដែលព្រះរាជអាជ្ញានៃអយ្យការអមសាលាដំបូងរាជធានីភ្នំពេញ លោកកែវ សុធា កាលពីថ្ងៃទី១៣ កញ្ញា បានចេញដីកាចោទប្រកាន់លោកសម រង្ស៊ី ពីបទ«ប្រមាថអង្គព្រះមហាក្សត្រ» ។
ការចោទប្រកាន់នោះ បានធ្វើឡើងក្រោយពីមានប្រតិកម្មពីក្រសួងព្រះបរមរាជវាំង និងអធិបញ្ជាពីរដ្ឋមន្ត្រីក្រសួងយុត្តិធម៌លោកអង្គវង្ស វឌ្ឍានា ។ ក្រៅពីរងបណ្តឹងទាំងពីរនោះ លោកសម រង្ស៊ី ក៏កំពុងរងប្រតិកម្មចម្រុះដូចព្យុះពីស្ថាប័នរដ្ឋនានារហូតដល់គណបក្សនយោបាយផងដែរ ។
លោកបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា ត្រូវបានស្រង់មតិដោយវិទ្យុបារាំងអន្តរជាតិថា «ការលើកឡើងរបស់លោកសម រង្ស៊ី គឺជាចេតនាមួយដើម្បីបន្ថែមលេស ឬហេតុផល ដើម្បីធ្វើឲ្យលោកមិនចូលស្រុកតាមការគ្រោងទុកនៅថ្ងៃទី៩ វិច្ឆិកា ខាងមុខនេះតែប៉ុណ្ណោះ» ។
លោកសម រង្ស៊ី អតីតប្រធានគណបក្សសង្គ្រោះជាតិ ដែលនៅតែសច្ចាថានឹងវិលចូលស្រុកវិញនោះបានអះអាងថា លោកវិលចូលស្រុកខ្មែរវិញនៅថ្ងៃទី៩ ខែវិច្ឆិកា ឆ្នាំ២០១៩ គេមិនអាចចាប់ខ្លួនលោកបានទេ ព្រោះលោកប្រើប្រាស់សញ្ជាតិបារាំង ។
យោងតាមកិច្ចសម្ភាសន៍ជាមួយវិទ្យុអាស៊ីសេរីកាលពេល ថ្មីៗកន្លងមកនេះ លោកសម រង្ស៊ី បានបញ្ជាក់ថា៖ «ហ៊ុន សែន អត់មានឥទ្ធិពលណាឲ្យគេចាប់ខ្លួនខ្ញុំទេ ព្រោះថាបើខ្ញុំប្រើប៉ាស្ព័របារាំង មានតែរដ្ឋាភិបាលបារាំងទេដែលមានសមត្ថកិច្ចទទួលខុស-ត្រូវចំពោះសុវត្ថិភាពរបស់ខ្ញុំ ។ ហើយយល់ច្បាស់ថាខ្ញុំគ្មានទោសអ្វីនោះទេ គឺហ៊ុន សែន ទេ ដែលប្រឌិតទោស ហើយទោសនយោបាយហ្នឹង គឺជាកិតិ្តយស ចំពោះការតស៊ូ ដើម្បីលទ្ធិប្រជាធិបតេយ្យដែលការពារសិទ្ធិសេរីភាពប្រជារាស្ត្រ »។
លោកសម រង្ស៊ី បានរងបណ្តឹងប្រមាណ១០ហើយនៅកម្ពុជា ក្នុងនោះក៏មានដីកាចាប់ខ្លួនពីតុលាការផង
ដែរ ប៉ុន្តែលោកមិនបានចូលមកទទួលទោសទេ ។ ផ្ទុយទៅវិញលោកបានចោទតុលាការកម្ពុជាស្ថិតក្រោមការបញ្ជារបស់រាជរដ្ឋាភិបាលថែមទៀត ។ លោកសម រង្ស៊ី បានអះអាងថាលោកមិនអាចពឹង ឬមានអន្តរាគមន៍ពីព្រះមហាក្សត្រដូចអតីតព្រះបរមរតនកោដ្ឋបានទេ ព្រោះថាព្រះមហាក្សត្របច្ចុប្បន្នមិនអាចធ្វើអ្វីបាននោះទេ ។
