ខេត្តកណ្តាល ៖ បើយើងធ្វើដំណើរលើផ្លូវជាតិលេខ២១ នោះយើងនឹងឃើញដើមអំពិលដ៏ធំខ្ពស់ស្កឹមស្កៃមួយ ដែលមានអាយុជាង១០០ឆ្នាំហើយ ស្ថិតចំណុចជាប់ផ្ផ្លូវកោង នៅក្នុងភូមិព្រែកអុងប៉ាង ឃំុទឹកវិលស្រុកស្អាង ហើយអ្នកភូមិក៏មានជំនឿស័ក្តិសិទ្ធិថា មានអ្នកតានៅថែរក្សាដើមអំពិលនោះ ដោយបាននាំគ្នាបន់ស្រន់ ព្រោះតែពូកែសក្ដិសិទ្ធិបំផុត ក្នុងនោះសូម្បីតែក្រុមហ៑ុនធ្វើផ្លូវជាតិមិនហ៊ានប៉ះពាល់ទីនោះផងដែរ។
ជួបជាមួយកោះសន្តិភាព លោកតាហេង ញ៉ាញ់ អាយុ៧៩ឆ្នាំ ដែលមានដើមអំពិលដ៏ធំនេះនៅចំពីមុខផ្ទះ បានរៀបរាប់ប្រាប់ឱ្យដឹងថា ដើមអំពិលមួយដើមនេះ តាំងពីគាត់ដឹងក្ដីមក ឃើញដើមធំទៅហើយ មានអាយុលើសមួយរយឆ្នាំ ។
លោកតាបន្តថា បច្ចុប្បន្ន ដើមវាមានទំហំបីអោបមនុស្សចាស់ និងនៅតែមានស្លឹកលូតសាស់ផ្លែផ្កាល្អធម្មតា ហើយអ្នកភូមិតែងតែមកបេះផ្លែហូបផងដែរ តែមិនដែលលក់ដូរទេ ។ លោកតាថា ដើមអំពិលមួយដើមនេះ មានអ្នកតានៅ ទើបអ្នកភូមិហៅថា អ្នកតាដើមអំពិល គង់នៅ ថែរក្សាអ្នកភូមិព្រែកអុងប៉ាង ។
ដើមអំពិលមួយដើមនេះ មិនមានអ្នកណាហ៊ានកាប់មែកដើមទេ សូម្បីតែក្រុមហ៑ុនធ្វើផ្លូវជាតិ ក៏ធ្វើវាងមិនហ៊ានប៉ះពាល់ដែរ ។ លោកតារំលឹកថា កាលពីប្រហែល១០ឆ្នាំមុន មានក្រុមហ៊ុនថៃ បានមកស្ថាបនាផ្លូវជាតិ លេខ២១នេះ ដោយបានបើកគ្រឿងចក្រមកជីកកកាយ ធ្វើឱ្យដាច់ប្ញសដើមអំពិល ក៏បណ្ដាលអោយ ជនជាតិថៃម្នាក់បានឈឺស្លាប់ភ្លាមៗដែរ ។ (សម្រួលដោយ៖ ស្រីណា)
ព័ត៌មានពិស្តារ នឹងមានផ្សាយជូនលើទំព័រកាសែតកោះសន្តិភាព ។
ចែករំលែកព័តមាននេះ