សហរដ្ឋអាមេរិក-អ៊ីរ៉ង់ ៖ ប្រធានាធិបតីអាមេរិកលោកដូណាល់ត្រាំ កាលពីថ្ងៃទី១១កញ្ញាទំលាយឲ្យដឹងថា លោកមិនបដិសេធឡើយការសម្រាលជាយថាហេតុបណ្ដាទណ្ឌកម្មប្រឆាំងអ៊ីរ៉ង់ សំដៅបើកផ្លូវទៅរកការជួបគ្នាមួយ ជាមួយសមភាគីអ៊ីរ៉ង់លោកហាសាន់រ៉ូហានី។
ចាប់តាំងពីដើមខែកញ្ញាមកលោកត្រាំតែងលើកជាបន្តបន្ទាប់ ពីការជួបពិភាក្សាគ្នាដោយផ្ទាល់មួយ ជាមួយប្រធានាធិបតីអ៊ីរ៉ង់។ កាលពីដើមសប្ដាហ៍មុនពេលសួរលោកពីការជួបទល់មុខគ្នាជាយថាហេតុមួយនៅក្រុងញូវយ៉កនាដំណាច់ខែកញ្ញា ខាងក្រៅមហាសន្និបាតអ.ស.ប លោកត្រាំថ្លែងថាវាអាច។
រួចពេលសួរលោកក្នុងការិយាល័យពងក្រពើនៃសេតវិមាន ពីការលុបចោលមួយផ្នែកនៃទណ្ឌកម្ម ជាលក្ខខណ្ឌជាមុនរបស់ក្រុងតេហេរ៉ង់សម្រាប់ការជួបគ្នាកំពូលមួយលោកត្រាំថា យើងនឹងពិនិត្យ យើងនឹងពិនិត្យ! ខ្ញុំគិតថាអ៊ីរ៉ង់មានសក្ដានុពលធំមួយ ហើយលោកអះអាងជាថ្មីថា លោកមិនស្វែងរកការផ្លាស់ប្ដូររបបអ៊ីរ៉ង់ឡើយ។ យើងសង្ឃឹមថាអាចសម្រេចបានកិច្ចព្រមព្រៀងមួយ។
ប្រសិនបើមិនអាចទៅរួចនោះក៏មិនដឹងធ្វើម៉េចដែរ។ ប៉ុន្តែខ្ញុំយល់ថា អ៊ីរ៉ង់ចង់ឲ្យសម្រេចបានកិច្ចព្រមព្រៀងមួយ ព្រោះគេពុំធ្លាប់ស្ថិតក្នុងស្ថានភាពមួយបែបនេះ។ លោកលើកពីការលំបាកដ៏ធំខាងហិរញ្ញវត្ថុរបស់អ៊ីរ៉ង់។
យោងតាមទីភ្នាក់ងារព័ត៌មានអាមេរិកBLOOMBERTGថា លោកត្រាំបានលើកដោយចំហនាពេលថ្មីៗនេះ ក្នុងឱកាសនៃកិច្ចប្រជុំមួយនៅសេតវិមាន ពីគំនិតនៃការសម្រាលបណ្ដាទណ្ឌកម្ម ជាថ្នូរនឹងការជួបទល់មុខគ្នា ជាមួយលោកហាសាន់រ៉ូហានី។
គំនិតនោះទទួលការគាំទ្រពីសំណាក់រដ្ឋមន្ត្រីរតនាគារអាមេរិក លោកSTEVEN MNUCHIN តែប្រឆាំងជំទាស់យ៉ាងខ្លាំងពីសំណាក់ទីប្រឹក្សាសន្តិសុខជាតិលោកJOHN BOLTON។ ការដកតំណែងទីប្រឹក្សាសន្តិសុខរូបនោះកាលពីថ្ងៃទី១០កញ្ញា អាចរួមចំណែកសម្រួលដល់ការជួបគ្នាមួយ ដែលតាំងពីយូរមកហើយមិនអាចទៅរួច៕ (កែសម្រួលដោយ ៖ បុប្ផា)
ចែករំលែកព័តមាននេះ