យ៉ាងណាក្តី លោកសម រង្ស៊ី នៅតែអះអាងថាលោកចូលមកស្រុកវិញតាមការកំណត់ថ្ងៃទី៩ ខែវិច្ឆិកា ឆ្នាំ២០១៩ ។ចំណែកលោកសុខ ឥសាន អ្នកនាំពាក្យគណបក្សប្រជាជនកម្ពុជាបានឲ្យដឹងតាមប្រព័ន្ធតេឡេក្រាមថា ទណ្ឌិតសម រង្ស៊ី មេឧទ្ទាមក្រៅច្បាប់ថ្ងៃអង្សាមកដល់ហេីយ ព្រោះការប្រមាថព្រះចេស្តាព្រះមហាក្សត្របានបង្ហាញច្បាស់ថាទណ្ឌិតរូបនេះពិតជាមានចរិតក្បត់ជាតិសាសនា ព្រះមហាក្សត្រយ៉ាង
ប្រាកដដែលត្រូវមហាជន ប្រជាជនកម្ពុជាថ្កោលទោសជុំទិស ។
សម្រាប់ការប្រកាសចូលស្រុករបស់លោកសម រង្ស៊ី ត្រូវលោកសុខ ឥសាន បញ្ជាក់ថាទោះចូលតាមច្រកណាក៏ដោយ ក៏ទណ្ឌិតមេឧទ្ទាមក្រៅច្បាប់ចៀសមិនរួចពីត្រូវដាក់ខ្នោះដៃរុញបញ្ចូលគុកដែរ ។ ចំពោះការលើកឡើងរបស់អតីតប្រធានគណបក្សប្រឆាំងលោកសម រង្ស៊ី ត្រូវអ្នកវិភាគនាំគ្នាលើកឡើងថារដ្ឋសភាគួរធ្វើវិសោធនកម្មច្បាប់សញ្ជាតិពីអ្នកនយោបាយ ដែលឈរឈ្មោះជាបេក្ខជននាយករដ្ឋមន្ត្រី ត្រូវមានតែសញ្ជាតិខ្មែរតែមួយ មិនអនុញ្ញាតឲ្យមានសញ្ជាតិពីរទេ ។ ព្រោះថាកន្លងមកលោកសម រង្ស៊ី ក៏ធ្លាប់មានគំនិតផ្តួចផ្តើមឲ្យធ្វើវិសោធនកម្មច្បាប់ ដើម្បីឲ្យនាយករដ្ឋមន្ត្រី និងអ្នកនយោបាយមានសញ្ជាតិតែមួយដែរ ។ តែមានអ្នកនយោបាយខ្លះមានសញ្ជាតិលើសពីមួយ ។
អ្នកវិភាគដដែលបន្តថា«លោកសម រង្ស៊ី បានបង្ហាញថា លោកមកស្រុកខ្មែរមិនប្រើប៉ាស្ព័រខ្មែរទេ គាត់ប្រើប៉ាស្ព័របារាំង អុីចឹងកន្លងទៅគាត់បានឃោសនាឲ្យខ្មែរស្រឡាញ់ខ្មែរ តែទីបំផុត ប្រើប៉ាស្ព័របារាំង ដោយបោះបង់សញ្ជាតិខ្មែរចោល ។ ដូច្នេះ សភាគួរតែធ្វើវិសោធនកម្មច្បាប់ ដើម្បីកំណត់ថាប្រធានគណបក្ស ឬក៏បេក្ខជននាយករដ្ឋ មន្ត្រី ឬអ្នកនយោបាយដែលឈរជាបេក្ខជនអ្នកតំណាងរាស្ត្រ ឬបេក្ខជននាយករដ្ឋមន្ត្រីត្រូវមានសញ្ជាតិខ្មែរ ក្រៅពីនេះមិនអនុញ្ញាតឡើយ» ៕
ចែករំលែកព័តមាននេះ