រាជធានីភ្នំពេញ ៖ ក្មេងប្រុសជំទង់ម្នាក់បានស្លាប់ភ្លាមៗនៅនឹងកន្លែង ចំណែកម្នាក់ទៀតរងរបួសធ្ងន់ធ្ងរ ក្នុងហេតុការណ៍គ្រោះថ្នាក់ចរាចរណ៍រវាងរថយន្តមួយគ្រឿងមានដឹកតុនិងកៅអី បុកជាមួយម៉ូតូមួយគ្រឿង ក្នុងទិសដៅបញ្ច្រាសគ្នា ខណៈជនរងគ្រោះទាំង២នាក់កំពុងជិះម៉ូតូមួយគ្រឿងឌុបគ្នាដើម្បីយកទំនិញទៅប្រគល់ឲ្យអតិថិជនដែលកុម្ម៉ង់ទិញតាមអនឡាញ ។
គ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង២រសៀលថ្ងៃទី១៤ ខែកញ្ញា ឆ្នាំ២០១៩ នៅលើផ្លូវជាតិលេខ៤ ត្រង់ចំណុចភូមិកន្ទោកខាងជើង សង្កាត់កន្ទោក ខណ្ឌកំបូល រាជធានីភ្នំពេញ។
ភាគីខាងម៉ូតូមួយគ្រឿងជិះគ្នា២នាក់ ម៉ាកហុងដា MSX ពណ៌ស្វាយលាយខ្មៅ ពាក់ស្លាកលេខ ភ្នំពេញ ១FM-៩២៦៥ បើកបរដោយឈ្មោះ ស៊ុំ ពិសិទ្ធ អាយុ១៧ឆ្នាំ មុខរបរជាអ្នកដឹកទំនិញឱ្យអតិថិជនកុម្ម៉ង់ទិញតាមអនឡាញ បានស្លាប់នៅនឹងកន្លែងកើតហេតុ រីឯអ្នករួមដំណើរម្នាក់ដែលរងរបួសធ្ងន់ឈ្មោះ ពៅ បញ្ញា អាយុ១៥ឆ្នាំ ។ ជនរងគ្រោះទាំង២នាក់មានទីលំនៅក្នុងភូមិត្រពាំងវែង ឃុំឆក់ឈើនាង ស្រុកអង្គស្នួល ខេត្តកណ្តាល ។
ចំណែកភាគីខាងរថយន្តមួយគ្រឿងមានដឹកតុនិងកៅអី ម៉ាកហ៊ីយ៉ាន់ដាយ ពណ៌ខៀវ ពាក់ស្លាកលេខ ភ្នំពេញ ២W-១៨០៦ បើកបរដោយបុរសម្នាក់ មិនស្គាល់អត្តសញ្ញាណ ត្រូវសមត្ថកិច្ចចាប់ឃាត់ខ្លួន ។
តាមប្រភពព័ត៌មានបានឲ្យដឹងថា នៅមុនពេលកើតហេតុ គេឃើញជនរងគ្រោះ២នាក់ខាងលើជិះម៉ូតូជិះម៉ូតូមួយគ្រឿងឌុបគ្នា ក្នុងគោលបំណងដឹកស្ពីកឃ័រយកទៅឲ្យអតិថិជនដែល កុម្ម៉ង់ទិញតាមអនឡាញ ពេលនោះជនរងគ្រោះទាំង២នាក់បានជិះម៉ូតូមួយគ្រឿងធ្វើ ដំណើរតាមផ្លូវជាតិលេខ៤ ក្នុងទិសដៅពីលិចទៅកើត។
តាមប្រភពព័ត៌មានបានបន្តថា លុះពេលជនរងគ្រោះទាំង២នាក់ធ្វើដំណើរទៅដល់ត្រង់ចំណុចកើតហេតុខាងលើ បានបត់ឆ្វេងឆ្លងផ្លូវពីត្បូងទៅជើង ស្រាប់តែមានរថយន្តមួយគ្រឿងម៉ាកហ៊ីយ៉ាន់ដាយ មានដឹកតុ និងកៅអី បើកបរយ៉ាងលឿនក្នុងទិសដៅពីកើតទៅលិចក៏បុកម៉ូតូជនរងគ្រោះយ៉ាងពេញទំហឹង បណ្តាលឱ្យអ្នកបើកបរម៉ូតូស្លាប់នៅនឹងកន្លែងកើតហេតុ ចំណែកអ្នករួមដំណើរម្នាក់បានរងរបួសធ្ងន់ ។ បន្ទាប់មករថយន្តម៉ាកហ៊ីយ៉ាន់ដាតបានព្យាយាមបើករត់ដែរ តែត្រូវបាននគរបាលតាមចាប់បានទាំងរថយន្ត និងអ្នកបើកបរតែម្តង។
ក្រោយពេលកើតហេតុ នគរបាលខណ្ឌពោធិ៍សែនជ័យបានមកជួយអន្តរាគមន៍សម្រួលចរាចរណ៍មិនឲ្យកកស្ទះ និងបានប្រគល់ករណីខាងលើនោះទៅឲ្យខាងនគរបាលចរាចរាណ៍ផ្លូវគោកនៃការដ្ឋាននគរបាលរាជធានីភ្នំពេញចុះមកនាំយកទាំងអ្នកបើកបររថយន្ត ព្រមទាំងរថយន្តនិងម៉ូតូ ដើម្បីរង់ចាំធ្វើការដោះស្រាយតាមច្បាប់នៅពេលក្រោយ និងប្រគល់សពជនរងគ្រោះឱ្យក្រុមគ្រួសារដើម្បីយកទៅធ្វើបុណ្យតាមប្រពៃណី៕ (កែសម្រួលដោយ ៖ ធីតា)
ចែករំលែកព័តមាននេះ