ខេត្តកណ្តាល ៖ កម្លាំងកងរាជអាវុធហត្ថខេត្តកណ្តាលប្រមាណជិត១០នាក់ ខ្លះស្លៀកពាក់ឯកសណ្ឋាន និងខ្លះទៀតស្លៀកពាក់ស៊ីវិល បានចុះឡោមព័ទ្ធផ្ទះមួយកន្លែងនៅស្រុកកណ្តាលស្ទឹង ខេត្តកណ្តាល បង្កឱ្យមានការភ្ញាក់ផ្អើលដល់ប្រជាពលរដ្ឋនិងម្ចាស់ផ្ទះ ដោយចុះអនុវត្តតាមដីកាបញ្ជាអោយចូលខ្លួនរបស់លោក លាវ ស្រេង ព្រះរាជអាជ្ញាអមសាលាដំបូងខេត្តកណ្តាល លើឈ្មោះ ទូច សុខលីម ។ ការចុះអនុវត្តនេះ គឺធ្វើឡើង កាលពីរសៀលថ្ងៃទី១១ កញ្ញា នេះ ស្ថិតនៅផ្ទះមួយកន្លែងក្នុងភូមិពន់ចាន ឃុំព្រែកស្លែង ស្រុកកណ្តាលស្ទឹង ខេត្តកណ្តាល។
លោកស្រី ឌិន សុខទៀង អាយុ៤១ឆ្នាំ ជាប្រពន្ធរបស់ឈ្មោះ ទូច សុខលីម បានប្រាប់អោយដឹងថា នៅមុនពេលកើតហេតុ គាត់និងកូនរបស់គាត់ រួមនិងប៉ារបស់គាត់ ព្រមទាំងចាស់ៗនៅក្នុងផ្ទះ បានអង្គុយលេងនៅក្នុងផ្ទះ ស្រាប់តែឃើញមានរថយន្តបើកមកដល់មុខផ្ទះរបស់គាត់ ឃើញមានពាក់ឯកសណ្ឋានជាកម្លាំងកងរាជអាវុធហត្ថ និងខ្លះទៀត អត់មានឯកសណ្ឋានប្រមាណជិត១០នាក់ បានចុះពីលេីរថយន្ត រួចរត់ទៅព័ន្ធជុំវិញផ្ទះរបស់គាត់ ហើយបុរសម្នាក់ស្លៀកពាក់ស៊ីវិលបានសួរគាត់ថា«ឈ្មោះ ទូច សុខលីម នៅណា ? នៅក្នុងផ្ទះអត់ ? ខ្ញុំសុំជួបគាត់បានទេ ? គាត់ក៏បានឆ្លើយទៅប្រាប់វិញថា គាត់អត់នៅផ្ទះទេ បងរកគាត់មានការអី ? បុរសនោះក៏បាននិយាយថាឈ្មោះ ទូច សុខលីម រកស៊ីឆបោកគេច្រើនណាស់ ឥឡូវខ្ញុំសុំឆែកឆេរផ្ទះរកគាត់ អាចសហការជាមួយខ្ញុំអត់។
គាត់ក៏បានឆ្លើយថា មកឆែរឆេរផ្ទះរបស់គាត់មានរឿងអី គាត់មិនអោយចូលទេ ស្រាប់តែមានកម្លាំងកងរាជអាវុធហត្ថម្នាក់ដើរមកហើយអានដីកា រួចសុំចូលឆែកឆេរ ទោះម្ចាស់ផ្ទះមិនព្រមក៏ដោយ ទើបធ្វើអោយទាក់មាត់ ទាក់កគ្នា រហូតកម្លាំងកងរាជអាវុធសម្រុកចូលផ្ទះតែម្តង។
ពួកគាត់បានបន្ថែមទៀតថា ទង្វើបែបនេះ ពិតជាអយុត្តិធម៌សម្រាប់ពួកគាត់ដែលអត់ដឹងរឿងអីសោះ ហើយពួកគាត់មានការភិតភ័យណាស់ ដោយប្រដូចជាក្រុមចោរចូលមកប្លន់ផ្ទះរបស់គាត់អ៊ីចឹង។ប៉ុន្តែ
បើតាមកមន្ត្រីកងរាជអាវុធហត្ថដែលចុះទៅអនុវត្តដីកានេះ បានប្រាប់អោយដឹងថា ពួកគាត់ចុះទៅអនុវត្តដោយយោងទៅលើដីការរបស់លោក លាវ ស្រេង ព្រះរាជអាជ្ញាអមសាលាដំបូងខេត្តកណ្តាល បញ្ជាអោយចូលខ្លួនលើឈ្មោះ ទូច សុខលីម ។ នៅក្នុងដីកាបញ្ជាអោយចូលខ្លួនមិនបញ្ជាក់ពីបទល្មើសអ្វីទេ ។
