ខេត្តកំពង់ឆ្នាំង ៖ សេចក្តីរាយការណ៍បឋមបានឲ្យដឹងថា ជនសង្ស័យ៣នាក់ត្រូវបានតុលាការសម្រេចឃុំខ្លួនដាក់ពន្ធនាគារ កាលពីល្ងាចថ្ងៃទី១២ ខែកញ្ញា ដោយចោទប្រកាន់កាប់ទន្ទ្រានដីជំរកសត្វព្រៃភ្នំឱរ៉ាល់អស់ជាង១០ហិកតា នៅចំណុចអូរអន្លង់ជ្រូក ស្ថិតក្នុងភូមិកោះខ្ទុំ ឃុំជៀប…
ខេត្តកំពង់ឆ្នាំង ៖ សេចក្តីរាយការណ៍បឋមបានឲ្យដឹងថា ជនសង្ស័យ៣នាក់ត្រូវបានតុលាការសម្រេចឃុំខ្លួនដាក់ពន្ធនាគារ កាលពីល្ងាចថ្ងៃទី១២ ខែកញ្ញា ដោយចោទប្រកាន់កាប់ទន្ទ្រានដីជំរកសត្វព្រៃភ្នំឱរ៉ាល់អស់ជាង១០ហិកតា នៅចំណុចអូរអន្លង់ជ្រូក ស្ថិតក្នុងភូមិកោះខ្ទុំ ឃុំជៀប ស្រុកទឹកផុស ។
ក្រុមសមត្ថកិច្ចចម្រុះបានបញ្ជាក់ថា ជនសង្ស័យទាំង៣នាក់ខាងលើ ត្រូវបានសមត្ថកិច្ចចម្រុះមានមន្ត្រីបរិស្ថានកងរាជអាវុធហត្ថ និងនគរបាលស្រុកទឹកផុសធ្វើការឃាត់ខ្លួនកាលពីថ្ងៃទី១០ ខែកញ្ញានេះ បន្ទាប់ពីធ្វើសកម្មភាពកាប់ទន្ទ្រានដីជម្រកសត្វព្រៃភ្នំឱរ៉ាល់អស់ជាង១០ហិកតា ។
ជនសង្ស័យទាំង៣នាក់មាន១-ឈ្មោះ អឿន អ៊ីម អាយុ២៨ឆ្នាំ ២ -ឈ្មោះ នន់ រឿម អាយុ៤០ ឆ្នាំ ទាំង២នាក់ មានទីលំនៅភូមិបឹងស្ទេង ឃុំខ្លុងពពក ស្រុកទឹកផុស ។ និងទី៣- ឈ្មោះ យិន លី អាយុ២៤ឆ្នាំ មានទីលំនៅភូមិតាំងធ្នង់ ឃុំជៀប ស្រុកទឹកផុស ។
ចំពោះវត្ថុតាងរឹបអូសបានមានកាំបិតកកុកចំនួន៣ ដាវ១ និងម៉ូតូ២គ្រឿង ។ នៅចំពោះសមត្ថកិច្ចចម្រុះជនសង្ស័យទាំង៣នាក់ បានសារភាពថា ខ្លួនគ្រាន់តែជាអ្នកស៊ីឈ្នួលកាប់ព្រៃឲ្យគេតែប៉ុណ្ណោះ ។ យ៉ាងនេះក្តី បន្ទាប់ពីកសាងសំណុំរឿងបញ្ជូនមកសាលាដំបូងខេត្តហើយ តុលាការបានសម្រេចឃុំខ្លួនជនសង្ស័យទាំង៣នាក់ នៅរសៀលថ្ងៃទី១២ខែកញ្ញា ឆ្នាំ២០១៩នេះ ។
គួររំលឹកដែរថា នៅក្នុងអំឡុងដើមខែកញ្ញានេះ ជនសង្ស័យសរុបចំនួន ៦នាក់ ហើយដែលត្រូវបានឃុំខ្លួនពីបទកាប់ទន្ទ្រានដីព្រៃឈើរបស់រដ្ឋ ដោយលើកទី១ ឃុំខ្លួនមនុស្ស៣នាក់ បន្ទាប់ពីស៊ីឈ្នួលបើកត្រាក់ទ័រឈូសឆាយដីព្រៃរបស់រដ្ឋ នៅចំណុចឃុំក្រាំងស្គារ ស្រុកទឹកផុស ។ ចំណែកករណីទី ២ គឺឃុំខ្លួនមនុស្ស៣នាក់ខាងលើនេះបន្ទាប់ពីស៊ីឈ្នួលកាប់ដីជម្រកសត្វព្រៃរបស់រដ្ឋនៅក្នុងឃុំជៀប ។
គេសង្កេតឃើញថា ការឃុំខ្លួនឃើញតែជាកម្មករតែប៉ុណ្ណោះ ប៉ុន្តែថៅកែមិនដែលបានជាប់ពន្ធនាគារឡើយ ។ ជាក់ស្ដែងការចាប់មនុស្សបួននាក់បែរជាថៅកែរត់រួចដោយសារមន្ត្រីរដ្ឋបាលព្រៃឈើរមាស ហើយជាប់តែកម្មករដែលជាអ្នកបើកត្រាក់ទ័រតែប៉ុណ្ណោះនោះទេ ៕ កែសម្រួលដោយ ៖ សុឃាក់
ចែករំលែកព័តមាននេះ