រាជធានីភ្នំពេញ ៖ ដោយសារតែការទុកដាក់សំរាមនៅមុខផ្ទះ បង្កឲ្យមានជម្លោះរហូតផ្ទុះហិង្សាវាយតប់គ្នាដោយយកដុំថ្មវាយបុរសម្នាក់រយះចិញ្ចើមហូរឈាមសស្រាក់ កាលពីវេលាម៉ោងប្រមាណ៩យប់ថ្ងៃទី១២ ខែកញ្ញា តាមផ្លូវលេខ៩៤ មុខហាងម៉ាស្សាយីហោវត្តភ្នំ ស្ថិតក្នុងសង្កាត់ស្រះចក ខណ្ឌដូនពេញ ។
ប្រភពព័ត៌មានពីជនរងគ្រោះឈ្មោះ ប៊ុន ណាទី ភេទប្រុស អាយុ២៩ឆ្នាំ មុខរបររត់ម៉ូតូកង់បី ស្នាក់នៅផ្ទះលេខ១១E១ ផ្លូវលេខ៩៤ សង្កាត់ស្រះចក ខណ្ឌដូនពេញ បានឲ្យដឹងថា គ្រួសារគាត់និងផ្ទះកើតហេតុខាងលើ ធ្លាប់មានទំនាស់គ្នាដោយសាររឿងទុកដាក់សំរាមនៅតាមចិញ្ចើមផ្លូវសាធារណៈមុខហាងរបស់ជនបង្ក ព្រោះជនបង្កមិនឲ្យយកសំរាមទៅទុកនៅមុខផ្ទះរបស់ខ្លួនដែលជាកន្លែងរកស៊ី ។
មុនពេលកើតហេតុ ឪពុករបស់គាត់បានយកសំរាមពីក្នុងផ្ទះទៅដាក់នៅមុខផ្លូវក្បែរហាងម៉ាស្សាខាងលើ ស្រាប់តែកូនប្រុសរបស់ថៅកែហាងចេញមកឈ្លោះនិងជេរប្រមាថឪពុកគាត់។ពេលនោះ គាត់បើកម៉ូតូកង់បីមកដល់ក៏បានចុះទៅសួរនាំក៏ឈ្លោះប្រកែកគ្នា ស្រាប់តែជនឈ្មោះ អុក ផល្លា ហៅវុី ភេទប្រុស អាយុជាង៣០ឆ្នាំ បានយកដុំថ្មមកវាយរូបគាត់បណ្តាលឲ្យបែកចិញ្ចើមខាងស្តាំហូរឈាមស្រោចពេញមុខ ហើយក៏កើតជាការឈ្លោះប្រកែកគ្នាផ្អើលពេញផ្លូវតែម្តង ។ ភ្លាមៗនោះដែរ សមត្ថកិច្ចបានមកអន្តរាគមន៍ ហាមឃាត់កុំឲ្យប្រើហិង្សាបន្តទៀត ។
ជនរងគ្រោះនិយាយថា កន្លែងនេះគាត់និងអ្នកភូមិ១១ទាំងអស់ធ្លាប់ដាក់សំរាមជាយូរមកហើយ ហេតុអ្វីបានជាមិនឲ្យគាត់ដាក់ទៅវិញ ដោយម្ចាស់ហាងខាងលើយកចំណីផ្លូវសាធារណៈធ្វើជាកម្មសិទ្ធិផ្ទាល់ខ្លួនតែម្តង ។ ដោយឡែក បុរសឈ្មោះ អុក ផល្លា ហៅវុី ដែលជាថៅកែហាងម៉ាស្សាវត្តភ្នំ និយាយថា មុនពេលកើតហេតុនេះគាត់បានទិញធុងសំរាមដាក់នៅកែងផ្ទះរបស់គាត់សម្រាប់ទុកឲ្យប្រជាពលរដ្ឋរស់នៅក្នុងភូមិយកសំរាមមកដាក់ក្នុងនោះ កុំឲ្យយកសំរាមមកទុកនៅតាមផ្លូវ ធ្វើឲ្យបាត់បង់អនាម័យក៏ដូចជាធុំក្លិនមិនល្អប៉ះពាល់ដល់ការរកស៊ីរបស់គាត់ ។ ចំពោះធុងសំរាមដែលគាត់ទិញយកមកទុកនេះ ពេលរថយន្តប្រមូល សំរាមមកប្រមូលគាត់នឹងឲ្យកម្មកររបស់គាត់ចេញមកយកសំរាមដាក់រថយន្ត ។
ថៅកែហាងរូបនេះនិយាយទៀតថា ប៉ុន្តែភាគីម្ខាងនោះមិនព្រមយកសំរាមទៅដាក់ក្នុងធុងដែលគាត់បានរៀបចំទុកឲ្យទេ គឺនៅតែយកសំរាមមកទុកនៅមុខផ្ទះគាត់ដដែល ទើបបង្កឲ្យមានការឈ្លោះប្រកែកជេរប្រមាថនិងវាយតប់គ្នាទៅវិញទៅមក ។ក្រោយពេលកើតហេតុ ភាគីដែលរងគ្រោះបែកចិញ្ចើមខាងស្តាំបានទៅដាក់ពាក្យបណ្តឹងនៅប៉ុស្តិ៍រនគរបាលស្រះចក ដើម្បីឲ្យសមត្ថកិច្ចចាត់ការទៅតាមនិតិវិធី ។បញ្ហាទុកដាក់សំរាមនាពេលបច្ចុប្បន្ននេះ បើមិនមានការយោគយល់គ្នាទេ នោះរឿងរ៉ាវនានាក៏នឹងផ្ទុះឡើង ដោយសារតែការទុកដាក់សំរាមប៉ះពាល់ដល់អារម្មណ៍រវាងគ្នានឹងគ្នា ៕ (សម្រួលដោយ៖ ស្រីណា)
ចែករំលែកព័តមាននេះ