ពួកគាត់បន្ថែមទៀតថា ការចុះអនុវត្តនេះ បានទទួលបរាជ័យដោយសារឈ្មោះ ទូច សុខលីម អត់នៅផ្ទះ ហើយម្ចាស់ផ្ទះនិងកូនចៅរបស់គាត់មិនសហការ អនុញ្ញាតអោយចូលទៅក្នុងផ្ទះ បានត្រឹមចូលក្នុងរបងផ្ទះ និងអង្គុយជជែកលេង វែកញែកផ្លូវច្បាប់ពន្យល់ពួកគាត់ និងធ្វើកំណត់ហេតុការចុះអនុវត្ត ហេីយដកចេញ មិនមានការប្រទាំងប្រទើសនោះទេ ។
ជាមួយគ្នានេះ លោក ពេជ្រ សូរិយា មេធាវីរបស់ឈ្មោះ ទូច សុខលីម បានប្រាប់អោយដឹងថា ការចុះអនុវត្តរបស់កម្លាំងកងរាជអាវុធហត្ថខេត្តកណ្តាល លើដីកាបញ្ជាអោយចូលខ្លួន គឺ ខុសនីតិវិធីហើយ មិនអាចចូលសម្រុកចូលទៅក្នុងផ្ទះគេចឹងទេ ធ្វើនេះលើសពីដីកាបញ្ជាអោយចូលខ្លួនហើយ ។ ដីកាបញ្ជាអោយចូលខ្លួនពុំមានសិទ្ធិធ្វើដូចច្នេះទេ ហើយលោកបានដឹងរឿងនោះអស់ហើយជារឿងកិច្ចសន្យា ទិញ លក់ដី នៅឃុំស្អាងភ្នំ ស្រុកស្អាង ជាមួយឈ្មោះ សៀង ពិសិដ្ឋ ជារឿងរដ្ឋប្បវេណីទេ បានប្តឹងចូលតុលាការក្នុងរឿងរដ្ឋប្បវេណីរួចហើយ ។
ខាងក្រោមនេះជាសំដីលោកមេធាវី ពេជ្រ សូរិយា មានបីចំណុចចង់ឲ្យភាគីទាំងពីរទទួលបានយុត្តិធម៍ ។
១-ខ្ញុំបាទសុំមិនបកស្រាយផ្លូវច្បាប់ច្រើននោះទេ ប៉ុន្តែចង់ប្រាប់ទៅសមត្តកិច្ចកងរាជអាវុធហត្ថខេត្ត កណ្តាលថា ប្រសិនបើចង់បានយុត្តិធម៍ជូនភាគី សូមបញ្ជូនសំណុំរឿងនេះមកតុលាការ តាមពាក្យស្នើសុំរបស់ខ្ញុំកាលពីថ្ងៃទី០៥ ខែកញ្ញា ឆ្នាំ២០១៩ ។ ២-ករណីនេះ កូនក្តីខ្ញុំបាទឈ្មោះ ទូច សុខលីម បានដាក់ពាក្យបណ្តឹងទាមទារប្រាក់ពីឈ្មោះ សៀង ពិសិដ្ឋ មកសាលាដំបូងខេត្តកណ្តាលកាលពីថ្ងៃទី១៩ ខែសីហា ឆ្នាំ២០១៩ រួចហើយ បច្ចុប្បន្នសំណុំរឿងនេះកំពុងដំណើរការនីតិវិធី ។ ថ្មីៗនេះត្រូវបានសាលាដំបូងខេត្ត កណ្តាល ចេញដីកាកោះហៅគូភាគីឲ្យចូលមកធ្វើនីតិវិធីត្រៀមនៅថ្ងៃទី២០ ខែកញ្ញា ខាងមុខនេះ ។ ៣- កូនក្តីខ្ញុំបាទបានបញ្ជាក់ជូនខ្ញុំថា ការប្តឹងសមត្តកិច្ចកងរាជអាវុធហត្ថខេត្តកណ្តាលឲ្យចាត់ការរឿងនេះជារឿងព្រហ្មទណ្ឌ គឺក្នុងគោលបំណងគំរាមកំហែងកូនក្តីខ្ញុំបាទមិនឲ្យប្តឹងទាមទារប្រាក់គាត់តែប៉ុណ្ណោះ ។
ម្យ៉ាងទៀត កូនក្តីខ្ញុំបាទយល់ថា ការប្តឹងមកកងរាជអាវុធហត្ថខេត្តកណ្តាលឲ្យចាត់ការរឿងនេះ ជារឿងព្រហ្មទណ្ឌ គឺជាការត្រូវរ៉ូវគ្នារវាងមេធាវីរបស់លោក សៀង ពិសិដ្ឋ ជាមួយសមត្តកិច្ច ជាក់ស្តែងនៅថ្ងៃចុះអនុវត្តដីកាបញ្ជាឲ្យចូលខ្លួនរបស់ព្រះរាជអាជ្ញា មិនឃើញមានវត្តមានរបស់លោកព្រះរាជអាជ្ញាទេ បែជាមានការចូលរួមយ៉ាងសកម្មពីលោកមេធាវីរបស់លោក សៀង ពិសិដ្ឋ ទៅវិញ ។ (សម្រួលដោយ៖ ស្រីណា)
ចែករំលែកព័តមាននេះ