ទឹកជំនន់ឆ្នាំនេះ…រងការប៉ះពាល់ខ្លាំង
- ព្រៃវែង
ខេត្តព្រៃវែង ៖ កាលពីរសៀលថ្ងៃទី១១ កញ្ញា លោកជា សុមេធី អភិបាលខេត្តព្រៃវែង បានដឹកនាំមន្ត្រីជំនាញជាច្រើននាក់ ចុះទៅពិនិត្យមើលស្ថានភាពស្ពាន និងផ្លូវជាច្រើនខ្សែ…
ខេត្តព្រៃវែង ៖ កាលពីរសៀលថ្ងៃទី១១ កញ្ញា លោកជា សុមេធី អភិបាលខេត្តព្រៃវែង បានដឹកនាំមន្ត្រីជំនាញជាច្រើននាក់ ចុះទៅពិនិត្យមើលស្ថានភាពស្ពាន និងផ្លូវជាច្រើនខ្សែ នៅក្នុងស្រុកពារាំង និងស្រុក
ពោធិ៍រៀង ដែលកំពុងរងការខូចខាតដោយសារតែទឹកជំនន់។
លោក ឡុក វុឌ្ឍី ប្រធានមន្ទីរអភិវឌ្ឍន៍ជនបទខេត្តព្រៃវែងបានឱ្យដឹងថា ទឹកជំនន់បានប៉ះពាល់មកលើ
ស្រុកមួយចំនួន ដែលស្ថិតនៅតាមបណ្តោយដងទន្លេ ប៉ុន្តែក្នុងនោះស្រុកពារាំង និងស្រុកពោធ៌រៀង គឺជាស្រុកដែលរងផលប៉ះពាល់ខ្លាំងជាងគេ ហេតុនេះហើយទើបលោកអភិបាលខេត្ត ដឹកនាំមន្ត្រីជំនាញចុះពិនិត្យ ដើម្បីចាត់វិធានការអន្តរាគម។
យោងតាមរបាយការណ៍របស់រដ្ឋបាលខេត្តព្រៃវែងបានបង្ហាញថា ស្រុកពោធិ៍រៀង ទឹកជំនន់បានធ្វើអោយផ្លូវចំនួន២ខ្សែរងការខូចខាត ក្នុងនោះខ្សែទី១ ចាប់ពីភូមិកំពង់ក្រមួន ឃុំព្រែកកន្លោង ឆ្ពោះទៅភូមិពោធិ៍រៀងត្បូង ឃុំពោធិ៍រៀង ខូចខាតប្រវែង៨,៧គីឡូម៉ែត្រនិងខ្សែទី២ ចាប់ពីភូមិសាលាស្រុកពោធិ៍រៀង ឆ្ពោះ ទៅភូមិច្រាំងទទឹង ឃុំព្រែកអន្ទះ ខូចខាតប្រវែង៨,៦គីឡូម៉ែត្រ។
ចំណែកនៅស្រុកពារាំង ប៉ះពាល់ផ្លូវចំនួន២ខ្សែដែលខ្សែទី១ តភ្ជាប់ពីភូមិស្វាយ ឃុំព្រៃស្រឡិត ឆ្ពោះទៅភូមិដូង ឃុំកញ្ចំ ទឹកជន់លិចប្រវែងជាង៤គីឡូម៉ែត្រ ។ ខ្សែទី២ តភ្ជាប់ពីភូមិ ព្រៃក្រឡាញ់ ឃុំព្រៃស្រឡិត ឆ្ពោះទៅភូមិកំពង់ទ្រា ឃុំមេសរប្រចាន់ ត្រូវទឹកជន់លិចផ្លូវ ប្រវែងជាង៣គីឡូម៉ែត្រ និងស្ពានមួយកន្លែងឈ្មោះ ស្ពានយ៉ូត ក៏ត្រូវទឹកហូរដាច់ផ្លូវលើក្បាលស្ពាន មិនអាចធ្វើដំណើរឆ្លងកាត់បានទៀតនោះទេ។
ទោះជាយ៉ាងណាក៏ដោយ ក្រោយពីចុះពិនិត្យពីស្ថានភាពជាក់ស្តែង នៅលើទីតាំងដែលរងផលប៉ះពាល់ទាំងនោះហើយ អាជ្ញាធរខេត្តមិនបានបញ្ជាក់ពីវិធានការ ក្នុងការចុះជួយអន្តរាគមភ្លាមៗនោះទេ ដោយគ្រាន់តែប្រាប់ថា និងលើកយកទៅជជែកពិភាក្សា នៅក្នុងអង្គប្រជុំថ្នាក់ខេត្តនៅក្នុងពេលឆាប់ៗនេះ ដើម្បីចាត់វិធានការអោយទាន់សភាពការណ៍ ។ (សម្រួលដោយ៖ ស្រីណា)
ចែករំលែកព័តមាននេះ