លោក Jack Ma ដែលជាសហគ្រិន និងស្ថាបនិកក្រុមហ៊ុន Alibaba Group បានចែករំលែកមេរៀនដ៏សំខាន់មួយក្នុងការដឹកនាំពេលដែលលោកសម្រេចចិត្តចុះចេញពីតំណែងជាអគ្គនាយករបស់ក្រុមហ៊ុនដែលលោកបានចាប់ផ្តើម ។
លោក Ma បានប្រកាសកាលពីថ្ងៃច័ន្ទទី ៩ខែកញ្ញាកន្លងមកថា លោកបានចាប់ផ្តើមដំណើរការផ្ទេរកិច្ចការរបស់ Alibaba ទៅឲ្យលោក Daniel Zhang ដែលជាអតីតនាយកប្រតិបត្តិរបស់ក្រុមហ៊ុន និងជាអ្នកបន្តតំណែងជាអគ្គនាយកក្រុមហ៊ុនពីលោក Ma តាំងពីថ្ងៃទី ១០ខែកញ្ញាកន្លងមកដែលជាគម្រប់ខួប ២០ឆ្នាំរបស់ក្រុមហ៊ុន Alibaba ។ ការផ្ទេរតំណែងនេះត្រូវបានរៀបចំទុកអស់រយៈពេលប្រមាណ ១០ឆ្នាំមកហើយ និងវាបានជួយឲ្យ Alibaba ក្លាយទៅជាក្រុមហ៊ុន e-commerce ដែលមានតម្លៃរាប់ប៊ីលានដុល្លារនាពេលបច្ចុប្បន្ននេះដែរ ។
សហគ្រិនអាយុ ៥៤ឆ្នាំនេះបានបន្តឲ្យដឹងថា ដើម្បីរក្សាការលូតលាស់របស់អាជីវកម្ម ការចុះចេញពីតំណែងរបស់លោកគឺពិតជាសំខាន់ណាស់ ។ លោកបានសរសេរក្នុងសំបុត្រមួយសម្រាប់អតិថិជន និងម្ចាស់ភាគហ៊ុនរបស់ Alibaba ថា ពេលដែល Alibaba ត្រូវបានបង្កើតឡើងក្នុងឆ្នាំ ១៩៩៩ គោលដៅរបស់ក្រុមហ៊ុន គឺបង្កើតក្រុមហ៊ុនមួយដែលធ្វើឲ្យប្រទេសចិន និងពិភពលោកមានមោទនភាពលើ និងក្រុមហ៊ុនដែលអាចបន្តដំណើរការឲ្យបាន ១០២ឆ្នាំ ។
ប៉ុន្តែមិនមាននរណាម្នាក់អាចនៅជាមួយក្រុមហ៊ុនរហូតគ្រប់១០២ឆ្នាំឡើយ ។ ក្រុមហ៊ុន Alibaba ដែលរឹងមាំត្រូវមានអភិបាលកិច្ចនឹងនទស្សនៈដែលឲ្យតម្លៃលើវប្បធម៌ និងមានភាពជាប់លាប់ក្នុងការអភិវឌ្ឍន៍មនុស្ស ។ លោក Ma បានបន្តថា មិនមានក្រុមហ៊ុនណាមួយដែលពឹងផ្អែកលើតែស្ថាបនិកសុទ្ធឡើយ ។ លើសពីនេះទៅទៀត លោកបានបន្ថែមថា ព្រោះតែសមត្ថភាព និងកម្លាំងមានកម្រិត មិនមាននរណាម្នាក់អាចរែកទំនួលខុសត្រូវដែលភ្ជាប់ជាមួយតំណែងជាអគ្គនាយក និងនាយកប្រតិបត្តិបានរហូតទេ ។
គម្រោងរបស់លោក Ma ទទួលឥទ្ធិពលពីអតីតកាលរបស់លោកដែលធ្លាប់ជាគ្រួបង្រៀនភាសាអង់គ្លេសនៅ Hangzhou ក្នុងប្រទេសចិន ។ លោកបានឲ្យដឹងថា គ្រូបង្រៀនតែងតែចង់ឲ្យសិស្សរបស់ខ្លួនមានសមត្ថភាពលើសខ្លួន ដូច្នេះតួនាទីរបស់ខ្ញុំគឺឲ្យមនុស្សដែលមានវ័យក្មេងជាង និងមានទេពកោសល្យជាងខ្ញុំបន្តតំណែងជាអ្នកដឹកនាំដើម្បីឲ្យពួកគេបន្តបេសកកម្មរបស់ពួកលោក នោះគឺការផ្តល់ភាពងាយស្រួលក្នុងការប្រកបអាជីវកម្មគ្រប់ទីកន្លែង ៕ កែសម្រួលដោយ ៖សុឃាក់
ចែករំលែកព័តមាននេះ