រាជធានីភ្នំពេញ ៖ បុរសម្នាក់ស្លាប់ភ្លាមៗនៅកន្លែង និងម្នាក់ទៀតរងរបួសធ្ងន់ ក្នុងហេតុការណ៍គ្រោះថ្នាក់ចរាចរណ៍រវាងរថយន្តមួយគ្រឿងម៉ាកហាយឡែនឌ័របុកជាមួយម៉ូតូមួយគ្រឿង ក្នុងទិសដៅបញ្ច្រាសគ្នា បណ្តាលឱ្យម៉ូតូខ្ទាតផ្លោងបោកផ្ទប់នឹងរថយន្តមួយគ្រឿងម៉ាកម៉ាស្តា ហើយត្រូវបានរថយន្តក្រឡុកបេតុងបើកកិនម៉ូតូបន្ថែម ។ បន្ទាប់ពីកើតហេតុ ភ្លាមៗនោះរថយន្តម៉ាកហាយឡែនឌ័រព្យាយាមបើកគេចដែរ តែត្រូវបានបងប្អូនប្រជាពលរដ្ឋឃាត់បានទាំងរថយន្ត ទាំងអ្នកបើកបរ ។
ហេតុការណ៍ខាងលើនេះបានកើតឡើង កាលពីវេលាម៉ោង៦និង៣០នាទីយប់ថ្ងៃទី១៤ ខែកញ្ញា ឆ្នាំ២០១៩ នៅតាមផ្លូវសម្តេចជា ស៊ីម ខាងលិចផ្សារបឹងបៃតង ស្ថិតក្នុងភូមិជ្រេស សង្កាត់គោកឃ្លាង ខណ្ឌសែនសុខ ។
រថយន្តទាំង៣គ្រឿងខាងលើ ក្នុងនោះ១-រថយន្តមួយគ្រឿងម៉ាកម៉ាកហាយឡែនឌ័រ ពណ៌ស្ករ ពាក់ស្លាកលេខ ភ្នំពេញ 2X-8587 បើកដោយបុរសម្នាក់ មិនស្គាល់អត្តសញ្ញាណ ត្រូវសមត្ថកិច្ចឃាត់ខ្លួន ។ ២-រថយន្តមួយគ្រឿងម៉ាកម៉ាស្តា ពណ៌ស ពាក់ស្លាកលេខ ភ្នំពេញ ២BA-៩៣០៩ អ្នកបើកបរមិនស្គាល់អត្តសញ្ញាណ ។ ៣-រថយន្តក្រឡុកបេតុងមួយគ្រឿង ម៉ាកFUSO ពណ៌ស ពាក់ស្លាកលេខ ភ្នំពេញ ៥A-១៦១៥ បើកបរដោយបុរសម្នាក់មិនស្គាល់អត្តសញ្ញាណ ។
ម៉ូតូមួយគ្រឿងជិះគ្នា២នាក់ ម៉ាកសង់កូរ៉េ ពណ៌ក្រហម ពាក់ស្លាកលេខ កណ្តាល ១K-៥១៧៨ បើកបរដោយបុរសម្នាក់ មិនស្គាល់អត្តសញ្ញាណ និងបុរសម្នាក់ទៀតអ្នករួមដំណើរម្នាក់ មិនស្គាល់អត្តសញ្ញាណ។ ជនរងគ្រោះទាំង២នាក់ បណ្តាលឱ្យស្លាប់ម្នាក់ និងរបួសធ្ងន់ម្នាក់ ។
តាមប្រភពព័ត៌មាននៅកន្លែងកើតហេតុបានឲ្យដឹងថា មុនកើតហេតុ គេឃើញរថយន្តមួយគ្រឿងម៉ាកហាយឡែនឌ័រ បើកបរដោយបុរសម្នាក់ ធ្វើដំណើរក្នុងទិសដៅពីកើតទៅលិច លុះមកដល់ចំណុចកើតហេតុខាងលើ ក៏បានវ៉ាជែងរថយន្តនៅខាងមុខ ហើយជ្រុលទៅបុកម៉ូតូមួយគ្រឿងម៉ាកសង់កូរ៉េ ដែលធ្វើដំណើរក្នុងទិសដៅបញ្ច្រាសគ្នា បណ្តាលឱ្យខ្ទាតផ្លោងបោកផ្ទប់ទៅនឹងរថយន្តមួយគ្រឿងទៀតម៉ាកម៉ាស្តា ដែលកំពុងបើកបរក្នុងទិសដៅពីលិចទៅកើត ស្របទិសគ្នាជាមួយម៉ូតូ បណ្តាលឲ្យអ្នកជិះម៉ូតូស្លាប់ និងរងរបួសធ្ងន់ម្នាក់ ចំណែកម៉ូតូខ្ទាតចេញ ស្របពេលនោះស្រាប់តែរថយន្តក្រឡុកបេតុងម៉ាក FUSO ដែលបើកបរពីលិចទៅកើត ក៏ជ្រុលទៅបុកកិនម៉ូតូបន្ថែមទៀត ។
តាមប្រភពដដែលបានបន្តថា បន្ទាប់ពីកើតហេតុ រថយន្តម៉ាកហាយឡែនឌ័រព្យាយាមបើកគេចដែរ តែត្រូវប្រជាពលរដ្ឋដេញតាមឃាត់បាន ។ ក្នុងហេតុការណ៍គ្រោះថ្នាក់ចរាចរណ៍ខាងលើនេះដែរ បណ្តាលឱ្យរថយន្តចំនួន៣គ្រឿង និងម៉ូតូមួយគ្រឿង រងការខូចខាតផងដែរ ។
ក្រោយកើតហេតុ សមត្ថកិច្ចបានចុះទៅអន្តរាគមន៍ ពិនិត្យវាស់វែងនិងនាំយកមធ្យោបាយដែលពាក់ព័ន្ធទៅរក្សាទុកនៅការិយាល័យចរាចរណ៍ជើងគោកស្នងការក្រុង ដើម្បីចាត់ការតាមនីតិវិធី រីឯអ្នករងរបួសធ្ងន់ ត្រូវបានបញ្ជូនទៅសង្គ្រោះនៅមន្ទីរពេទ្យ ចំណែកសពជនរងគ្រោះម្នាក់ ត្រូវបានសមត្ថកិច្ចទំនាក់ទំនងទៅក្រុមគ្រួសារឱ្យមកទទួលយកទៅធ្វើបុណ្យតាមប្រពៃណី ៕ (កែសម្រួលដោយ ៖ ធីតា)
ចែករំលែកព័តមាននេះ