សហរដ្ឋអាមេរិក-ចិន ៖ កិច្ចព្រមព្រៀងមួយនៅមិនទាន់ចុះហត្ថលេខានៅឡើយ ប៉ុន្តែបរិយាកាសមានភាពធូរស្រាល ដោយក្រុងប៉េកាំងនិងក្រុងវ៉ាស៊ិនតោនប្រកាសនាថ្ងៃទី១១កញ្ញាពីការផ្អាកបង្កើនសង្គ្រាមពាណិជ្ជកម្ម ដែលអនុគ្រោះដល់ការបន្តចរចានាដើមខែតុលា។
ប្រធានាធិបតីអាមេរិកលោកដូណាល់ត្រាំថ្លែងនាយប់ថ្ងៃទី១១កញ្ញា ជាសញ្ញានៃសុឆន្ទៈថា លោកនឹងពន្យារពេលដល់ថ្ងៃទី១៥តុលាពុំមែនថ្ងៃទី១តុលា ការបង្កើនពន្ធគយបន្ថែម ដល់២៥០ពាន់លានដុល្លារលើបណ្ដាផលិតផលនាំចេញរបស់ចិនទៅកាន់សហរដ្ឋអាមេរិក។
មុននេះក្នុងសន្និសីទសារព័ត៌មានមួយក្នុងការិយាល័យពងក្រពើនៃសេតវិមាន លោកត្រាំបានសម្ដែងការស្វាគមន៍ ការសម្រេចរបស់ក្រុងប៉េកាំង លើកលែងពន្ធគយបន្ថែមលើទំនិញអាមេរិកមួយចំនួន ដោយលោកចាត់ទុកថានោះជាកាយវិការខ្លាំងមួយ មុនការចរចាគ្នាជាថ្មីដែលគ្រោងធ្វើក្នុងរដ្ឋធានីអាមេរិក ដោយមានវត្តមានរបស់លោកLIU HEឧបនាយករដ្ឋមន្ត្រីចិន។
រងការប៉ះពាល់ដោយសង្គ្រាមពាណិជ្ជកម្ម ចិនបានប្រកាសមុន នាថ្ងៃទី១១កញ្ញាពីការលុបចោលពន្ធគយបន្ថែមលើមុខទំនិញអាមេរិកចំនួន១៦ប្រភេទ តែចិននៅបន្តអនុវត្តការយកពន្ធបន្ថែម លើផលិតផលនាំចូលអាមេរិកដូចជាសណ្ដែកសៀង សាច់ជ្រូកជាដើម។
ការស្ទាបស្ទង់មតិមួយលើម្ចាស់សហគ្រាសអាមេរិកចំនួន៥០០រូប ដោយធនាគារវិនិយោគស្វ៊ីសUBSបង្ហាញថា ជិត៦០%នៃមនុស្សដែលបានសាកសួរ សម្ដែងពីបំណងចង់ឲ្យរដ្ឋាភិបាលលោកត្រាំកាត់បន្ថយភាពតានតឹងខាងពាណិជ្ជកម្ម រវាងសហរដ្ឋអាមេរិកនិងចិន។
ចំណែករបាយការណ៍មួយចេញផ្សាយដំណាលគ្នានាថ្ងៃទី១០កញ្ញា ជាមួយលទ្ធផលនៃការស្ទាបស្ទង់មតិនោះនិយាយថា អ្នកត្រូវសាកសួរប្រមាណជា១២%មានគំនិតឲ្យបញ្ចប់ ភាពតានតឹងពាណិជ្ជកម្ម ទោះបីជាចិនធ្វើសម្បទានតិចតួចក៏ដោយ។ ចំណែកមនុស្សដែលសាកសួរ៣៣%ចង់ឲ្យរក្សាការគាបសង្កត់លើចិនរហូតទទួលបានសម្បទានធំៗ ទោះបីសង្គ្រាមពាណិជ្ជកម្មនៅបន្តក្ដី៕ (កែសម្រួលដោយ ៖ បុប្ផា)
ចែករំលែកព័តមាននេះ