រាជធានីភ្នំពេញ ៖ សេចក្តីរាយការណ៍បឋមបានឲ្យដឹងថា ដោយសារតែការទុកដាក់សំរាមនៅមុខផ្ទះបង្កឲ្យមានជម្លោះ រហូតប្រើហិង្សាវាយតប់គ្នាយកដុំថ្មវាយបុរសម្នាក់ឲ្យរយះចិញ្ចើមហូរឈាមកក្លាក់ បង្កឲ្យមានការភ្ញាក់ផ្អើល កាលពីវេលាម៉ោង៩យប់ ថ្ងៃទី១២ ខែកញ្ញានេះ តាមបណ្តោយផ្លូវ៩៤ នៅចំណុចមុខហាងម៉ាស្សាយីហោវត្តភ្នំ ស្ថិតនៅក្នុងសង្កាត់ស្រះចក ខណ្ឌដូនពេញ ។
តាមប្រភពព័ត៌មានពីជនរងគ្រោះមានឈ្មោះប៊ុន ណាទី ភេទប្រុស អាយុ២៩ឆ្នាំ មុខរបរជាអ្នករត់កង់បីឥណ្ឌា ស្នាក់នៅផ្ទះ11E1 ផ្លូវ94 សង្កាត់ស្រះចក ខណ្ឌដូនពេញ បានអោយដឹងថា គ្រួសាររបស់គាត់ និងផ្ទះកើតហេតុខាងលើធ្លាប់មានទំនាស់គ្នា ដោយសារតែរឿងទុកដាក់សម្រាមនៅតាមចិញ្ចើមផ្លូវសាធារណៈដែលជាមុខហាងរបស់ជនបង្ក ព្រោះជនបង្កមិនឲ្យយកសំរាមទៅទុកនៅមុខផ្ទះរបស់គាត់ដែលជាកន្លែងរកស៊ី ។
មុនពេលកើតហេតុខាងលើនះ គឺឪពុករបស់គាត់បានយកសំរាមពីក្នុងផ្ទះយកទៅដាក់នៅមុខផ្លូវជាប់ក្បែរនឹងហាងម៉ាស្សាយីហោវត្តភ្នំ ស្រាប់តែកូនប្រុសរបស់ថៅកែហាងម៉ាស្សាចេញមកឈ្លោះ និងជេរប្រមាថឪពុករបស់គាត់ ភ្លាមៗនោះដែលគាត់ក៏បើកម៉ូតូកង់បីមកដល់ទីតាំងខាងលើនេះ បានចុះទៅសួរនាំ និងឈ្លោះប្រកែកគ្នាក៏ស្រាប់តែជនបង្កមានឈ្មោះ អុក ផល្លា ហៅក្រៅឈ្មោះអាអ្វី ភេទប្រុស អាយុជាង៣០ឆ្នាំ បានយកដុំថ្មយកទៅវ៉ៃលើរូបគាត់បណ្តាលអោយបែកចិញ្ចើមខាងស្តាំហូរឈាមស្រោចពេញមុខ រួចហើយក៏កើតជាការឈ្លោះប្រកែកគ្នាផ្អើលពេញផ្លូវតែម្តងផ្អើលទៅដល់សមត្ថកិច្ចចុះមកអន្តរាគមន៍រួមនឹងគណបញ្ជាការឯកភាពខណ្ឌដូនពេញចុះទៅហាមឃាត់កុំអោយប្រើហិង្សាជាបន្តទៅទៀត ។
ជនរងគ្រោះបានបន្តទៀតថា កន្លែងនេះគាត់ និងអ្នកភូមិ១១ទាំងអស់ធ្លាប់ដាក់សំរាមជាយូរមកហើយ ហេតុអីបែរជាមិនអោយគាត់ដាក់ទៅវិញដោយម្ចាស់ហាងខាងលើយកចំនីផ្លូវសារធារណៈធ្វើជាកម្មសិទ្ធផ្ទាល់ខ្លួនតែម្តង ។
បើតាមសំដីរបស់ខាងភាគីបង្កមានឈ្មោះ អុក ផល្លា ហៅក្រៅឈ្មោះអាអ្វី ភេទប្រុស ជាថៅកែហាងម៉ាស្សាវត្តភ្នំបានអោយដឹងថា មុនពេលកើតហេតុនេះគាត់បានទិញធុងសំរាមយកដាក់នៅកៀនផ្ទះរបស់គាត់សម្រាប់ទុកឲ្យប្រជាពលរដ្ឋរស់នៅក្នុងភូមិយកសំរាមមកបោះចោលនៅក្នុងធុងសំរាមកុំឲ្យប្រជាពលរដ្ឋយកសំរាមមកទុកនៅតាមផ្លូវធ្វើឲ្យបាត់បង់អនាម័យក៏ដូចជា ធុំក្លិនមិនល្អប៉ះពាល់ដល់ការរកស៊ីរបស់គាត់ ។
ជនបង្កបានបញ្ជាក់ទៀតថា ចំពោះធុងសំរាមដែលគាត់ទិញយកមកទុកនេះពេលដែលរថយន្តប្រមូលសំរាមមកប្រមូលគាត់នឹងឲ្យកម្មកររបស់គាត់ចេញមក ។ ជនបង្កឲ្យដឹងទៀតថា ភាគីខាងរងគ្រោះមិនព្រមយកសំរាមទៅដាក់ក្នុងធុងសំរាមដែលគាត់បានរៀបចំទុកទេ នៅតែយកសំរាមមកទុកនៅមុខផ្ទះរបស់គាត់ដដែល ទើបបង្កឲ្យមានការឈ្លោះប្រកែកគ្នាជេរប្រមាថគ្នាទៅវិញទៅមក និងវាយតប់គ្នាទៅវិញទៅមក ។
ក្រោយពេលកើតហេតុខាងលើនេះភាគីដែលរងគ្រោះបែកចិញ្ចើមខាងស្តាំបានទៅដាក់ពាក្យបណ្តឹងនៅប៉ុស្តិ៍រដ្ឋបាលនគរបាលស្រះចក ដើម្បីអោយសមត្ថកិច្ចចាត់ការទៅតាមនីតិវិធី ៕ កែសម្រួលដោយ ៖ សុឃាក់
ចែករំលែកព័តមាននេះ