តារាសម្តែង ភិន សុដាលីស ត្រូវគេឃើញលេចមុខនៅក្នុងប្រទេសអង់គ្លេស ខណៈភាពយន្តរឿង «កាំបិតមុខ ២» ថតមិនទាន់ចប់ផងនោះ ធ្វើឱ្យមានការសង្ស័យថា នាងកំពុងស្វះស្វែងចេញទៅរស់នៅទីនោះ ខណៈដែលប្រភពច្បាស់ការបានលួចបង្ហើបថា បើគ្មានអ្វីជាឧបសគ្គ គឺនាងចេញទៅរស់នៅទីនោះ ។
ពាក់ព័ន្ធនឹងបញ្ហានេះ លោក អ៊ិន សុភិន ដែលជាឳពុកបានចេញមុខបំភ្លឺ ដោយផលិតករមហាហង្ស រូបនេះឆ្លើយថា កូនស្រីរបស់លោក គឺអ្នកនាង ភិន សុដាលីស ពិតជាស្ថិតនៅអង់គ្លេស និងកំពុងស្វះស្វែងរកផ្លូវសិក្សានៅក្នុងប្រទេសនោះពិតមែន ប៉ុន្តែមិនមែនអ្នកនាងចង់រស់នៅរយៈពេលយូរនោះទេ ដ្បិតបើត្រូវនៅរៀនមែន ក៏រស់នៅ និងរៀនក្នុងរយៈពេលខ្លី ។ នាងនឹងនៅតែទៅមកៗ ហើយអាចនឹងរៀនត្រឹមវគ្គខ្លីប៉ុណ្ណោះ ។
លោកបន្តថា នាងទៅកាន់ប្រទេសអង់គ្លេស ដោយសារតែកូនប្រុសរបស់លោកសិក្សា និងរស់នៅទីនោះ ហើយជាពេលដែលភរិយារបស់លោកត្រូវទៅលេងកូនប្រុសប៉ុណ្ណោះ ទើបភិន សុដាលីស ជូនម្ដាយទៅជាមួយ ។
លោកបន្ថែមថា កូនស្រីគ្រាន់តែចង់ទៅមើលថា តើនៅក្នុងប្រទេសអង់គ្លេស អាចសិក្សាជំនាញអ្វីបាន ដែលពាក់ព័ន្ធនឹងការឌីហ្សាញ និងផ្នែកផលិតកម្មប៉ុណ្ណោះ ប៉ុន្តែបើត្រូវនឹងរៀនមែន ក៏មិនមែនពេលនេះដែរ ដោយសារតែ ភិន សុដាលីស នៅជាប់ថតរឿង «កាំបិតមុខ ២» មិនទាន់ចប់។
លោក អ៊ិន សុភិន បន្តថា ភិន សុដាលីស មិនចេះរស់នៅប្រទេសគេទេ ដោយសារតែនាងនឹកកូន និងមានចំណូលចិត្តចង់រស់នៅស្រុកខ្មែរច្រើនជាង ។
លោកបញ្ជាក់ថា ភិន សុដាលីស ត្រូវមកសម្ពោធភាពយន្តរឿង «លោកឳពុក» ផង ដូច្នេះនាងមានការងារច្រើនណាស់ត្រូវធ្វើ មិនអាចទៅរៀន ឬរស់នៅអង់គ្លេសបានទេ ។ (កែសម្រួលដោយ ៖ បុប្ផា)
ចែករំលែកព័តមាននេះ